paghitagpilaw

O ang kanhing kinabuhi didto

niadtong gamay’ng balangay.

Human sa paniudto, miusap kami

og tilad ug nanabako og dahon sa lumboy.

Ang kalibotan wa'y kibo, ingon sa hungot

nga gitagayan og dawat nga tuba

ug nagpaabot nga dimdimon.

Usahay daklit nga molabay ang tunog

sa mga gangis ug ang hinay’ng kanaas

sa huyuhoy didto sa kawayanan.  

Ang agay-ay sa sapa daw huyo nga huni.

Misandig ako sa lantay ug unya nahitagpilaw.

Ug niadtong tungora akong gipangandoy

nga unta di ako mahigmata.

-- URIAS A. ALMAGRO

New Berlin, Wisconsin, USA   

sa gamayng' anghel nga nadagsa uban sa iyang life vest

Nunot sa imong kalibotan

Nga mitidlom, kining pagpangab-ot--

Pagsapnay.

-- GINA MANTUA-PANES

Cebu City, Philippines

studio

Nayawaan ang yawi kay gatuyok ang gaalirong 
nga mga ganghaan. Dinhi ning lawak sa pagtukaw,  
ang akong duha ka kamot usahay moanino 
og iro sa bungbong diin ang taknaan—bisan gitanggong
sa tornilyo—padayon sa iyang wa’y kutas nga kagiw 
gikan sa awaaw natong kaagi nga gihaklapan
sa wala’y kataposang tingtugnaw. Wala’y imik 
ang kalendaryo, ug ang de-kuryenteng dan-ag  
dili matugaw samtang gapadayag sa mga basahon
nga gahuwat ablihan. Dinhi ko matugka’g ikog nga 
labaw kahait sa sungay. Unya, bisan hinginlan pa nako
ang manulunda kong tigbantay nga naanad na
sa akong pagtalikod, ang mga tinipigang urom 
mao’y mopakugang nako sa pagdumdom sa langob-
agianan lapas sa kahilom. Dinhi mahayagan
ang mangtas nga makat-on na gyod paghilak 
samtang maglanog-lanog ang mga aw-aw og huni 
sa akong paglingkawas gikan gidunggab ko sa yawi.

-- MICHAEL U. OBENIETA
Topeka, Kansas, USA

daman

Nag-inusara ko'g barog

sa dapit nga wa hinganli.

Wala ko nakasuta  kon giunsa

nako'g abot niining suok 

sa kalibotan, apan nakit-an ko

ang kabituonan, nasapwan sa kahayag

sa gabilar nga dakbayan. Diri sa dapit 

nga wala hiilhi, naglatagaw ko latas

sa lasang hangtod napalgan ko

ang usa ka kahoy nga aduna'y bunga

nga ang bulok nihayag sa kangiob.

Gikatkat nako ang iyang kahabog

samtang ang mga butang sa akong bulsa:

flashdrive, iPhone, earphones, mp3 player, pitaka,

ug tanang sinsilyo nangatagak

ug nagpasad sa kangitngit. Inig abot ko

sa sanga, gilibotan ko'g mga kuwaknit,

gadutdot sa akong ulo ug dunggan

hangtod nahulog pod ko sa kadulom.

Napalgan ko ang akong kaugalingon

sa lungag, diin ang kagabhion

gapadayag sa mga bulalakaw, 

nanguhit sa kabituonan, ug nikatkat

hangtod nasaksihan ang nataran

nga napun-an og uban pang

lungag diin ang mga lapida

mora'g mga dila gahidlaw

og katagbawan. Nag-inusara ko'g barog

sa dapit nga wala ko'y kalibotan.

Nagbuhakhak ang kuwaknit

ug nagtingsi ang gabii samtang ako

naminaw sa mga yawyaw

sa nangapanaw. Apan unya, sa tanan 

nga nabatyagan ug sa ilang gipangsuliyaw

wala ko'y mahinumdoman.

