pag-usisa sa nabuktot nga aktibista

Asa na ang aligato sa imong tingog?
Hain na ang imong mga tunob 

laktod sa lasang nga gaaso ang abog? 

Pastilan, basi’g maamang bisan ang dugdog 

kon molabyog-kapyot ang gakamang nakong 

mga pangutana! Mahitungod ining misteryo 

sa baroganan, palihog pagtiniil. Ibilin sa gawas 

ang imong sapatos nga Nike bahala’g gapanilap 

ang mga kawatan, gapahipi sa koral. Matugkad 

kaha nimo ang gilawmon sa ilang kagutom, niawas 

sa ilang kauwaw? Pustaay ta, kay bulawan lagi 

imong pustiso, igo ra kang mopahiyom samtang 

maglumba ug mangapangos sila’g kilaw bisan pa’g 

buaya. Ang mga tango niini, kaniadto, takos mong 

giatubang dihang gipalanog mo ang kinumo 

nga kilat. Malayat nimo bisan ang bulkan samtang 

imong giduyogan ang gahangos nga panon, gahangad 

sa bulalakaw. Kini gatultol sa damgo nga misutoy, 

malapason nga mikagis og duslit sa kangitngit: kining

kaagi nga nahikot sa gadugo nga kadena. Bag-ong 

Katilingban ubos sa puting gingharian sa engkantong 

magtiayon. Sila wala na nimo hinganli. Imo nang

giluom ang ilang bansagon nga kanhi imong 

gipalanog pagbundak sa kadalanan, mipakurat 

sa buta nga makililimos diha sa daplin ug mibaraw  

lakip sa kimay dihang hapit na unta makakuot og 

pitaka. Ug karon nga ikaw, kibol nga binayran 

sa tambaluslos diha sa palasyo, nasulod sa iyang 

bulsa isip tigpaghot sa iyang kaambong-- pwera 

buyag sa bulhog!-- samtang iyang gikidhatan 

ang gamaskara nga mga berdugo subay sa ilang 

mga bala, ambot na lang intawon sa kimpang asa 

padulong ang kalibog, gatulilik sa akong daman: 

Kanus-a motul-id ang imong barog 

pagbalik gikan sa imong sirko-balintong? 

Asa na ang aligato sa imong tingog? 

 -- MICHAEL U. OBENIETA 

Topeka, Kansas, USA