5.26.2009

hunas
















Walay madungog nga hagawhaw sa dagat
Inig hawok sa bawod sa tiilan sa baybayon.
Sa layo, ang suga sa lampara sa mangingisda
Murag mga gagmayng tuldok nga lamyon
Sa kangitngit matag hunghong
Sa habagat ug mga damgong nangapalid.
Pipila ka lakang pa sad ang lakwon sa hunasan
Kon baktason nimo paingon sa lawod
Apan inig bangon sa adlaw sa sidlakan
Moabot ang lab-as nga bahanding magkisikisi
Diha sa mga barotong gihatod sa naghaguros
Nga taob. Nagdagan, nagdasig paggakos
Sa parat ug tam-is nga baybayon.


-- NEILE GENICA MIJARES
Cebu City, Philippines

4 comments:

Balitaw said...

genica, mao ba ni imo una nga poem sa kabisdak? ganahan kaayo ko sa imo poem. nindot! i like the imagery...gimingaw noon ko ug dagat, magtan-aw sa mga mangingisda.pagsuwat pa...akong atngan

alig-ig said...

Nindot, Gen. Sama nga ang magbabalak angayng mosulat og bisag usa lang ka balak kabahin sa gugma, ang Sugboanaong magbabalak angayng mosulat og bisag usa lang ka balak kabahin sa dagat. Nindot ang balak nga kabahin aning mga butanga. Unya doble ang kanindot kong ang balak sa dagat usa usab ka balak sa gugma....

G talks said...

hi neile, diha jud tika idol..hehehe...daghan pa unta kog makat-unan nimo if wala pa nanubra sa ka parat ang dagat nga kaniadto atong gipuy-an...kuyog nya namo ni agnes ha... sa bungtod...take care..

Empress_Of_Drac said...

hahahaha...naa pay daghan mas nindot ana nag poem nga nga gisuwat si neile...hahaha...miga mi ana...idol na nako...hahaha...bitaw, kuyog namo nya namo adto bungtod dos...mag adik adik ta didto...hehehe


Daghang salamat sa mga maniniyot nga gapaambit sa ilang mga hulagway sa Google ug Flickr.