-- TON DAPOSALA

Cagayan de Oro City, Philippines 

tungang gabii

Mahikap ang kahilom 

Diha sa mga kurtina

Nga wa tabyoga sa hangin,

Sa mga butang nga nahinanok 

Sa ilang nahimutngan,

Sa mga tiki

Nga daw gipangtapot lang

Sa bungbong ug alkuba.

Ning taknaa,

Wa’y laing gakisawkisaw--

Ang hunahuna

Ug ang orasan.  

-- GRATIAN PAUL R. TIDOR

Dipolog City, Philippines

talan-awon atol sa kamingaw

“We are half in the sky; the height of our situation

is almost incredible.”  -- Elizabeth Ann Seton

Gikatkat ko ang hangin.

Wa na’y umoy akong mga batiis

samtang gasubay sa dalan nga bakilid

ang padulngan. Gatakilid sab ang kampana

nga gakurog ang bagting. Kon unsa kahuyang

ang hangin nga mitabyog sa iyang gidak-on,

mao sab kapaspas sa akong pagpalandong

paingon sa kahilom. Init ang panganod.

Gapangamay ang kangitngit nga gatungko

ilawom sa kakahoyan. Higayon ko na karon

nga motago aron makita ko ang langit

nga gahuwat sa kilumkilom. Makaantos ko

sa  pag-inusara apan nidugok na ang mga lamok

ubay sa akong kamingaw. Kamingaw nga lahos pa 

sa tubod diin ang tubig nga natanggong gitutho 

sa bato nga anghel diha sa ibabaw sa sagidlisan.

Sa akong pagbiya, nagbilin ko og pangutana didto 

sa lim-aw:  Di ba kaha mopahiyom ang tigbantay 

inig dulhog ko gikan sa kakahoyan sa bukid

nga ang langit og kampana duol ra? 

-- DENNIS S. SARMIENTO

Baltimore County, Maryland, USA 

kon ako ang bakak

panananglitan ikaw ang matuod 

ug ako ang bakak

unya magkuyog ta sa usa ka panaw

sakay sa usa ka sakayan

motabok kita sa usa ka dakong lawod

nga walay anino sa panganod

nga walay timailhan nga naay 

laing isla nga kadunggoan

kita lang duha ug usa lang 

ang mabuhi ug motug-an ko nimo

nga ikaw gyod ang angay maluwas 

kay ako dili kasaligan

tuhoi na lang tawon ko sa kataposan

-- RIC S. BASTASA

Katipunan, Zamboanga del Norte, Philippines

tanang tinipigan

Sa dihang akong gihikyad
ang mga butang nga akong ibilin
ug ang angay bitbiton sa paglakaw,
wala nako tuyoa nga 
nasangit akong panan-aw 
sa gamayng' kahon 
ubos sa akong higdaanan. 

Buot unta nako kining kuhaon 
ug ablihan apan 
naunhan ko sa akong katalaw--  

basin unya sa akong pag-ukab, tagsa- 
tagsang mangambak ug 
mokuyog nako ang mga tipik
sa kaagi nga kinahanglan  
unta akong talikdan.  

-- JONDY M. ARPILLEDA
Davao City, Philippines 

gatakobang reinkarnasyon: minor cerebral infarction*

(kang Ricardo P. Baladjay)

  

    namenos natakilpo 

      ang naglakawng dugo 

        sa utok samtang gaorgasmo 

          ang surrealismong tugahala 

            ni puting dagang karong gabhiona 

              namanhod ang gumigitib liso sa tuong 

                kamot sa naghablong leyendang tambayawan 

  

                   pinulhoang reinkarnasyon ni vicente ranudo* 

  

________________________________________

* "an ischemic stroke resulting from a disturbance 

in the blood vessels supplying blood to the brain."

* usa sa iladong magbabalak sa Sugbo kaniadto

-- MELQUIADITO M. ALLEGO

Palm Harbor, Florida, USA 

kabilin

1.

Matag tuktok nato sa pultahan, 

nahibawo kita nga giapil pod nato'g kuot 

ang damgo sa mga nahinanok sulod niini.  

