xenophobia

Kon magkatapad kaha tang duha sa bus padu’ng sa Alegria,
basin diha pa sa Carcar, nanaog na ka. Andamon lang nako
ang usa ka libong pamaagi unsaon pagpanamilit.
Ako na lang, dong, ang mobiya. Dili ikaw.

Maayo pa ang mga kalsada nga di na nimo mabalikan,
mga kakahoyan, mga yamog— imo silang nahinumdoman,
wala ka’y kahadlok nila, nakat-on ka pagtipig nila. Karon,
sugdan ko og ihap kon ikapila na ni nako nga panamilit.

Tingali inig abot ini og libo, dili na tingali ka
mahadlok nako. Basin dili na.

-- CINDY VELASQUEZ

Cebu City, Philippines

pagsugod sa pornograpiya

unang linalang

minugna ni bathala

harding dalilang

hubong naniba

matintalong mansanas

adan ug eba

gipapahawa

sila gianinohan

sulondong yawa

-- MELQUIADITO M. ALLEGO, JR.

Palm Harbor, Florida, USA

ikaw nga nagbasa:

Duna ko'y pipila ka pangutana

mahitungod sa imong kaugalingon,

mahitungod sa imong kinabuhi,

mahitungod sa imong paghigugma.

Ug aron sab makiangayon

pangutan-on ko sab akong kaugalingon

sa susamang mga pangutana,

unya pangutan-on dayon tika 

    

nganong nalambigit man ta

labi na kon buot lang unta

hunahunaon natong duha

ako ra may nag-estorya?

sa pagkabangga ko sa 'bungbong' ni Craig Hill

-- IOANNES P. ARONG

Olango, Lapu-Lapu, Cebu, Philippines 

ang paghidangat sa takna

1

Ang ulan kanunay mahinumdon, ang panganod limtanon. Motadlas ang ulan sa kapid-an ka gabii nga kabilin sa usa ka adlaw. Wala ka didto bisan asa ka pangitaa.

2

Kon dili lang sila hilabtan ang mga panganod magpunsisok sa habagatan sa arko sa langit. Ang ulan manggihatagon, hutdanay, walay gipinig, walay gipalabi, and ulan sa batan-ong gitara.

3

Unsay akong ikahatag sa usa ka panganod? Unsay angay mong pangayoon gikan sa usa ka kumkom nga ulan?

4

Mga panganod nga walay timik, mga panganod nga hinimo sa tipaka sa gapnod ug bintana. Ulan nga giugom sa linaw nga walay pultahan diin nagpakaaron-ingnon akong nahimuot, gahangad sa umaabot, inanay nga nahanaw.

5

Panganod alang sa wala pa mahimugso, ulan alang sa mga patay. Luwan sa timbangan sa hangin ang damlag ug ang kagahapon nagtuwangtuwang samtang namasin akong makakaplag og sanag nga kabuntagon sa gianod mong buhok.

6

Panganod gilaay, ulan mahimayaon. Panganod nga wala hiilhi, ulan nga gilubong sa kalimot.

7

Gisakyan ko ang katulog sa usa ka panganod ug hinok nga mibiya sa gilumot nga kalibotan sa dihang sa tigming lipsaw sa gabii sa akong pag-awit nanglangoy ang mga binhi sa kayugot ug pagmahay daw mga kagaw sa ulan. Pasayloa ako, Kamahalan, gidawat ko ang hagit sa mga bituon. 


-- VICENTE VIVENCIO BANDILLO

Manila, Philippines 

ang panimaho sa abog

Akong nahanggap ang panimaho sa yuta.

Ang alisngaw sa bag-ong gidaro 

nga kamaisan. Ang alisbo sa abog

sa kalit nga pag-ulan.  Ang bungdo 

sa yuta didto sa daang kalubngan 

nga bag-o pang gitabon sa lungag 

nga gitunoran sa usa pa kanato nga mibiya. 

-- URIAS A. ALMAGRO
New Berlin, Wisconsin, USA

kinsa ba uroy nanumbaling?

