dihang napahak ang kahinog

Nagsalig ko 

nga mahinog ra unya ang sabana 

nga gibukotan ang pungango 

og laway sa kaka. 

Nahinanok ko 

bisan pa'g gihapak sa hangin 

ang akong batiis, ug nakurat na lang ko

dihang namatikdan nako nga 

napahak na ang gikahinaman.

Pasagdan ko na lang 

ang langgam nga motiwas sa katam-is 

bisa’g napalaw intawon, nakatilaw ra 

og kaaslom sa kaanugon.

-- JONALYN ALMACIN-GOURDON 

Nantes, France

unsaon pagsukod sa kahilom

paminawa lang 

ang paglaguto ug paglagaak nianang 

pungango sa dahon sa iyang 

pagkatagak 

-- JOVANIE B. GARAY 

San Isidro, Davao Oriental, Philippines

panimpalad

Luyo diha sa ospital sa Chong Hua, diha 

Bahandianon pod baya ang mga batang nagduwa, 

Nauwanan tadlas sa sapa sa Guadalupe. Latas 

Ibabaw sa paril, sa kinandadohan nga koral, 

Ang kakutas sa kapit-os kaluha sa paglaom. 

Pagkabililhon baya sa mga lata ug botelya samtang 

Ang pag-antos dili masukod sa kamugbo 

Sa ilang mga bukton. Ang pagkatkat tugbang 

Sa ilang pagkanaog diin gapasad pod 

Ang mga bildo sa kahadlok samtang nanggimok 

Ang mga ulod. Kining pagsuway tuod pagkadanlog 

Kon mangab-ot sab ang hangin sa kahabog. 

-- DENNIS S. SARMIENTO

Baltimore County, Maryland, USA

dunlok: usa ka adlaw sa agusto sa gibyaan kong baryo

                                                 

Mibarag ang kahayag 

Sa buwan palayo sa payag. 

Napawong ang uwang ni Blaki 

Dihang gibalibag og binugha 

Sa nalisang niyang amo. 

Ang gilaming nga mungaan 

Salin sa mingsignit nga atay 

Pagkahuman sa dakong ulan. 

Mikirig sa ilang tangkal 

Ang mga tali ug hiniktan, 

Nangapukling sa gibatogan 

Nga karaang nangka 

Diin usahay moalirong 

Ang mga aninipot, 

Diin magsakdapsakdap sab 

Ang mga kwaknit. 

Tinuod ang hunghungihong: 

Daghan sab ang napukan 

Sa pikas baryo. 

Misakdap, mikuyanap na 

Ang itom nga hangin 

Sukad nabanhaw ang anino 

Sa tiguwang daotan, 

Gasuroysuroy sa mga eskina 

Sa pasilyo sa tambalanan. 

Gabaga ang iyang tinan-wan. 

Kon iya kang tutokan 

Malata imong ginhawaan. 

Malanay imong damgo 

Sa iyang barang. 

Gaawas-awas mga lawas-- 

Gitayhopan sa gininhawa, 

Galigdas sa mga punerarya 

Daw gisilhig nga dahon, 

Giitsa sa dakong daob. 

Gikikit na ang uban

Sa mga irong gutom nga

Wa’y tag-iya. Ubay-ubay na 

Ang milugsong, gahayon og 

Apas sa ilang lubong 

 -- RODELIO BARELLANO
Caloocan City, Metro Manila, Philippines

kon

Kon dunay uwat ang imong 

pultahan agi sa bug-at nga pinatiran, 

kon dunay nabantok nga dugo 

sa imong tugkaran nga di na mabanwasan, 

kon mapaig ang nabiyaan nimong inun-unan 

kay giguyod kas tawo nga wala'y ngalan, 

kon mabuyok kas tinuyok-tuyok sa suga nga kaponderon 

didto sa di matultulang lawak, 

kon sirado na ang tanang ganghaan ug mangyamiid nimo 

ang ilang mga magbalantay, 

kon molawig na ang baruto paingon sa yutang wa'y ugma 

sakay imong hinigugma, 

kon gipiringan na ang imong mata og mahalong seda nga 

duna’y mantsa, 

kon gipatiniil ka na ug natunok apan duna’y aparador nga 

namungingi og sapatos, 

kon angkonon na sa kagubot tanan nimong kusog ug 

wala na'y sonanoy nga motingog, 

kon mosangpit ka sa Magbabalak, ug dili na siya 

mopatalinghog, 

consummatum est.

