magbalantay sa laing damgo

Nahiluna ang iyang lawas didto 

sa nag-arkong syudad sa bangaw diin 

tulokibon ang takna. 

Gidalitan siya’g mga pulong 

nga nahiatlan sa kamatayon. 

Ang nangalanay’ng taknaan 

mga patay'ng lawas sa panumdoman-- 

Mikaging nga dugo sa handurawan. 

Mga planetang nangalubong sa dalan. 

Mga uniberso nga napormang 

buwak sa tanaman. 

Mga pasol nga wa’y paon 

nga nagkawankawan sa baba sa lawangitan. 

Mga hagdanang ginama sa tubig. 

Mga balaang sapa-sapa sa langit. 

Mga balak ni Baudelaire nga gitagik 

sa batong buhi sa nag-arkong bangaw. 

Ang tubig nga mao’y molanay sa nag-ugang 

tutonlan, ang uhaw nga balakero 

nga natanggong sa berano. 

Ang sili demonyo nga gipusa 

sa kinilaw sa purgaturyo. 

Ang balak nga wa’y tuno mga pulong 

nga naugdaw sa kalayo. 

Mga kamot nga way pulso. 

Mga lawas nga way ulo. 

Kinhason nga ginama sa patayng bituon. 

Buwak nga ginama sa kamatayon. 

Wanang nga itom lantawon. 

Panganod sa wa’y pagtuang nga uwan. 

Lantay nga bulawan. 

Mga lansang nga gabarog 

sa bungbong nga kawayan. 

Mga ngutngot nga samad. 

Mga pagkaong nangapan-os. 

Mga sininang gipangkitkit sa ilaga. 

Mga karaang sartin. 

Ang karaang lampaso. 

Ang karaang kurdiso. 

Ang kaban nga gisudlag ritaso. 

Ang karaang lawting. 

Ang panti nga nahabilin. 

Ang unlang gitumtom. 

Ang tayaong sanggot. 

Ang sundang nga dumpol. 

Ang amol nga hagbasay. 

Ang sartin nga pakan-anan sa iro. 

Ang tigmo sa hangin. 

Ang panamilit nga malipayon.

Ang balak nga gisuwat sa hakhak sa lubi. 

Ang mga dahong gidaoban. 

Ang pusporong gikulitog sa dunggan. 

Ang antiparang gradohan. 

Ang baldi nga gikawat sa silingan. 

Ang baril nga napuno sa kiti-kiti. 

Ang mga plato nga nanimaho pang sabon. 

Ang baso nga nanimaho pang bahal. 

Ang galon nga gisudlan og suka. 

Ang tangkal sa baboy. 

Ang taing nanga-uga. 

Ang kasilyas kilid sa tangkal sa manok. 

Ang sug-angan, ang sugbaan sa isda. 

Ang kaldero nga lung-aga'g saging ug kamote. 

 

Ang balay nga gipuy-an kaniadto sa balakero 

nga magbalantay sa laing damgo. 

-- LEONEL QUILLO 

Malalag, Davao del Sur, Philippines

ug unya mokiay ang dili makagay

Lahi baya kaayo ang nahimutangan nako

Karon. Hagip-ot apan pagkalayo sa maabot 

Latas sa lamat apan 

Wala baya ko makurat. 

Molawig ako hangtod ngadto 

Diin bungoton ra’y mobalak ug magtagay 

Binuntagay samtang magyawit nga halaran nila 

Ang yuta nga gilubngan sa ilang mga pusod. 

Ay, hinampak! Sa tinuod lang, di matukib 

Ang ilang kalimot— mga anino 

Nga ludhan ug huboan, mopugwat

Sa ilang kaligdong. 

Uy, mga ondong! Bahala na’g 

Maigking mo, paminawa ang bagting 

Sa akong baso. Hala, hangad mo! 

 

-- MALOU ALORRO 

Cebu City, Philippines

hagdanlog

Dili lang ang tanang hanglas sa tiil makadakin-as:

Ang likidong tanglas nga sa tilaok mokanaas, 

Mopalup-og bisan sa lig-ong mga tuhod 

Sa usa nga sa lumba'g dagan hawod--- 

Mopalaktod sa mga ang-ang sa hagdang habog.
Mopapusgay sa lubas nga mga bukog.

-- JON R. SAGUBAN 

Iligan City, Philippines

tokhang

Nipis ang hangin karong gabhiona. 

Sa imong pagtuktok sa pultahan, 

Naglumba–anay sab ang akong gininhawa 

Duyog sa gatinikling pitik niining dughan. Ug

Sa akong pag-abli, gikapkapan ko nimo’g 

Kalit. Gihuboan. “Ayaw na’g panlaban 

Aron di tika mapatay,” ana pa ka. 

 

Unya, gipagawas nimo ang imong 

Kuwarentay-singko, gidul–it sa 

Akong agtang. Ug samtang nagdahunog 

Ang agulo sa mga iro sa gawas, madungog sab 

Ang siyaok sa gakisi–kising katre duyog 

Sa akong pahipi nga danguyngoy. 

Gipahapa. Gipahayang. Gipaluhod...

Unya taud–taod, imo kong gipahangad 

Aron tutokan o di ba kaha ugomon 

Ang imong hinagiban. Galanog- 

Lanog. Giratratan ko nimo’g taman 

Hangtod di na mawaswasan sa luha 

Ang gakampat nga kaputi 

Sa akong nawong. Ug samtang nag-awas– 

 Awas ang imong katagbaw, nibanaw 

 Ang katungod kong magmangtas. 