Gitugaw usab nato ang mga nagtukaw:

mahipugwat ang mga tiking naglambikis

sa kisame diin atong gibitay ang dagon;

maukay ang nagtagong ilaga sa karaang

kaban diin gitipigan nato ang mga baraha

ug libreto sa mga sukdan ug tambalan;

mahikurat ang nagtungok nga anino sa aparador

diin gitakod nato ang usa ka dakong samin:

nag-utlan sa mga katuohan ug di katuohan,

nagdugtong sa mga kutay sa laway 

nga hinimos mga kaka sa atong pangandoy,

nagtipig sa mga hinikling dalang gisubay

sa mga hulmigas, kabog ug duwende;  

ug manghuy-ab ang wugwog ug bakunawa.

Matag lubag nato sa siradora sa pagkaplag,

gilakip usab nato'g dughit sa panganod

ang mga ngalang gianod sa sulog ug balod:

Maria Cacao sakay sa iyang barkong 

bulawan nga nagtakoban sa langob sa Lantoy,

Dagohoy kansang sundang gihunghong

sa budyong nga nakapaukay sa mga prayle

ug piratang gilantaw tumoy sa gipanglumotan

nang balwarte sa atong lapyahan

nga gitukoran na karo'g videoke bar, spa

ug cottages sa pakaron-ingnog pamorikat;

Pedro Calungsod sa balabag sa Kuros Dako

nga nadakin-as lamang sa kada tutunlan

sa mga himantayo'g buyagan sa tubaan;

Tamblot nga nag-ugom sa gahom ug balak:

gitagik sa laag nga puti ug itom nga kabilaw, 

giuwang sa sigbin ug saag nga tambaluslos.

2.

Kon atong padayonon ang litaniya sa mga ngalan,

gahom ug kahibulongan, mahidagsa kita

sa kinadul-ang piliw sa gipang-iliw natong

kabilin o, di ba kaha, gustong kalimtan apan

namilit na sa bagulbagol nga handomanan.

Gidagsa sa hunasan ang nasunog nga anino

sa rebulto ug mikagiw ang mga anito.

Nanghupaw ang kataw dihang nanurok

sa isla ang mga higanteng katedral human

nagtagayg dugo'g dugos si Legaspi ug Sikatuna.

Gipatikag bendita ang agtang ni Humabon

ug gipanglugos ang mga diwatang naghamlis

nagkadaiyang takdol sa Kahilyawan 

maong giwarawara ang kampilan ni Lapulapu.

Halok ang bugtong sumpa sa gaba kon

mahagbong ang ubi sa Bo-ol. Ug hangtod karon, 

padayon gihapon ang ilad sa mga lumad.

Kay kinahanglan pa ba natong balihon ang senina

kon ugaling gilalo kita sa way dagway nga mino?

O itunob ang duha ka lapalapa sa abo

kon gilipat kita sa nagpangidhat nga kilat?

O mag-ihaw ug sabliga'g dugo sa ugis ang agtang

kon giilad kita sa mga gituohang tilimad-on?

O manguros kita'g agiw inig sulod sa balay

kon tibuok adlaw kitang nagtong-its sa haya?

O magpalina'g kamangyan nga gisagola'g

itlog sa tapaytapay, amorsiko, salag

sa tamsi aron suwertehon sa negosyo?

O magdagkot og kandelang itungtong 

sa bentana kon mohagtok ang Biyernes

nga mahiatol sa petsa trese sa kalendaryo?

O mag-andam og dose ka nagkalainlaing 

prutas, pabutha'g super lolo ang mga demonyo

kon molibkas nang orasan sa bag-ong siglo?

3.

Giukoy na sa mga bakukang ang giilok natong 

kahadlok inig daitol sa atong lakang sulod

sa lawak o lasang sa mga bathala.

Gidupa na sa mga tangang puwa'g ikog

ang utlanan sa milagro'g garbo lakip na

ang pangagho ni Madya-as ug tuaw ni Kulas

Kusgan ngadto sa layong Kanlaon.