-- KENNETH MICHAEL M. BABA

Borbon, Cebu, Philippines

alampatnong pilgrimahe sa panahon sa pandemya

Kining ambongang gamitoyng abog sa Kinaiyahan 

nga ganahan makighilawas sa unod nga tawhanon 

sa abotanang nahimong mga tunglong kamatayon, 

mikuniskunis sa mga buhing gihay sa katunhayan 

ingon nga mihabas og di-maisip nga kagusbatan 

sa mga alampatnong galeriya sa tawhanong kalag. 

Ania nasang-at kanatong mga superyor nga nilalang,

sa atong tawhanong kaigmat ug kamabayanihon 

ug sa labyog sa atong mga obra, ang pagsumpo 

sa laksot nga kadaot nga gipahigayon niining dangan, 

o ang pagpakahilom ug pagpahiayon sa iyang kapritso 

paglampingas sa mga matahom bulak sa atong kalikopan. 

Daghang mga katingalahang lalang ang atong nahikyad 

sa kalibotan niadtong gawasnon pa ang panahon: 

Atong dila nagbutyag og kinumong tingog sa balak 

isip hinagibang nagtul-id sa mga sayop sa kasaysayan, 

atong awit nakatandog sa mga desperadong kalag 

ug naglalik kanila isip mga iskultura sa paglaom. 

Apan ang anino sa kataslak nagpangitngit karon 

sa mga dalan sa atong pilgrimahe ngadtos kagawasan; 

ingog mga ilo nga gihikawag mapinanggaong amuma 

nangindahay ta sa mabulokong balangaw sa gugma nga 

motulay sa atong damgo ngadtos hilwas nga kahilunaan 

luwas sa mga kasakit ug sa mga hulga sa kamatayon. 

Ngano bang uska gamitoyng tunokong lugas sa abog 

makaparalisa kanato ilawom sa gabok nga kahilwas 

ug usabon atong dagway sa maskara sa kahadlok? 

Nganong ang di-mabali nga bukton sa balaod mohakop 

man kanato sa kantalita sa iyang puthawng kamot? 

Ang nagsigeg galing nga kagutom wa gayod mapugngi 

sa kapintas sa pulis ug sa inutil nga galingan sa gobyerno! 

Di ba angayng ilabyog nato atong panan-aw sa halayo? 

Ngadto sa may ganghaan sa bag-ong kabuntagon, 

atong mga kasingkasing maglukso-lukso dungan 

sa kundas sa naghiphap, nagtalidhayng mga sapa nga 

maoy mosung-ay sa atong mga alampatnong damgo 

ngadto sa pilgrimaheng yuta sa hilwas nga kalibotan! 

Dali! Ipasunding ta mga bul-og sa pagbati sa atong kalag 

nga angayng ipaundayon sa kabuot sa Kinaiyahan...

diin ang mga kundatang huros sa hanging Habagat 

nakigromansa sa tam-isong agik-ik ni Amihan, 

diin piyak sa kalanggaman ug tabyog sa kadahonan 

miabay sa koryograpiya sa mga balod sa kadagatan. 

Ug ang mga bathala, pula ang mga aping sa kahimuot 

nagalantaw gikan sa ilang nahilunaan sa pilgrimahe 

sa mga Alampat, lango sa mga kadaogang naani 

sa ekstrabagansa sa mga pagbati sa kasingkasing, 

sa kahunit sa kalag batok sa mga hulga sa kamatayo’g 

kahubo sa kagawasan ug pagka duas sa mga balatian. 

