kahipokrito sa mga engkanto

Giimbargo sa mga engkanto

Ang akong gidalan’g tawsho.

Wala gyod nila pasaylo-a

Bisan og usa na lang ka lata.

Lami ra ba unta kadtong

Isagol sa humba kuyog sa

Binuwad nga bulak sa azucena.

Ang kaparat og baho sa mawos

Nga ginamos nga itom nga mga

Lugas sa batong maghatag og

Talagsa-ong timpla ug gunas

Sa dila, may pagkakatol-katol

Panimbang sa kaparat sa patis

Katam-is sa kamay, ug kaaslom

Sa suka—ilata sa mga hiniwa

Uban sa dinukdok nga ahos,

Mga dahon sa panakot ug liso

Sa paminta.

Ang gahumoy-humoy nga tambok—

Sa tunga-tunga sa daw nalanay,

Nahapnoy nga panit ug nalulot,

Kabungkagon nga unod sa baboy —

Ikumot sa kan-on binahugan

Sa naitos nga sabaw nga bisa’g

Galasa-lasa sa mantika. Pwera butod,

Walay bidli ang kalami!

Tinu-od kaha ang tuo-tuo:

Ang asin sumpa kuno batok
Sa mga dili ingon nato?

Tungod kaha kay sobra ra

Kaparat ang akong tawsho

Mao nga kini ilang giimbargo?

Magmantinir na lang ko’g abli ani

Og usa ka lata nga Spam.*

*On average, 3.8 cans are consumed every second in the United States - The guide to United States popular culture.

-- JOHN K. ZABALA

Baltimore, Maryland, USA

taghoy sa siloy

matag banagbanag

mamukaw manugdon magsalag

nanganaykanay mong awit

nanamilit nangaliya sa kangitngit

miabi-abi sa migitib nga kahayag

wa ka mabati ni John Keats

o Shakespeare imong gitagana

kanamo ang imong kaidlas

kanindot katam-is katahom

bukidnong taghoy ul-ogi

ang pagaw kiwaw namong tingog

matagbaw ang kamingaw kahidlaw

ikay tubag kahayag sa saag

laag namo nga kalag

-- RODELIO BARELLANO

Caloocan City, Philippines 

samtang nagsayaw ka'g ballet sa carnegie hall

Akong gibalikan ang pagsukarap ug pagkapakapa

sa mga alindanaw sa linaw sa Montealegre,
ang pagdailos ug pagkintokinto

sa mga gangsa sa suba sa Matnog
ang pagtuyhakaw ug pag-ikid-ikid sa mga
tuwabong sa busay sa Apalan:
kining tanan gipasundayag gisul-ob, giadorno mo

sa buhilamang bantawan--
kanhi nga kadula, katagibata
karon bantogan nga ballerina.

-- MELQUIADITO M. ALLEGO

Palm Harbor, Florida, USA

kabahin sa mga ballerina

(isip kontrapuntal sa balak ni Melquiadito M. Allego)

Didto sa amo, ang mga mananayaw ubos

sa tugtog sa amihan ug sa ritmo sa

panuig, pangulilang, sa init, sa ulan—

ang kagaskas sa kakugnan ug landong

sa gabon sa kabungtoran.

Ay, ang kiay sa kababayen-an

samtang nagbunglay sa umahan

ug sa teyatro nilang basakan

lupig pay pasundayag sa giingong

mga ballerina sa mga hinashasan.

Didto sa amo, ang mga mananayaw

nagsayal sa kalalim sa kinabuhi

dili magkinto. Hinunoa, nanagsul-ob

silag lapok ug katawa, talidhay,

ug binulokang damgo sa ugma

uban ang pangindahay nga unta tanang

diwata modawat sa halad nga kakugi

inig-abot sa ting-ani.

-- OMAR KHALID

Metro Manila, Philippines

pughaw nga kaanyag sa awop nga kahayag

Mga babaye nga pughaw na ang kaanyag

Migimok daw kagaw. Sa awop nga kahayag

Pasayloang wala ko ninyoy ikatanyag,

Mga babaye nga pughaw na. Ang kaanyag

Ninyong nahanaw, kinsa kahay nakabunyag,

Sa inyong puntil kinsa kahay nakayagyag.

Mga babaye nga pughaw na ang kaanyag

Migimok daw kagaw sa awop nga kahayag!