Padayong gipas-an ni Dangaway ang kahayag

nga modan-ag unya sa atong kalimutaw

kon mosangko na kita sa paglatagaw

kay kanunay man gyod natong dangawon

ang gilay-on sa damgo ug gipaugdaw

sa kalayo ni Guguran ang Sumpoy 

o Suinuron natong kasilag kon mapakyas:

nasayod niina si Alunsina, bisan gani

ang mga engkanto'g ada sa Corella. 

4.

Inigpunit nato

sa mangatagak nga mga dagon, 

giapil pod nato'g hakgom ang inayran 

ug sagad nakalimtan kay gipalabi 

ang matilapan, masimhot, madungog, 

mahanduraw ug mahapyod.

Sama pananglit

sa  asoy sa ihalas nga suhong ilawom 

sa mga libgos ug uhong nga karon 

giilisan nag MP3, MTV ug youtube 

ang Dandansoy sa ilang hudyaka 

nalanay ang higyaw ni Kanaway.

Gihubad na karon

ang kalami sa aninikad, kinampay

ug balanghoy ngadto sa dayo

nga dila nga dunay gitaghoy nga recipe, 

gilanlan nga teyorya, panukiduki

sa alingagngag ug menu sa timpla.

Nangapuwak na

ang alimyon sa ilang-ilang ngadto

sa kinahiladmang garapa nga gihapnig

sa mga dagkong mall imbes

kurawon kining dugos sa nagbukal

nga kawa sa mga meriko sa langob.

Di na molabtik

ang hapuhap sa imahinasyong

nagluklok sa libro'g tanghaga

kay gadaylang na man sa atong

kalimutaw ang bulok ug eskrima

sa gilantaw natong hilas nga lilas.  

Atong gisalikway

ang mga lansiyang sa ilang dasok

nga punsisok batog sa mga sanga

sa akasya ug lukay sa lubi kay 

nalingla kita sa pamiga ug pangigat

sa Friendster, Facebook ug sa chatroom.

Wa na'y lumay 

ang lunok sa nahibilin tang bahakhak

kon awkon sa mga buwakaw

ang gabii sa nag-anagong anino

tungod kay giligaw naman ang atong 

kahingawa sa Hollywood ug soap opera.

Amang ang nigo

nga naghanduraw'g tahop human

ang unang subang sa pananggi

ug padayon ang banwag sa santilmo

sa mga gipanglubong nga kabilin:

gibalikosan na sa gamot ug kalimot.

5.  

Masiplit pa kaha ang tango 

nga gihabak ni Habagat 

kon nasangit sa kada 

nato ka kilay ang kapa 

ni Superman ug Batman?

Labing ngilngig kon kanunay

nga hugyoan sa paghot 

ni Scooby-doo

ang atong dunggan? 

Bisan gani ang alingagngag 

sa tambaluslos gibayan 

na ma'g kiyot sa langyaw 

nga panghupaw.

Unsa kaha'g hilam-osan 

ang namilit nga lapok  

sa atong aping ug ngabil. 

Tapokon nato'g balik 

ang kabhang nga binilin 

sa mga umang.

Hapyoron ang himbis 

sa galuno nga uhipan

libod ug baksan

nga nakalimtan lamang

kilid sa mga busay.

Kawsa'g tubig-atabay 

ang wa'y sulod nga tagyaw 

ug sigaan ang sug-ang 

sa kasingkasing.

Pagkahuman, silhigan nato'g 

abog ang hagdanan,

halingan ang mga layang 

dahon sa nataran,  

hilom nga sud-ongon 

ang mga aligatong 

ilupad sa huyuhoy.

Unya, gakson ang kilumkilom.

Hagkan ang kabugason.

-- NOEL P. TUAZON
Dauis, Bohol, Philippines

pagpangita og mga uhong

Kaniadto,

kon dunay liti sa ninglabay’ng gabii,

inig ka buntag mangita kami

og mga uhong. Kay gituhoan man

nga ang liti mao'y makapatubo

sa mga uhong. Ang pagsulat ko og balak 

mahimong akong ikatandi niini.