-- DON PAGUSARA 

Davao City, Philippines

panon

nikuyog na kos martsa gahapon. 

nangita ko nilang mila’g ben. 

wa sila. gikulbaan ko. 

wa koy makaestorya. 

pero may niduol 

nako. silang ed, 

tibo, archie, 

lorena. 

“ikaw 

na 

pod 

karon.” 

nakurat 

ko. nilingi 

sa panong sikit, 

lanog, lig-on. pero 

nikalit og kawala. 

gilamat ko o gikalag? 

nag-inusara man diay ko 

pero padayong lig-on ang kumpas 

ug ang pulso sa singgit ug martsa. 

niabot silang mila ug ben 

gikan sa ilang isigka 

simbahan. nagpaambit 

og saysay sa mga 

kalag. nikiblat 

ang pagbarog 

sa panon. 

"ikaw 

na 

pod." 

"oo," 

nitando 

silang mila 

ug ben. "barog ta. 

napuno ang dakong 

hawan sa ingon nilang 

ed, tibo, archie, lorena. 

dihang namulong silang mila 

ug ben, nitapok ang buhing panon. 

-- DESIREE L. BALOTA 

Talisay City, Cebu, Philippines

kadasig, diyes anyos

Kadasig an imo ngaran 

kay sinisiring nga an kinabuhi 

permi nga pakigbisog 

ha kalugaringon. 

Nakigbisog ka yana 

han dagom. 

Aanhon ba 

hin usa nga tatay 

nga tututdoan ka hin 

kaisog? 

Hini nga kinabuhi 

damo an pag-awayan 

nga aton aatubangon. 

Pipira hini pag-uungayan ta. 

Pero, may mga giyera 

nga aton la. 

Ikaw la; usa ka la 

nga maatubang. 

Aanhon ko ba 

Tutdoan ka 

hin kadig-on? 

Ano an angay mabaroan 

hin usa nga diyes anyos? 

Hadto 

han ginbuburod ka pa la nimo nanay— 

nahadlok ako hadto nga giyera. 

Siyahan ko adto 

nga pag-atubang 

hin sugad nga giyera. 

Pero, siring ko: 

Kun magmamatalaw ako; 

diri ako maatubang; 

Hin-o man an maato, 

magmamaisog para ha iyo? 

Siguro, yana 

diri kaisog an imo 

angay mabaroan 

kundi 

an humigugma. 

 -- VOLTAIRE Q. OYZON 

Tacloban City, Philippines

ang kaligoanan sa mangunguot

Pag-abot sa bayranay wala koy problema kay para sa usa ka tawo ra may akong gikaligoan, usa sa mga lawom-lawom nga banyera nga gilibot sa tunga-tungang bahin sa Plaza Independencia. Nindot dinhi kay makita ang langit, unya kay wala may nagdungaw nga dagkong kahoy disgrasya na kaayo kon matagakan kag til-as. Gialirongan og mga punoan sa kamates (kadtong klase nga molatay) ang mabaw nga mga kaligoanan nga tua sa daplin, laray sa sinimaang mga alambre. (Ang lagwom mas mahal, unya sibuyas bombay pula ang tanom nga gialirong). Menosan lang ang kapakapa, dili mag-initik aron dili mangatol ang ilok. 

Kadtong bayranan sa pamilya nga miokupar sa kasikbit nako nga dakong kaligoanan duol sa puntod sa kilid sa resort nga habig sa dagat, nga sa akong banabana singko por diyes metros, maoy tukhionon. Mibungat ang maningilay og kantidad (pila gani to ka gatos) nga ang singil kada ulo apan miinsistir ang lider-lider sa mangaligoay nga ang bayad kuridas para sa usa ka grupo, nga dili na sapayan pila ka tawo, bahalag magbinag-irayg lubot. (Maayo mag hait og kibot sama sa paril sa Fort San Pedro, sagbat pa sa bukogon nga dalagita.) 