-- VICENTE VIVENCIO BANDILLO

Manila, Philippines 

sanglit danghag usahay ang pagsangpit

Amahan namo,

ayaw kami kaloy-i sa among pagkamang hinay-

hinay balik sa kabatoan tultol sa imong tanaman

nga anaa sa mga langit

gasanga-sanga og kilat samtang wa’y kutas ang kulihad

sa gihutoy nga dugdog nga gahinambog aron

pagdaygon ang Imong ngalan. 

Talikdi ang among hagit pagtila

sa imong lapalapa hangtod

umabot kanamo ang Imong gingharian

nga gilapawan sa kabugnaw

sa among dughan kay wala

matuman ang imong pagbuot

nga labwan unta namo ang gaan nga pagkatap

sa yamog apas sa aso. Gapadayon ang paghuyop sa abo

dinhi sa yuta maingon sa langit

nga gilubngan sa among panghupaw

tidlom sa among kauhaw.  Ania giulod

ang kalan-on namo sa matag adlaw

samtang gakutoy ang Imong dughan,

ganganga sa kahinam hangtod

ihatag kanamo karong adlawa
ang lunop gikan sa among mga mata.

Pasagdi ang among pagluhod dinhi sa lapok

ug pasaylo-a kami sa among mga sala

nga wala pa namo matagbaw

pagtilok.  Silii ang among dila,

maingon nga nagapasaylo kami

sa katam-is sa Imong samad

nga kanunay gidalit

sa mga nakasala kanamo,

gasupsop sa imong dugo.  Ayaw mi did-i

nga makigsawo sa mga langaw,

ug dili Mo kami itugyan sa panulay

kon kami wala’y bawnon nga kahangol sumpay

sa Imong dila. Padanlogi pa ang imong agianan ug—  

“Hinuno-a, luwasa kami sa daotan. Amen!”

bakho sa baki nga napisat sa among pagkaumod, O,  

Amahan namo!

-- MICHAEL U. OBENIETA

Topeka, Kansas, USA

nunot sa usa ka semana nga kasakit

walay nawala

walay nakuha

mao ra gihapon

gikan karon

apil ang ugma

hangtod sa

kahangtoran

-- RIC S. BASTASA

Katipunan, Zamboanga del Norte, Philippines

padulong

Nagtagak nga sanga.

Mga marka sa tunob

nag-agni nako pagsunod

sa ganghaan, ug misulod ko

hangtod nalamat og nalisang,

nagkamang pagbalik

og pangita sa dalan.

“Ayaw kahadlok,”

hunghong pa sa hangin.

“kay dili na ka masaag.”

Nahanaw ang mga tunob,

Ug nahabilin ko. Nag-inusara.

Wala’y nakaila

asa ang dalan. Diin ko

nasipyat og liko?

Kakusog sa hangin kuyog

sa gabawod nga abog, molumos

sa naghaguros nga dughan.

-- RYAN LABARDA

Riyadh, Saudi Arabia

season creep*

Gilayog nimo ang bag-ong nalunhaw nga sanga

atol sa kalit nga pagtumaw sa tingpamulak. Basin

sa tumang kagutom buot nimo tukbon ang adlaw.

Pasagdi ang akong pagtutok sa imong himbis kay

sama nimo gipaabot pod nako ang mga langgam.

Ayaw ko hangyoa nga mobiya. Dili ko mahadlok,

sama sa dahon, dihang gadiwalwal imong dila.

* hinay-hinay nga pag-usab sa gitas-on sa panahon nga

gituohang gumikan sa gitawag nga "climate change.”                                                                        
-- DENNIS S. SARMIENTO

Maryland, USA

tagpilaw

Kadako sa dag-om ilawom 

sa akong tabontabon diin kunohay

nagtigi si David ug si Goliath 

pagtirador sa tamsi diha 

sa abaga atong dakong bituon.

Naglabang-labang ra kuno ko
gikan sa buwan, Jupiter, ug Saturn
samtang gasunod-sunod nako
ang mga planeta hangtod milabay
ang baroto sa kawanangan
diin lulan si Neil Armstrong.

Gipangutana nako siya
kon asa siya padulong. Ay,
mangompra man kuno siya'g
agbati'g kamunggay sa Carbon.

Atot! Gatagbaw ang hinagubhob 
sa aircon diri sa among buhatan--

kalit nako namukaw! 

-- JONALYN ALMACIN

Nantes, France