Sa dili pa ta magsabot, laomi nga wa ko'y laing
pangayoon gawas sa imong pagsalig.
Nagdamgo ka. Ug ako, nagyamyam og balak.
Pero dili kini balak nga manghayhay
og linuhaang panyo sa mga kutay sa kuryente.
Puyde kaha hinuon nga bertod kini sa tudlo
nga nagdangaw sa gilay-on sa anino ug hunghong,
kun metrosan nga nagsukod sa bahakhak
sa mga tanom ug danguyngoy sa huyuhoy.
Ambot kon manguhit ba kini nga kilat
kun molagubo nga dahunog sa dugdog.
Uyon pod ko nga mahitungod kini sa kaalam
sa mga baki samtang giharana nila ang gabii
atol sa pagpangambak sa mga lusok sa dag-om.
Wa kay laing buhaton gawas
sa pagpiyong kanunay sa imong mga mata
ug pahagokon ang kahilom kay sa damgo
man lang nimo madungog ang akong tingog.
Wa pod kay laing mahimo gawas
sa pagpaminaw, mouyon kun modumili ba kaha.
Ayaw na'g sulti; unya motubag nako.
Dili gihapon tang duha magkasinabot
kay nia ta sa kamatuorang di tika madungog.
Unahon nato ang mga alindanaw.
Nagbahasbahas sila asa ka mang dapita
karon sa imong paglatagawg pagduhiraw.
Dili na nimo sila sapayan pang dakpon
sanglit gawasnon man silang mobatog
kun motalidhay sa imong lumay.
Apan kuydawo tungod kay ang ilang pako
gidul-it na sa nagdilaab nga buwakaw
nga mangatagak unya sa imong kalimutaw.
Kon mopadayon pa kita'g pila ka tudling,
maabtan nimo ang panon sa mga aninipot
sa ilang panaw paingon sa dapit
diin naglantugi ang kahayag ug kangitngit.
Inig hangad nimo sa kapunawpunawan,
gitangag na sa bakunawa ang langit.
Ayaw'g hilak sa lagaak sa lipak.
Sunda kanunay ang nagdilaab nga lubot
sa aninipot hangtod mosangko ka sa palasyo
sa mga engkanto nimong pangandoy.
Mas maayo kon mohapit ta kadiyot
sa mga tanaman ug wa kay laing himoon
gawas sa pagtuo nga nia na kita sa hardin.
Atangi ang milagro sa pagpangudlot
ug pagpangatagak sa mga layang dahon.
Tan-awa ang nangiyugpos nga piyuros
hangtod sa pagpanggihay sa mga buwak
nga mibukhad sa imong katawag panghupaw.
Unya, sutaa kunog suway ang kalainan
nga nag-uwang kanato sa di-mabungat-
sa-pulong nga utlanan sa tingog ug kahilom.
Ikaw nga gihapyod sa pantasyag daman,
ug ako, nagtukaw aron hagbasan ang mohon
sa pagbuhi ug pag-angkon, aron subayon
ang mga gilatid nga badlis sa paghukom,
aron putlon ang mga giatang nga lit-ag
sa pamalak nga maoy hinungdan nganong
mahisagipot ang pulong sa kasilag.
Pero, unsa kahag baligtad ang atong kahimtang.
Ikaw ang gitahasan sa pagsubay ug pagkaplag
sa kahibulongan ug kamatuoran,
ug ako, tigpahinumdom lamang sa mga timaan.
Bukhon mo kaha ang imong mga mata?
Ikipat-kipat sa kahayag dayog timbakuwas
tungod kay ang pagbangon gikan sa paghikatulog
usa man sa mga dagway sa paglaom?
Kun di ba kaha, ingon niini: nagpiyong ka
apan kiyuom ang kamot nga nagkumkom sa damgo.
-- NOEL P. TUAZON
Dauis, Bohol, Philippines