Samtang nangugat sila sa ilang panaglalis may nakit-an kong pitaka sa tapok sa ilang mga hinubo. Pagpunit nako ani gilingi ko sa tanan. Dungan kaayo, makapahinumdom nimo sa martsa sa kasal sa mga tinggawong sa ngiob nga lasang atol sa piyesta sa langit. Miapil gani ang maningilay nga ugdog ubol-ubol, unya ang batos niyang binatilyong kirat ganado kaayong misulirap. Midali-dali kog pahayag nga abi nakog mao to ang akoa. Giuli nako ang pitaka unya gilayon gihulbot ang akoa nga susama ang kolor ug gidak-on. Medyo lahi lang kay ang akong gipunit hulikab ang porma. Maayo gani kay mikalma sila ug mibalik sa ilang ergo, deretso morag payong nga gihipos pinaagi sa usa ka tuplok kay gipadpad na ang dag-om. 

Ikaduha na ni sulod sa hamubong panahon nga gisuspetsahan kong kawatan. Gikan pa man god ko sa karnabal, nasangit sa usa ka suok nga basar nga nagkalandrakas lang ang baligya. Dihang gabitbit ko sa napilian nakong abubot, kwintas nga plata nga ang pabitay kalabera sa kwaknit, nahisalaag ko sa gawas sa tindahan nga daghan og lutsanan sa akong pagpangita sa apapangigong tindera nga naglaruylaroy, gilaay kay walay laing namalit gawas nako. Medyo layo na ko sa tindahan dihang nasigpatan ko sa tenyente del baryo unya gilayon gibutang-butangan. 

Karon samtang gahulat kog masakyan misulod kog karinderya nga gibitayan og mga sinapid nga bangan sa ahos ang mga sagbayan. Wala ko magdali nga masilbihan kay nalingaw kog pamantay sa mga kustomer. Dihay sabaang senyor nga ataon og panit, gialirongan sa iyang mga batos. Klarong abogado nga daogan sa kaso. Abogadong probinsiyano, gabilangkad samtang nanukhi og pinatalsik. Gasinaw ang nawong, galut-od ang suwang, balhiboon ang awom nga maorag pasas nga gipapilit sa kilid sa gahapa niyang ilong. 

Apan mas nalingaw kong naniid sa miokupar sa labing duol sa akoang lamesa nga lahi sa uban kay ang mantel dili binulakan. Magtiayong saysentahon nga gabanos-banos og panug-ab, nagmug-otanay nga blangko ang tinan-awan, klaro nga wala magkasinabot morag Insik ug Makaw. Nangutana ang bana sa silbedorang bagag ngabil nga morag troso ang paa kon pilay bayranan sa ilang gikaong balbakuwa ug pinakupsan, apan ang asawa man hinuoy mitubag. Niya pa, hoy, gibarod man diay kang ugoka ka, paingon ta sa Argao, uy, dili sa Guihulngan. Gibangkong na. Wala pa baya tingali sila abtig ango-ango. Mga mayang bungol lang tingali. 

Galibog na pod hinuon ko. Abi nakog gahulat kog bus sa merkado sa Mantalongon, nia man diay ko sa pantalan sa Tangil. Dakong dagat, morag San Pedro San Pablo, ang tubig mitupong na sa ngilit sa piyer nga hinimo sa itom nga anapog. Dihay pasahero nga klarong regyular nga magbiyahian didto nga mipasalig nako, bisag gatungok ko ug walay pulong nga gibungat, nga dili na mosaka pa ang tubig. Niya pa nga gatingsi, uban sa paghapuhap sa gamayng notbok nga mao ray iyang dala, bisag moubog pa ang agta sa Kantularoy, hangtod dinha na lang kutob—daghang salamat Manoy Manang Diyos ko Ginuo pasayloa kaming makasasala niining panahon sa kasadya—ang awas sa taob. 