Kay kanako ang sinugdanan

kalit--daw usa ka liti 

nga mopatubo og mga metapora--

nga sama sa mga uhong

akong pangitaon.

-- URIAS A. ALMAGRO

New Berlin, Wisconsin, USA  

hubad sa tinagalog nga balak ni Einstein Mejaro

Dihang Usahay Gipangandoy Kong Mahimong Bawod

Nagtuk-ong ko sa baybayon ug gitutokan ko ikaw nga gapahiyom samtang gaduwa sa lahi-lahi nga paghulma, pag-abot, ug paghawa sa mga bawod. Gikan sa akong gilingkoran, buot unta nakong modagan ug duyogan ka sa imong gibuhat. Apan samtang padayon ko ikaw nga gitutokan, pugos kong nangindahay nga labing palabihon nakong mahanaw ug masagol sa mga bawod. Ang magpakabawod. Ang mapulpog tino sa kaugalingon ug mosulod sa mabulokon nimong kalibotan, usa ka kalibotan nga hangtod karon nagpabiling usa ka matahom nga katingalahan alang kanako.

-- JESSREL E. GILBUENA
Bantayan, Cebu, Philippines

hubad sa balak ni Bill Knott

Balak sa Buhok

Ang buhok maoy tubig sa langit nga katingalahang gadagayday ibabaw kanato

Mahitabo nga may babayeng ianod subay sa taas niyang buhok ug dili na igkita

-- VICENTE VIVENCIO BANDILLO

Manila, Philippines

bisan tawgon tang mananap luyo sa kalumo sa atong pagpanilap

1

Wa'y puol ang pag-iring-iring

kon dili kinahanglang mohangyo 

kon ganahan tang mag-iniro.

2

Pasagdi kong magbinaboy

samtang silaw pa sa perlas

ang tinipigan mong mangtas. 

3

Dili kutas ang paglinanggam

sa akong pag-agulo matag tugpa

sa imong dila sa akong gininhawa.

-- MICHAEL U. OBENIETA 

Topeka, Kansas, USA

talikdi ang tinalikdan

Lupi na ang mga tansan

sa San Miguel beer.

Sama sa pag-ihap

sa mga botelya nga natumba

mao sab ang kabasiyo

sa akong kauhaw.

Matod nimo: Pasagdi

ang panumdoman.

Bisan sa pagpanglabay

sa katuigan nga tin-aw unta 

sa kalinaw kon hikalimtan pa, 

balik-duaw ang mitaliwan

sama sa damgo.

Sakto ka! Maupaw ko

kon lukdoon ko gihapon

ang tataw nga pagdumili.

Di ko nalang iphon ang nanglabay.

Dili hapsay ang pagbalik 

sa tinalikdan. Gani, 

nayunyon na ang lubot sa buwan

og dayag na diha sa kahilom

nga aduna’y natuk-an 

sa banagbanag. 

Buntag na. Pasagdtan ta

nga habolan sa panganod

ang bugtong bituon.

-- DENNIS S. SARMIENTO

Maryland, USA 

despedida

(alang kang Samuel Isiah Cayetuna) 

Hinuon, dunay mga butang nga angay buhian.

Pati atong naandan masapawan lang gihapon

sa pagpadayon ta'g panaw sa tagsa-tagsa

natong padulngan. Ug igo lang ta mopasalamat

sa kaugalingon bisan kapila ta nangabikog

sa pagbaktas sa gipili natong dalan. Apan, syo,

sa tanang nanghitabo kanato, ayaw ko ingna

nga angay lang buhian ang mga gabii

sama niini diin magtapok ta sa lamisa

ug itipon ang kalipay, kalaay, kalagot,

ug kahasol sagol sa usa ka baso’ng ilimnon.

Ayaw ko ingna nga igo lang hikalimtan

ang matag pulong ningdaob sa atong dila,

kay kon molantaw ka balik sa mga naagihan

aduna po'y mga hagawhaw sa hinanduraw,

diin gapungko lang ta sa gawas sa balay,

diin ang hayag sa buwan anaa kanato,

diin saksi lamang ang kabituonan

sa atong hilisgotan nga wa'y paingnan.

