klinika

Namulak sa mga pasyente ang klinika, 

hamugaway, lapad nga huwatanan 

sa mga pasyenteng tawgonon 

ngadto sa langob sa ritwal sa mga doktor. 

Lain-lain lang ang hitsura 

ug lain-lain sab ang mga kolor 

nga mosidlak diha sa gipadulomang lawak. 

Ang mga narses mga hardinera nga sa tumang pag-amping 

hinayng naglibot nagdalag gagmayng kahon 

sa tubig, gunting, gapas. 

Apan klaro kaayo nga sa uban 

may miluta na nga bulok lagom nga puwa 

padulong na gyod og hinay sa pagkadugta. 

Ang uban nga mikuyos na naglutaw na lang sa hangin 

ug kon mouyog man ang salog inig-agi nila 

kana mao na ang kalag nga nagkabug-at, 

nagkabug-at samtang nagkagaan, 

nagkagaan usab ang lawas. 

Ang mga tipaka nangataltag, 

mibuhagay ug misayaw, alirong sa lawas, 

dili makit-an, ni mabati ang ilang kulos, 

ug hunghong diha sa lawak, 

gawas kon hitandangan sila sa kangitngit. 

 -- ESTER TAPIA 

Kathmandu, Nepal