bituon nga kapundiron

Dapit sa lampara
nga gilibotan og mga anunugba,
napalgan tika sa pultahan--
gatan-aw sa bugtong bituon
taliwala sa dag-om.

Daw kamatyonon ko sa kagutom tungod
sa tibuok adlaw nako'g bantay-suroy
hangtod sa utlanan ning lasangang nasod.

Gitagad tika apan gapuyo ra ka,
gagakos sa imong kaugalingon.
Duna kay gilitok apan nasapawan kini
sa gaguhong lagutob nga gabatil
sa imong dughan.

Dungan sa imong luha, nidul-it
ang kamatuoran nga duna'y
kahait sa bala.

Dira sa bungbong,
nibatog ang mga anunugba: Mga mata
sa ilang pako nakasaksi sa bituon
nga napapas sa langit
nga gayunyon.


-- TON DAPOSALA
Cagayan de Oro City, Philippines