1.10.2020

ang nahabiling kahayag sa lapyahan


Gikan gibagyo, napalid
layo sa langit ang kabituonan.
Ang mga nangahagbong
Nahimo tingaling mga aninipot
samtang ang mga nisalom
sa kabugnaw sa kadagatan,
napagngan ug natabonan

sa bunbon ug sa mga bulok 
sa kagasangan, giturokan og 
mga tunok ug puntok, gituboan 
og gagmay’ng mga tiil… 

Bisan nabanlas ug nakaging,
Gapabilin diha sa baybayon
Ang ilang pagkabituon.  


-- JOHN CARLO P. BERONIO
Cagayan de Oro City, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.