Dihang giabot mo'g tuyo

ang mga likido nga nagmugna

sa kalag, nag-umol sa tawo

didto niadtong mangitngit

ug dangog nga kalibotan,

diin gugma lamang ang nagmando

aron ang usa ka linalang mahulma

sa gugma sa iyang pagtuyhakaw gikan

sa langob ug aron makasud-ong

sa Adlaw ug makasugod pagtadlas

sa mga adlaw? Ikaw lang, O,

ang bugtong tuboran sa kinabuhi!

-- JON R. SAGUBAN
Hollidaysburg, Pennsylvania, USA

aso sa suok

Aduna kuno'y tindahan sa eskina--

walay bintana, bungbong, ug pultahan.

Wala’y gipanghikyad apan palaliton

ang gipangbaligya, dugokon kaayo.

Usa ka adlaw dihang nilabay ko didto

nasakpan nako ang patigayon nga hilom,

ug kon ngano gyod nga gapasalipod sila

dutdot sa kilid sa naponder nga poste.

-- JIN GARCIANO

Camotes, Cebu, Philippines

panag-ing

Ang kasingkasing sa tawo kay

morag buhing atabay, dangpanan sa tanang

giuhaw ug gihidlaw.

Apan kon ang kasingkasing dili

katighaw sa kauhaw ug dili

kahupay sa kahidlaw

usa kini ka atabay

nga patay nga hikoganan sa tanang

linimbongan.

-- OMAR KHALID

Metro Manila, Philippines

isog nga hangin tadlas sa kansas

Wa’y sama ang pagsubay

sa kangitngit: ang pagnunot sa mga bituon

samtang gaabay sa isig daplin

ang isog nga hangin nga bagtok pa

sa panuhot.  Di masabtan

ang karatula gawas sa usa

nga gasaad og pagkapalid.

Sa Topeka, diha’y labaw pa

sa kape ang pagpukaw. Kuwang sa tulog

apan gapadayon, gapamasin nga dili na

mobalik ang pakyas nga

damgo: Kini nga panaw 

daklit ra. Sa sunod  balik, unta wala na’y 

hangin ug dili hangdon ang mga bituon.  

-- DENNIS S. SARMIENTO

Maryland, USA

pagtaob, pagtubod

Pagtaob

Malipayon nga higayon ang pagsaka sa tubig sa dagat

lukop ngadto sa baybayon alang sa mga nagkada-iyang’

mga mangisdaay: mamasolay, mamanaay, mamukotay, manudsoray.

Lakip na gani ang mamalakay.

Mas maayo kining panahon sa pagpanagat.

Apan, kinahanglang magbantay igdagsâ sa lawod didto sa hunasan

kay sarapon niini tanan niyang maabtan: ang mga lusay, lumot,

gapnod, mga basura og nagkalidadis nga mga hugaw

nga gibilin og gipanglabay didto sa baybay.

Dili diay angayang ikatingala kon ang sulod sa pukot, ug sa sudsud,     

o sa tumoy sa pasól, ug sa panâ—bisan pa gani ang agi sa pluma,

basura

Pagtubod

Gikan sa panahon sa pagpuga,

sama sa pagbomba sa gitay-an nga puso,

o kaha, pagkumot sa mga nang-igdal nga suso

sa babayen’g may gimatutô, bag-ong gihimugsô:

ang pagbuswak sa duga sa yuta.

                                               

May motulô daw natigom nga umog

gikan sa yamog sa kabuntagon.

Aduna’y kalit-kalit mosidlit

sama sa gitusdik nga gananâ nga bunol,

gasinaw, gauylap-uylap, gabutirik.

Anaa sa’y inanay modagayday

mora’g mga lusok sa luha ni inday nga

gikawatan og halok sa bilyakong ulitawo.

Hala, sa mga nalabyan og huwaw—

Matag tulô sawron ug daginuton,

dimdimon ang dalit sa higayon,

matag lad-ok magmapasalamaton

sa hupay sa kauhaw ug kahidlaw—

magtagbaw!

-- JOHN K. ZABALA

Baltimore, Maryland, USA