(Ang mga bika nga nagpasadpasad ning asoteya
mga tipaka sa napulpog
nga buhilaman sa mga bulak.
Karon ang pagkahugpong kanhi
sa mga gamot sa miukiok nga pagpakabuhi
mao'y mga tumpag sa buak nga bantayog,
nahipasadpasad ug nahipasadpasad
nga gitilapan sa nagkapal nga mga abog...)
Ang tingusbawan nga giluyong sa hangin
ug sa kalinga sa pagpasibaya gipadpad
angayng itisok sa kaang.
Ang pagpangandoy, ang pagdamgo
mao ba'y
pagpanglipang sa Bulaknong Handurawan?
Kon mapusgay man gani ang salamin
sa mga bitoon haguka ug salingkapaw da
ang pagpiyong sa mga nagdibuhong mata.
(Ug ang Mesitera maoy umol sa mga kamot
sa Arte sa tawhanong kaulit
alang sa mga matahom ug mahumot.
Ah, ang kaanyag usahay magtipig kalaksot
nga mogun-ob sa kastilyo sa kahimungaya
sa nagsapnay ug naghapa kaniya!
Ang palad nga nag-amuma
kagiwan sa iyang pagkamaaghopon.)
Ang hardin lakdan sa mga anino sa tuig
ug mao na lama'y magtipun-og ang mga tipik
sa nanglabay nga kasaysayan
sa hudyaka sa mga senyoritang kabulakan,
ug ang kaang— nga obra maestra kanhi
sa Kinaiyanhong pagsapnay sa buhilaman ug arte–
mao na lama'y napusgay nagkatagkatag,
nahipasad-pasad nga mga bika.
-- MELQUIADITO M. ALLEGO
Perryville, Missouri, USA
No comments:
Post a Comment