-- VICENTE VIVENCIO BANDILLO 

Metro Manila, Philippines

kay dili na matakdo ang gihunahuna ug ang gibati

Lab-as ang mga isda ug tamala 

Nga imong gibitbit sa una. Aya-ay 

Ang dagat, wala’y hangin. Nagdag-om 

Apan wala moulan. Katam-is sa init 

Nga sabaw sa gitula nga danggit

Pinarisan og bag-ong gigaling nga humay 

Ug diha pa’y hinog nga saging lakatan. 

Gihagpatan nimo’g bukog ang isda, dayon 

Gibutang sa akong plato. Nagkinamot ta, 

Wala’y tingganay kay lanog na 

Ang kainit nga atong gisaw-an. Apan 

Karon, bisa’g lami ibalik og handuraw, 

Lamaw na lang ang salin sa dughan. 

 

-- HAZELEN C. COBOL 

Argao, Cebu, Philippines

alang nimo, inday

Bisan pa’g susama ka sa kataposan 

nga tulo sa uwan gikan sa sandayong 

saw-on gihapon tika, ug mahimong 

mapusgay ka, 

mosubay ra 

sa mga badlis niining pa’d,

molahos og panimpalad 

tugbang sa imong kagawasan. 

-- JEFF DEL ROSARIO 

Danao City, Cebu, Philippines

pangitaa ko ngadto

Pangitaa ko sa mga kamot 

nga gagunit sa usag-usa 

nga walay gikahadlokan 

kon makita sa uban. 

Pangitaa ko sa mga halok 

nga andam nimo ihatag 

sa wa’y pagduhaduha 

bisa'g pareho ta og kinaiya. 

Pangitaa ko sa mga panagtipon 

nga imo kong ubanon aron 

mailhan ko isip imong hinigugma 

ug dili higala ra. 

Pangitaa ko ngadto 

gahulat 

sa imong pagpangita 

kanako. 

Nga ako ug kining gugmang 

imong ipabati kanako 

dili maundang sa pagpangita ra 

susama sa pwerto

nga gahulat sa barkong dugay ra 

wala’y dunggoanan. 

-- JOHN GILFORD DOQUILA
Davao City, Philippines

hubad sa mga mugbong balak ni Yannis Ritsos

Naglumba ang talan-awon 

sa bintana sa tren. 

Nakakuot ko’g totpik 

sa akong bulsa, 

kampanaryo 

sa akong kalo. 

*** 

Naghaguros nga hangin. 

Kagabhion. 

Nagkipat-kipat ang mga suga sa pantalan. 

Sa balkonahe sa usa ka balay, 

hilom nga nanilhig 

ang usa ka babaye. 

Sarado ang mga maleta. 

May nakasulat: "Bawal." 

Ang hangin usa ka higala. 

Ug ang mga sakayan, 

ang mga dagkong sakayan. 

 *** 

Kanang suga 

ang gainusarang suga 

ibabaw sa bungtod 

gibitbit na didto sa mitaliwan na. 

Nakahinumdom pa ba ka? 

 *** 

Ang tanan usa ka sikreto-- 

ang anino sa bato 

ang kuko sa langgam 

ang gilukot nga tanod 

ang lingkoranan 

ang balak 

*** 

Sa ihalas nga hangin 

sa kinahabogang lupad 

sa kinaputian nga kanaway-- 

kagawasan 

-- GRATIAN PAUL R. TIDOR 

Dipolog City, Zambonga del Norte, Philippines

les amants

Gitakoban og puting panapton 

Ang panagpingki sa mala nga salamangka 

Nga motugaw sa nahinanok nga kalibotan 

Ug mobugto sa habak sa katulogon 

Nga mosukod sa hawan nga gintang 

Taliwala sa panagdait sa mga alindahaw 

Nga kanunayng gihandom ang paggimaw 

Sa yagpis nga bulan 

Aron maoy molangkat sa tabil 

Sa luspad nga kawanangan. 