 -- IVAN RIDGE ARBIZO 

Davao City, Philippines

pakigbisog ug pagpangga labaw sa pagkahagtak

Gisawo sa bawod 

ang mga lahing 

sukad nisayaw 

ang nag-inusara 

nga lubi dihang 

gilugos sa gahaguros 

nga katugnaw. 

 -- JEFF DEL ROSARIO 

Danao City, Cebu, Philippines

mga gintang

Hinaot inig dawat mo niining suwat, 

una mo basahon ang sulod ning hunahuna, 

mabati usa sa imong mga palad ang kainit 

sa singot kong giula sa mga panid samtang 

gipilo-pilo ko kining papel. 

Hinaot ingon niini usab kadali 

ang pagpilo-pilo sa halapad 

nga wanang, nagbuwag kanato.

Kon mapilo lang unta ang kayutaan, 

antosan ko sa pagbilar ang pagtuklod 

ug pagbira sa mga bungtod ug kalasangan, 

ug lukoton ko ang katubigang gadagayday 

sa mga busay ug kasapaan aron 

ugma sa pagsubang sa adlaw 

dungan tang madunggan ang pagpamukaw 

sa kalanggaman. 

 -- PAUL RANDY GUMANAO
Koronadal City, South Cotabato, Philippines

tigmo: “inig ka hunas, molawom; inig ka taob, momabaw”

Tubig sa banga! Tug-anan unta sa aso ug abog 

Sa gigun-ob nga kabungtoran ang mga dag-om. 

Taas pod unta’g maabtan ang kauhaw, ipalanog 

Sa mga bakwit. Paminaw, dili bakakon ang dugdog. 

Ang lunop sa pag-antos molapaw sa kahilom. 

Tubig sa banga, tug-anan unta sa aso ug abog 

Ang mga minero kon unsa ba gyo’y bili sa yamog; 

Ang mga sundalo kon unsa’y tambal sa urom. 

Taas pod unta’g maabtan ang kauhaw, ipalanog 

Lambos sa kabatoan diha sa busay nga gaduyog 

Sa mga singgit ug bakho, igong mopaitom-- 

Tubig sa banga. Tug-anan unta sa aso ug abog 

 

Ang kalanggaman asang dapita ba sila mobatog. 

Bisa’g ang nangliki nga umahan nagkalawom, 

Taas unta’g maabtan ang kauhaw, ipalanog 

Sa bung-aw diin naligid, nadam-ok ang mga bukog. 

Gawas sa kawanangan, dili pod ni makumkom: 

Tubig sa banga. Tug-anan unta ta sa aso’g abog; 

Taas pod unta’g maabtan ang kauhaw, ipalanog. 

 -- MICHAEL U. OBENIETA 

Topeka, Kansas, USA

sa balirong

Gisikop ang putpot 

Nga nipilit sa bunsod. 

Nangluod ang mga dangit 

Sa balirong. 

Gikoral ang akong dagat. 

Gitigom ko ang mga isda 

Apan pagawson nako sila 

Igtaob, ug manghinaot ko 

Nga mobalik sila 

Sa akong natad 

Inig hunas, mokisaw 

Sa ginagmay nakong lim-aw. 

Mopahipi sila pinundok 

Nga amatong, ug sila 

Dili nako tublihon. 

Pasagdan nako sila 

Nga magduwa-duwa hangtod 

Kapoyon sila ug mangahagba 

Sa akong balirong. 

Malipayon ang mga isda 

Bisan pa’g parat kanunay 

Akong dagat, bisan pa’g 

Dili bulawan 

Ang akong kabatoan. 

Sinagulan man og lapok 

Akong bunbon, sige lang-- 

Libre man pod ang kasilaw 

Sa akong adlaw, ug dili 

Maihap akong kabituonan. 

Naggilak akong gibati 

Sa matag tamak nga modalin-as 

Ning balirong 

Sa akong dughan. 

 -- JONALYN ALMACIN - GOURDON 

Nantes, France

balas ≠ bala

Sama niini kanunay 

ang ilang kahapunon. 

Kon ang adlaw padulong na 

mosalom sa kahilom 

sa mga balod, mohalok na 

usab sa baybayon 

ang mga tunob ni Lola 

ug Lolo. Dali sab ko 

madani sa huni nga agni

ni Lola. Ora-orada gyod 

mabuhian ang duwaang 

baruto. Gusto kong mokupot 

sa iyang kamot apan 

pirmi lang kining gaagak 

kang Lolo. Usahay 

magluha ilang mga mata. 

Makapuling daw

ang gisilhig nga balas 

sa hangin, ingon pa ni Lola. 

Dili ko motuo. Dili pa man 

andam motaghoy 

ang hangin. Basin dili 

balas kon dili bala 

sa karaang gyera 

ang sige lang gihapon og 

tapsing sa ilang mga mata. 

 -- DELORA SALES - SIMBAJON 

Butuan City, Agusan del Norte, Philippines

akong pamalihog sa atong panagkita

Utang buot sa imong pag-abot unya, 

Ayaw’g pasalipod sa mga hinalad 

nga rosas diha sa akong lamesa. 

Ayaw’g pun-i, ayaw baya paawasa 

ang katam-is sa tsokolate. Ayaw’g tago 

sa gigasa nimong mga garay sa balak. 

Busa, pamati. Dili ko kinahanglan 

ang imong pagtakoban. Dili unta tiaw 

ang panagsugat sa atong kalimutaw. 

 -- JESSABELE BENTAZAL 

Boljoon, Cebu, Philippines