gapnod

“Et dès lors, je me suis baigné dans le Poème

De la Mer,…” -- Le Bateau Ivre, Arthur Rimbaud

Inagak sa hangak sa hangin

gihandom ko ikaw

sa matag pitik

sa kasingkasing kong humod,

ang akong kamingaw

sa it-on mong kapintas

gitagbaw ko sa aghop nga hapuhap

sa lambungay sa balod.

-- VICENTE VIVENCIO BANDILLO                                                                                             Dhaka, Bangladesh

haiku: winter blues

bugnaw ang sanga

sa kahoy nga way bunga

danlog naugon

sa iyang dughan

nalambod ang punoan

nga lunlon sanga

-- DENNIS S. SARMIENTO                                                                                                     Baltimore County, Maryland, USA

sayaw sa mga apsara

Dali, tukara

ang hinay nga tunog sa sayaw

sa sinugdanan sa kalibotan,

ang hinay nga sayaw sa pagmugna,

ang inanayng pagturok sa liso,

sa dihang ang huyohoy motawag sa labing kaaghop sa mga panganod,

ang taligsik mopukaw sa balili sa iyang mga hapuhap,

ug ang mga kahoy mokinto sa pagbukhad sa mga tagokong putot

aron mamunga og dili ahat, tam-is, dugoson nga mga prutas,

ang plawta nga kawayan sinapnay sa hangin,

ang budyong mohunghong sa mga nota,

ang kuting-kuting sa sista maoy molatid sa kalawran.

Ikaw, tigtambol,

ayaw hampaka ang mga panit

sa hayop nga gilabni sa ilang unod,

ug bayolinista, pugngi ang pana, nga kon pasagdan, paspas

nga mobitad sa mga taknaan sa mga adlaw, sa mga katuigan.

Palihog ayaw tukara ang lagsik

bug-at ug tunob nga mga numero,

ayaw tintala ang Bathala

nga mosayaw sa sayaw sa pagkapukan.

-- ESTER TAPIA                                                                                                                          Kathmandu, Nepal

granada

Ang basiyo nga tibod

usa ka lawak

nangandoy sa suba.

Dugay na ang sagidlisan sa linaw,

ang arko sa bato.

Ang bino gadamgo

sa tilaok

sa wala’y kataposang disyerto.

Tawhanong liyok nag-alirong

sa taberna sa mga nagbakhong hitana, mapanas

basta magkaduol ang bugnaw

gikan sa amihanan—

"Asa na ang kandilaw sa pagtukaw sa mga nagbasol

ang kadaghanan nga nagyagubyob:

ang sinaguga nag-atubang

sa moske

likod

sa simbahan."

Pangutan-on nako siya

sa dili pa mawala ang kadiyot.

Nisulti siya

sa mga pagbihag

sa usa ka balakero--  

usa ka lalom nga langob

nga wala masangko sa kahayag.

-- SIMON ANTON NINO DIEGO BAENA                                                                                         Bais City, Negros Oriental, Philippines

nunot sa sulagma nga bunok sa buwan sa abril

Lagsik na usab ang gadaphag

nga kasagbotan. Nanuyhakaw na pod

og balik ang himatyon

ug saag nga kabulakan.

Sanag na usab ang mugtok

nga dagway ni inday,

nasubhan sa bunok nga midapya

sa iyang kalasangan.

-- RODELIO BARELLANO                                                                                                          Caloocan City, Philippines

uwan sa tingtugnaw

Ang wala-damha nga pag-abot sa uwan

gapakaaron-ingnon nga kadiyot ra

ang kasikas ibabaw sa akong gikuptang nipis

nga payong. Kining akong handomanan

sa una nakong pag-abot dinhi.

Tinuod baya ang ilang giingon: ang Bisdak

nga kontra ang aircon maanad ra gyod

sa tumang katugnaw tadlas sa magtagak-

tagak nga snow. Ug malingaw ra

sa cherry blossoms inig tingpamuwak

bisan mingawon kadiyot sa dagat sa Mactan

atol sa labihang alimuot sa ting-init, dayon ra’g

kahubog sa gapuwa nga mga dahon inig autumn.

Apan kining saksak-sinagol

sa panahon-- uwan sa winter ug ginagmay'ng

salibo sa snow sa miaging spring

manghod ra'g gamay sa akong gibati

dihang ang uyab nako kaniadto sulagma lang

ningsulod sa hunahuna. Abi nako'g patay na

apan kalit lang og pangumusta.

-- DANESSA ALINSUG                                                                                                              Bucheon, South Korea

hunlak nga hunasan

Gilumsan sa lawod ang kahayag sa bulan

samtang gadagan ang mga panganod--

nag-apas sa kon unsa pa ang iyang makab-ot

sa lapad nga wanang sa kalangitan

diin mga bituon daw balas nga nipuling 

sa akong mga mata hangtod

niawas ang akong kahaw-ang. Nahubsan,

pagkataas sa hunas ning akong dughan.

-- LESLIE S. NUÑEZ
                                                                                                                 Compostela, Cebu, Philippines                                

elihiya

dulom ang bulan sa iyang pagtaliwan

sama sa usa ka saad padayon sa pagkisdap

ang mga bituon walay pagkapalong  

ug padayong galagiting

sa iyang ulahing panaw samtang

nagmingaw ang dagat kay walay gabugtaw

og ambak-ambak diha sa pantalan

-- DON FERROLINO                                                                                                               Norzagaray, Bulacan, Philippines

linabay

nagkutkot ko og dakong buho

alang sa akong mga basura hangtod kini

malata ug malakip na sa gitabon nga yuta

diin nitubo pag-usab ang mga salibutbot

ug nag-agni pod sa wala pa makalimot

ug walay kutas nga nagmahal nako

sa pagtanom og mga rosas

-- RIC S. BASTASA
Katipunan, Zamboanga del Norte, Philippines

kitang duha

Sa gahuot natong lawak, gaungot pod

ang kahilom. Giduyogan niini

ang gabalik-balik nga kasuko

ug kasubo: ang sonata natong duha.

Wala nako kadumdom kon kanus-a kini

nagsugod. Karon, samtang gatuk-ong ko

kilid sa katre, padayon kang gahigda

nga gatalikod. Wa’y imik.

Apan unta wa’y sipyat pod gihapon

ang pagpaminaw ug pagbatyag

sa atong gatagubtob nga kahidlaw

bisan pa’g mao ra’g wala na nato mailhi

ang isig usa. Padayon lang gihapon

ang kabanha nga kita rang duha

ang makadungog. Dili baya malimtan

unsa’y mohupay sa gahuot natong dughan.

-- SUMMER DAFFODIL M. PAGUIA                                                                                        Cagayan de Oro City, Philippines