-- LEONEL QUILLO 

Malalag, Davao del Sur, Philippines

mohimulso

Usa ka bata nagyuko nga nanghagdaw og mga buwak sa iyang mga tudlo nga nagtipig og kahayag ug mga gasa. Usa ka tawo nagbasa og mga pulong naglingkod naghawid sa mga panid sa iyang mga tudlo nga nagtipig og mga dilaab ug mga anino. Mga tudlo nagdugtong... Nagbasa, naghagdaw, ug naghugpong. Usa ka bata nanghagdaw og mga buwak. Usa ka tawo nagbasa og mga balak.

 -- MICHAEL U. OBENIETA 

Topeka, Kansas, USA

parola

Gikawhat ko ang dagat ug baybayon. 

Naglabyog og silaw, nanimbaya 

sa mga balod nga buot malukot. 

Nagtungtong sa granitong tore, 

mokidlap ako daw bituon, 

nagdan-ag sa managtrato 

nga gimino kilid sa pantalan 

sa dughan. Sa akong nahimutangan, 

tin-aw kong mabati ang parat 

nga laylay sa mga balod

samtang giabog ang kangitngit 

nga mitina sa kagabhion. 

-- RAUL G. MOLDEZ
Cagayan de Oro City, Philippines

eredero sa yamo

Sa haw-ang nga galamhan 

sa eredero sa yamo 

tabunok ang kawalaan 

diin bus-ok ang mga bunga 

sa natanom niyang kasub-anan. 

-- KEVIN A. LAGUNDA
Consolacion, Cebu, Philippines

tilimad-on

Sa imong kiliran, wa’y undang ang pagkitiw-kitiw sa mga tiil sa uk-ok: gahayang-kamang kilid sa hilis nga tsinelas. Sa unahan, igo rang mibingat ang kagirong iro: gibakhoan sa iyang pangagho ang mga gapnod sa imong damgo. Mitaroy iyang aw-aw daw sundang nga mitigbas sa nanggamot nga mga anino, nanuksok sa nag-arkong mga badlis sa imong agtang. Natanggong ang kagabhion sa iyang kaugalingong urom. Ug ang bulan, gangisi sa iyang nasaksihan: gabuhagay ang tina-i sa patay nimong kalibotan. 

-- IVAN RIDGE ARBIZO 

Davao City, Philippines

hagtos

(alang sa anak sa akong ig-agaw)

Ang kinabuhi dili baya lahi anang lambo 

nga nahigot diha sa dughan sa tabanog. 

Madunggan nako ang hangin sama 

sa mga ping-it ni Jim-jim. Kabangis 

sa kaugmaon kon padayong manghudlat 

ang kapintas sa unos. Magkadugo 

ang mga tudlo sa kahait sa gagmayng higot 

nga nalambod sa kamot ug bukton. 

Kon di na mapiog ang haguros, 

masakmit gayod ang dugayng gikuptan. 

Ug ang langit wala baya'y utlanan 

sama niining tabanog nga nahagtos. 

-- DENNIS S. SARMIENTO
Baltimore County, Maryland, USA

pagsubay sa tungason nga dalan ni Han Shan

Gipadpad sa libod-suroy nga hangin 

Dinhi sa halayong kabungtoran. 

Wa’y nakahibawo diin sya gikan, 

Napapas na sa panumdoman 

Ang libaongon niyang giagian. 

Wala gani nakahibawo unsa’y 

Tinuod niyang ngalan apan 

Dinhi gianggaan siya og 

Han Shan: bugnaw nga bungtod. 

Mimugna siya og mga balak 

Sa iyang pakigbugtaw sa kamingaw, 

Sa iyang pakigharong sa kahilom, 

Sa pag-abot ug pagbiya sa mga adlaw,

Sa mikagiw nga kabatan-on. Paminaw: 

“Gawasnon ako dinhi uban 

 Sa akong suod nga higala— 

Ang puti nga panganod.” 

Ug ako sa akong nahimutangan 

Buot sab kong mapalid sa hangin, 

Sum-okon ang baga nga panganod 

Ug dasdason ang hagit sa kangitngit.

-- RODELIO BARELLANO 

Caloocan City, Metro Manila, Philippines

kita nga makakita

“Now therefore, give me this mountain of which the LORD spoke in that day.”

