alang kang humamai

Lakbit lang
ikaw niyukbo
sa langyaw
nga santos.
Gisalikway nimo
ang mga anito
ug mga diwata
nga nangluod
kay nagluib ka.

Takulahaw lang
ikaw niluhod
sa mga waling
naggikan sa
mga taas nga ilong,
panit nga luspad
ug mga pulong
nga daw agong
apan di masabtan.

Ikaw ang rayna
sa gingharian--
apan wala'y nisalig
sa babaylan
nga nakaangkon
sa dunggan
ni Humabon
o dili ba kaha
usab sa iyang dughan.

Kining ako--
hunghong sa hangin
hapak sa balod
aplod sa baba
damgo nga kabilin.


-- MARIA VICTORIA BELTRAN
Cebu City, Philippines

matod pa sa propesor nga wa mahimutang kabahin sa estudyanteng nagpakaron-ingnong clueless

Suwayan ko pag-isplikar
ang gugma pinaagi sa pisika:

imagina ang usa ka bidlisiw
nga nagsubay sa tul-id nga linya
dayon mokurba kini sa bira
sa lawas nga malabyan niini

kanang bidlisiw nga padulong dinhi
inig labay ana sa imong tungod
mokurba pod, apan daw mobilikis,
inanay nga mopinakatay sa imong ngalan.

-- NOEL S. VILLAFLOR

Mandaue City, Cebu, Philippines

laing adlaw

Kanunay katlan
ug wala’y panghinguko
ang kangitngit.

Ug ang tighabwa
sa mga lubong sa Carreta
manghilam-os gihapon
sa iyang pagmata matag
buntag ug manghunaw
sa dili pa mamahaw.

Uwat sa langit--
lawom nga kinawtan
sa kahayag.

-- MICHAEL U. OBENIETA

Topeka, Kansas, USA

ang sinugdanan ug kataposan

Ug magyamyam ang pari...

Ug ang balaanong tubig mohamog da
Kanako sa akong hubon...
Ah, mao kini--
Nganong gidigo mo ako?
Aron ba lamang paghumod sa mga lapok
Nga nagbulit sa mansanas
Ni Adan ug Eba?
Mao ba? (Mouha ug mouha ako).

Ug ako mogula sa simbahan
Nga may anino na---
(Iyang gisul-ob kini kanako).
Mosubay ako sa lamatnong ganoy
Sa kling-klang sa naghudyakang kampana
Kay nagpangamay na kanako
Ang mga kutay sa duyan
Nga buot mohaklap ug mosalimbong
Sa angheles kong lawas.

Ug ako mosulod sa simbahan
Nga wala nay anino---
(Ang akong kalag gihuboan Niya).
Moaginod ako tadlas sa mga danguyngoy
Sa mga kampanang nagdaghong
Kay gisuyop ug gisuyop king espirito
Sa "Ave Maria" sa nagtibing mga ngabil;
Ah, nagrosaryo ang mga lukong...
Ah, nangluhod ang mga kandila...

Oh, kasulaw ba sa Imong mga mata?
Mopiyong ug mopiyong ako
Kay buot kong kalawaton
Ang mangiob nga kangitngit sa dayon...
Ah, adiyos kaninyong tanan...
Ug king lapokong lawas (kay kalibotanon)
Ihalad na unya sa Altar sa Paghukom;
Mangyamog na upod ang balaanong tubig--

Ug magyamyam ang pari.

-- MELQUIADITO M. ALLEGO
Palm Harbor, Florida, USA

ang sibuyas

(hubad sa Iningles ni Stanislaw Barańczak ug Clare Cavanagh

sa orihinal nga Polish ni Wisława Szymborska)

Ang sibuyas, kanay talagsaon.
Wa kiniy ginhawaang habwaonon.
Way lain kon dili bug-os nga pagkasibuyas
Ang sulod sa lawas niining seryosong sibuyista.
Kasibuyasan sa ilawon,
Sulosibuyas kini tan-awon.
Nagtuman kini sa iyang pagkabalasusibuyas
Nga way ayuda sa tawhanong luha.

Ang atong panit salimbong lamang
Sa hilit nga dapit nga way mangahas
Pagsum-ok, and atong sulod-sulad,
Salawayong kalawasnon.
Sa sibuyas, ang gipuyos way lain kon dili sibuyas
Gikan sa kiting ngadto sa alimpulo,
Sinibuyasang kababoy-sibuyasan,
Binayabas nga lubasang hukas-hukas.

Malinawong kahiusahan,
Tinagoang kapahulayan.
Sa sulod, adunay mas gamay,
Susamang matang nga way natibhang.
Ang ikaduha naghupot sa ikatulo,
Ang ikatulo naghagkom sa ikaupat.
Mga tiholtihol nga giumol-umol,
Taghoy nga nagtuyok patidlom sa uyok.

Labing busyad nga tiyan sa kinaiyahan,
Labing sipa nga kadaogan,
Ang sibuyas naglimin sa kinaugalingong
Busilak sa kahimayaan.
Naghambin tag ugat, unod ug tambok,
Ug didto-diri duga nga pinuga sa utok.
Dili para nato ang hinanggaw ug higpit
Nga sibuyasnong kahingpit.

