gugma sa kaugalingon

humot ang alisngaw

sa akong ilok

tam-is asgad pod

ang akong singot

kanunay kong mingawon

sa nabaklag nakong purol

ang kugang sa akong samad

nga akong gitangtang

sa ibabaw sa akong palad

lami kaayong lantawon

-- RIC S. BASTASA

Katipunan, Zamboanga del Norte, Philippines

pinisik nga daman gikan sa baybayon sa Tacloban

Dili mahawla ang tubig, galabyog tugbang sa banog nga dili mahinol ang gabawod nga kahangol. Usa ka lawod nga tigmo ang pagpangita sa mga gidagit sa baha. Gabalik-balik pagsakdap-bagnos ang mga panyo. Unsaon pagpapas sa lama sa aping? Nahabilin ang mga labhag sa pagpahid. Mga kuris-kuris sa uling nga giukit sa kabatoan sa kapin pito ka libo ug usa ka gatos nga kapupud-an. Mga hulagway nga gitagoan likay sa abog, gipalayo sa dilaab, apan gilamoy sa abohon nga dagat. Mga lapyahan nga nilapaw ug nadam-ok sa upat ka suok sa hangin. Aninawa ang pagkatugaw sa atabay, gapalanog sa usa ka bildong baso, dihang gibusdakan sa timba. Dayag gihapon--bisan wala'y itug-an ang nakaihi--nga dili matanggong ang daman. 

-- MICHAEL U. OBENIETA 

Topeka, Kansas, USA

usa ka sugilanon sa gugma

nagpabug-at

ang usa ka bunga

sa tambis

di mobuhi

ang sanga

samtang

naghangad

ang nagpaabot

nga sagbot.

-- GRATIAN PAUL R. TIDOR

Dipolog City, Philippines

hemicrania continua

kanunayng gabug-at

mosiak mopislat

labaw pa sa migraine

lupig ligsan sa train

hala ihayon na ang parakol

buk-a ning bombang bagolbagol!

-- MELQUIADITO M. ALLEGO

Fort Walton Beach, Florida, USA

duhiraw

Ganina, way timik imong pagbiya  

bitbit ang mga bug-at nga pulong

nga akong gihabwa 

sa atong talad kan-anan.  

Karon nga gihabolan atong lawak 

sa kamingaw, gabilin og panuhot 

ang pag-alindasay sa balik-

balik nga pagpaabot…

-- JONDY M. ARPILLEDA

Davao City, Philippines 

berbo: hubad sa balak ni Pablo Neruda

Akong gum-oson kining pulonga,

akong lubagon,

oo,

kay sobra ra ang kahamis,

daw ang dila sa usa ka dakung iro 

o ang tubig sa dakung sapa

mihinis niini

sa mga tuig ug mga katuigan.

Gusto kong hikit-an 

ang pagkakunot sa maong pulong,

ang daw puthaw’ng kaasgad,

ang way ngipong kusog

ning kalibotan,

ang dugo

niadtong mga misulti o niadtong mga wa mosulti. 

Gusto kong hikit-an ang kauhaw

sa sulod sa mga silaba:

gusto kong mohikap sa kalayo

sa iyang tunog:

gusto kong mabati ang kangitngit

sa singgit.  Gusto ko

ang kunot nga mga pulong

nga sama sa putli’ng mga bato.

Gihubad ni:

-- URIAS A. ALMAGRO

New Berlin, Wisconsin, USA

tiyo landa

dia na sad ning bayot ay, manaygon sa kalag-kalag.

udtong dako, tagaig piso para motihol. tagaig kwatro 

para mo sirko balentong. "lit-ag sa mga aninipot 

ang alimpulong gidalas dangan," matod pa ni bobby b.

si bobby ba! inyong silingang barberong taga siquijor 

nangluspad man to ganiha apan klaro na kaayo 

nga iya na sad nasayran ang mga butang umaabot.

sigon pa niya, diang mga signos: lamping may tina sa dugo,

ang mga hulmigas nagdasok sa balay sa putyukan 

daw niuk-ok nga panit sa bakukang. gibulhot sa bulhog 

nga bayookon hait ang silindron nga may kagis og patilya,

bug-at ang kamot sa way puangod nga nanilhig sa di oras,

di ikalipay nga wa pa ka nakakaog imported nga de lata,

ug di unta makusokuso ang mga butang nga way mantsa.

bitaw, may nang preparado kay sa magtuotuo. isirado lang

ang atong gamayng tindahan sa eskina, sa kadlawon 

nga maligsan sa mat-ang sirko ang nag-iyagak nga anay.

-- ERIK E. TUBAN

Alang-alang, Mandaue City, Philippines

taliwala sa lawod: gipaangay gikan sa balak ni Robert Bly

Tibuok adlaw ko ikawng gihigugma nunot sa hilanat nga nagkumbitay sa ikog sa kabayo. Miawas ako sa matag higayon nga kab-oton ko ikaw. Mitadlas ang akong kamot sa imong lawas nga liniminan sa sapot nga makapaksit sa kuyamoy sa mananap nga molatay sa mga dahon. Misibog ang unos mibukhad ang mga panganod midalipsay ang mga bidlisiw sa aping sa lawod kaliboan ka milya gikan sa baybayon.

-- VICENTE VIVENCIO BANDILLO

Manila, Philippines

tinuod nga kahayag

dayag kaayo 

nga abli ang pultahan

ania ang pagduha-duha

kon sugdan ko na ba

ang pagbiya

ang mga kamot sa

kahayag

nangamay kanako

ug ang pultahan

nagsayawsayaw

-- RIC S. BASTASA

Katipunan, Zamboanga del Norte, Philippines

tankatalagman: dito sa Tacloban ug uban pang mga dapit sa kasakit

1 

Dili maihap-- 

mga dahong napalid. 

Buta, nangapkap 

ang mga sanga dum-ok 

sa galutaw nga lapok. 

2 

Wala mokunhod,

ang mga lagong lakip 

sa mga ulod. 

Nigamot ang danguyngoy. 

Nadugta ang huyohoy. 

-- MICHAEL U. OBENIETA 

Topeka, Kansas, USA