 -- Joshua 14:12a (NKJV) 

Si Caleb lang ang nakakita 

sa bukid. Sa iyang mga kauban, 

patag ang tanan. Mao baya siguro 

nga hilaw sila sa matag adlaw’ng 

kalipay sa kaisog. Hinaot kita karon 

sama sab kang Caleb. Ang patag 

dili dalangpanan sa atong mga damgo. 

-- DELORA SALES-SIMBAJON 

Butuan City, Agusan del Norte, Philippines

bisan unsa’y moabot

mokaratil na lang ko’g dagan 

unya motago didto sa baybay 

diin gipuy-an ang dakong panas 

sa kinaisogan nga kasag 

bisan sa tanang bagyong naagian 

nilutaw ra man gihapon kining dughan 

kuyog sa mga gapnod 

wala'y baha nga nilubong nako sa lapok 

kay bisan pa og ang ginoo 

nakalimot og lili sa baruto 

gihigot man ko niya sa iyang bukag 

makuha ra gihapon ko niya og balik 

iya ra kong bitaron 

bahala na og magpusnga-pusnga ko 

gikan sa akong pagkalumos 

-- JONALYN ALMACIN-GOURDON 

Nantes, France

tugkad sa buntag

sa paglawig ta sa mga balod 

sa kangitngit, kuptan ta'g hugot 

ang pagbugsay hangtod atong 

maabtan ang pagtugkad 

sa linaw ug hayag. 

padayon silang 

nagdam-ok og 

gabii 

apan 

di 

ta 

pul-an 

og bugsay. 

langob ra ning 

atong matumpag. 

masangko ra atong 

bugsay sa kinutoban 

ning gabiing gipalapad. 

ug silang naghipos sa hayag 

malumos sa kalawom sa buntag. 

 -- DESIREE L. BALOTA 

Talisay City, Cebu, Philippines

teyorya moringa oleifera ni Omar Khalid

Gibunyagan ka'g Lolong karon kay hinok mo nga gitukob ang alkansiyang kawayan, ug wala kini malilong, gitaral ka’s pangawat, namatud-ang sad-an, nasintensiyan ug nabalhog sa bilanggoan. 

Apan magabok usahay ang rehas tungod sa mantikaong hustisya. Miubog ka’g balik sa lunangan sa pulitika, ug subling gidawat ka sa imong lungsod kay alang kanila wa’y nahitabong kawat bisag kapila pa kini mapamatud-i. 

Wala man god malilong nga sa imong pagharbat sa kamunggay sa silingan, dihang imong giratsada ang kamatis ug tangad, ug gipitlok pa ang galumlom nga himongaan, gihatdan mo man sa namituong nilat-an ang nagmatang tag-iya kansang nangamig nga tiyan nainitan sab og dyutay sa sabaw. 

-- CARL B. MANTUA 

Baybay City, Leyte, Philippines

ang dili mabakwi

Buot ko untang mobalik 

ang langit ug yuta 

sa gutlo nga mahitabo pa 

ang wala mahitabo, 

sa gutlo sa wala pa 

ang gutlo nga nahitabo 

ang dili angayng mahitabo, 

sa wala pa ang kahingawa 

sapawi og kaligutgot. 

-- VICENTE VIVENCIO BANDILLO 

Metro Manila, Philippines

kan lolo peling

Parong na an baga ha sud-angan.  

Ngula na an palibot 

Dida han kawara han bagting han pamukpok 

Han imo ginhuhurma nga mga sundang. 

Maiha na man gud nga nagririnagaak 

An kaluluthan han imo payag nga pandayan. 

Ambot kun nanhingain na an imo 

Pinanhimo nga mga hinagiban. 

Inop ko nga unta 

Aadto na ini hira ha pungkay han bukid 

Diin binurongan an mga dalan. 

Didto diin diri na nakakautod hin kahoy an puthaw, 

Diin waray na hapdos an kada samad. 

 -- KENNETH ALVIN CINCO
Salcedo, Eastern Samar, Philippines