-- VICENTE VIVENCIO BANDILLO

Koror, Palau

sakto sa timpla

Pabukala

ang tubig, dayon

saguli og duha
ka kutsaritang kape

(kadtong lamian gikan
sa Latin America).
Buboi og gatas sa baka
(lamian kanang gikan
Alemanya), ayaw

kalimti ang asukar
nga gikan sa katubhan
sa laing planeta

dayon kutawa

hangtod ang bulok
anggid sa akong panit.
Mahimo usab usbon

ang timpla sigon

sa dila ninyong duha--
ingon ana kasayon
ang gugma.


-- MARIA VICTORIA BELTRAN
Cebu City, Philippines

kalinaw sa kagabhion

gatanday sa puti nga paa

gahapuhap sa hamis nga bitiis

gadampi sa bilahan
gapauray sa dughan
mga ngabil nga tagok

ug dayon nabati sa kagabhion
ang mga huni sa kahinanok

-- RIC S. BASTASA

Katipunan, Zamboanga del Norte, Philippines

suntokilat

Ikaduhang raw'n
Sa kalit ang kilat miratatat mikidlap
Nahagsa si Hatton mata misulirap

Duha ka matador nagharong nagpaugnat
Nag-andohay sa katulin kaisog kaigmat
Duha ka gladyetor nagtakos sa arena
Suliyaw kulbahinam stratehiya kamera

Midabodabo sa kalit ang walhong kilat
Pacman gabarog tighawak tabunong kaliwat
Ikaduhang raw'n.


--MELQUIADITO M. ALLEGO
Palm Harbor, Florida, USA

batang makililimos

Galaway, gapanglad-ok
Nga gasud-ong sa galamoy
Og humba sa karenderya.

Gipapahawa sa gwardya.
Gabunok ang uwan.

Gapasad ang mga mumho
Diha sa ilang tiilan.

Gahadyong ang mga langaw
Nga magtagbaw ra gihapon
Unya sa ilang lubong.


-- GENALYN G. OMAPAS
Cebu City, Philippines

abril

(hubad sa balak ni W. S. Merwin)

Miabot na usab ang Abril duyog sa unang kahayag nga miuliot
sa mga udlot nga nagbaguod sa yamog nga nagpahinumdom
sa mga kolor kon kinsa sila ang bag-ong rosa sa sinamon
ang buwagawng lumot sa kawayan ang nalandongan nga bronse
sa bitaog ug ang asul nga kabuntagon nga mibukhad
samtang nanaog diha kanila ang silaw sa adlaw sama sa pagbalik
sa kalag nga modat-ol apan wa mosaghid ug dili makatuo
nga ania na kini dinhi ug ania na usab ug nahigmata nagpangab-ot
sa kahilom ngadto sa bugnawng gininhawa sa hardin nga mao pay
pagbangon gikan sa kangitngit ug sa mga adlawng giulan
sulod sa usa ka gutlo nagtinawganay ang mga langgam
nga nanglupad lagbas niini unya nangawala uban sa pipila ka huni
ug ang kidlap sa ilang pagpanaw nga nahanaw sa wa pa mamatikdi
nagtan-aw tang wa mohikap niini ug ang atong kaugalingon
mao ray atong masultihan nga kini ang Abril kini ang kabuntagon
wa mahitabo sukad masukad ug nahinumdom kitang duha niini

-- VICENTE VIVENCIO BANDILLO

Koror, Palau

lutaw nga langit

Diin ang dilaab gapahawan sa kinalawman

nga kangitngit, dili ko mamilok. Natidlom na nako

ang lawod sa kauhaw. Natilok na pod nako lakip

ang gutom nga pagpahimulos sa katam-is gikan

sa ginhawaan sa nalumos. Dili ko maluwas

hangtod matukob nako ang bitin nga budlat

gaung-ong sa duha ka lungag sa akong kalimutaw.

Pasagdi kong mangtas mohasmag sa nagkadugo

nga mga mangingihaw sa Lorega. Himamata

ugma damlag: mga lakang nakong lutaw nunot

sa salamangka ug pista sa akong pagkabuta.

-- MICHAEL U. OBENIETA

Topeka, Kansas, USA

karaang plaka

Mituyok ang lingin
Nga plaka, gatuyok
Subay sa dagom
Sa kilumkilom. Dili ko

Kasabot sa mga pulong
Nga milanog ug mitusok
Sa kahinanok dinhi
Sa katri sulod
Sa siyam ka tuig
Ug unom ka bulan.
Habol nga gitugnaw
Sa kainit sa kalayo.
Unlan nga gibug-atan
Sa nahunlak nga balatian.
Muskiterong puti
Panalipod batok

Sa kauhaw sa lamok
Ug lawak nga nagbantay
Sa atong mga pulong
Nga napatik sa panit
Sa bungbong. Dili mapapas
Bisan unsaon pagkuskos
Kay sa matag tuyok

Sa plaka ang imong dagom
Gagitik sa atngal

Sa akong alimungaw,

Gawarla sa kalibog

Sa matag tukar

Sa karaang sonata.

-- MARIA VICTORIA BELTRAN

Cebu City, Philippines

epidemik

ang mga bunhok sa buhianan
ang mga bayros sa mga alad

nanglugsong
nanguyanap
nanghunob
nangyuhot
naniklo na pod

-- MELQUIADITO M. ALLEGO
Palm Harbor, Florida, USA

ang tinuod nga katahom

matuod nga maanyag
ang bulak nga naa'y
dagway nga dayag
andam ug dili motalaw
moatubang sa isog
nga kahayag sa adlaw


-- RIC S. BASTASA
Katipunan, Zamboanga del Norte, Philippines

haiku

Trak nga gidukot
Utnga ug inagulo
Apan way pag-irog

-- URIAS A. ALMAGRO
New Berlin, Wisconsin, USA

for sale

Kasingkasing sa balakerong daku. 92 bpm. Slightly used pero in good condition. May daghang garas sa gugma, apan kusog lang gihapon ma-in love. Dunay ipataban nga accessories: multi-tier defence mechanism system, ultrasonic superego booster, automatic self-denial lock system, hypochodriasis synthesizer kit, ug hi-fi inflatable humor. Negotiable ang presyo (ayaw intawn kaikog og hangyo). Free delivery kung dili hangakon. Kadtong interesado, palihug og e-mail: adonisdurado@gmail.com.


-- ADONIS G. DURADO
Bangkok, Thailand

panghupaw

namukaw ang bidlisiw sa adlaw
nga garbuso'ng midasdas sa mga liki
niining sirado ug gianay nga bintana

ang mga lugas sa abog nga salin sa gabii
nga budlay minggitik sa lawot nga aping
naghudyaka sa gabisbis nga luha

makabungog ang panghupaw
sa nangalisbo kong pag-inusara

-- GENALYN G. OMAPAS
Cebu City, Philippines

nasod nako

Talikdan ko ikaw aron tugyanan
sa kabilin nakong kahidlaw.

Bisan asa puniton ang gagilak nga kinatumyan
sa bangaw, kab-oton gihapon nako ug hupta’g
hugot ang tinigom nga mga sensiyo sa buta.
Gikan gapalimos sa simbahan sa Sto. Rosario,
gasagirit iyang sungkod, gaduslit sa mga abog
sa Sanciangco hangtod mahayagan siya’g kalit
sa kampat nga halok sa gilamok nga borikat.

Atubangon ko bisan mamikat ka
nga magdumili sa atong gilay-on.


-- MICHAEL U. OBENIETA
Topeka, Kansas, USA

alang sa isnatser nga gikulata

Gigukod ka
sa mga istambay sa dihang
nisiyagit og panabang ang babayeng mabdos

nga imong gilabnihan sa iyang

selpon nga de kamera.

Nadagma ka. Naabtan ka nila.
Ug ang imong lawas
gibagyo og mga kinumo.

Nakaluhod ka. Nitiyabaw
sa pangiyupo nga patuangon

ang ilang kasuko hangtod
ang imong ulo gadugdog
diha sa semento.

Giluwaan ka. Gibiyaan.
Gasuliyaw ang mga langaw
sa imong pagbuy-od. Sa pagbukhad

sa imong kamot, nabira pod nila
ang kataposan nimong gininhawa.

-- KEVIN A. LAGUNDA
Mandaue City, Cebu, Philippines

pag-ihap sa aninipot ug bitoon

“Floyd is a good character, it’s hard work but I hope he would just stop the poems….” -- Ricky Hatton, bahin sa iyang tigbansay nga si Floyd Mayweather Sr., Tempo, March 6, 2009

Dong Floyd, paminaw:
Sipiti usa nang imong balak, ayaw’g ipalagdas
Dugay nang nangamatay ang mga burokinto,
Ayaw intawn hasola! tingalig mangabanhaw.
Maayo unta kon himoon ka nilang manulonda diha
Sa paraisong nawagtang, unsaon nalang kon ila
Kang idayan-dayan sa impyerno.

Dryden, Swift, Shakespeare, Donne,
Milton, Johnson, Sidney, Addison.

Mangamig ang adlaw inig landong sa ilang anino.
Unya ang mga buhi naa nag-alirong, nagsud-ong,
Morag mga bagis andam mokuniskunis.
Mao nga ayaw gyod usa iplastar
Isulod usa sa malita, butangi’g kalburo
Unya patun-ogi inig abot sa Las Vegas
Hala, iladlad kanang mga libaong

Sa imong nawong.

Tan-awon nato di ba sila pul-an.
Kay lagi ikaw man ang gitugyanan
Tig-ihap sa mga aninipot ug bitoon.
Mao nga inig bagting sa kampana,
pagbukhad nalag banig
Kay sigurado sa tingog niining Bisayaa
Hatton mahinanok bisan way
Tabyogtabyog, di mag-agig duka:
“Para sa ‘yo ang laban na to…”


-- RODELIO BARELLANO
Caloocan City, Philippines