Gikan sa pamilya padulong sa gugma,

gikan sa musika padulong sa siyensiya,

gikan sa tsiks padulong sa politiko—

oo, lupigan pa ang mga pilosopo kaniadto

pati’ng mga anguyngoy sa mga iro sa kanto.

Ayaw ko ingni nga igo lang iyabo

kining mga panumdoman diha sa gutter,

labinang lanog kaayo atong tingog

sa kabalayan diri sa Apovel Subdivision—

Kanang mga buhakhak nilang Juan ug Nono

nga gapakanaas sa mga kuwaknit,

kanang kalaki ni Sonix nga samokan pa

sa lamok diin iyang pikpikon

ang dagway ni Jopay nga nahapla

sa kasagbotan, kanang mga kanta

nga gisistahan ni Nunoy samtang si Kiko

nayabag sa pag-amping sa mga sa uk-ok,

ug kanang mga way pulos nga tambag ni Lukas

alyas “Doctor Love” kang Antonio nga nasakitan

kanunay sa gugma kay ang gugma kuno giatay.

Apan inigkadugay nakat-on ta ang gugma diay

di lang taman sa pamilya ug pinangga,

lakip pod ang mga tawong kanunay mosabay

sa mga gabii sama niini diin dayag ang mga bituon.

Busa para nako dili angay hikalimtan ang mga pulong

ug tingog. Bahala na kon sintonado ang pagkaskas

sa kuwerdas, basta pareha ra'g igo sa atong gipangtagay

sa kaniadto ug karon, kay kini tanan mogiya nato

balik sa atong bangkete. Ug sa dili pa ta mag-maoy,

dawata kining baso, syo. Imoha ning tagay!

-- TON DAPOSALA

Cagayan de Oro City, Philippines 

tambis

Gatuo ta nga patay na

ang punoan sa tambis

atubangan sa balay.

Sulod sa usa o duha ka tuig,

daw wa na kini matuboi'g dahon.

Nawad-an sab kini'g daghang mga sanga

ug gani mora'g punoan na lang

ang gapabilin niini-- usa ka haligi

nga may pipila ka lagpad nga dahon.

Hagbay ra pod kining wa bisitaa

sa nga langgam ug kwaknit.

Ug ang mga sulom dugay rang namakwit.

Dihang gidawat na nato

iyang kamatayon,

kalit tang gihagwa

sa iyang pulahong katam-is.

-- GRATIAN PAUL R. TIDOR

Dipolog City, Philippines

sibya mahitungod sa bagyo

Kini na tingali ang kataposan kong sibya. 

Naghaguros na ang unang buylo

sa bagyong Gloria sa kadahonan 

ug ang linagaak sa kawayan nagsulti'g tigmo 

nga lisod tubagon kon anus-a 

magsugod ang kabalaka nga ipalid unya 

uban sa mangalaras nga udlot ug salimuang,

kon unsang ngalan ug gidak-on sa santo

ang makapugong ning nag-ung-ong 

nga paghasi sa hangin ug kon duna pa ba'y

dapit nga kadaganan kon matumpag 

na ang tore ug mabuak ang lingganay

sa simbaha'g paglaom. Wa'y kasudlan

ang panghupaw kon molagom na ang langit,

kun way ibiling abo ang haganas sa panganod:

agiwon sa kilat ang ngalan ug anino. 

Bisan gani ang pagdumili sa tabili sa hakhak

kun ang tabikong sa mga hambubukag 

sa matag punoang gihubngan 

dili igo nga kalaki kon atubangon na nila 

ang paghukom sa tubig ug alimpulos. 

Maukay ang baha. Moutong ang suba.

Ug motiyabaw ang kanding inig ambak

sa langit, lipak, butong ug putot sa lubi:

maglagasak unya sa imong pagkahinanok.

Kon mokagiw na ang palid sa pultahan,

manglupad sa pikas kalsada ang bintana

ug, simbako, mahisukamod ang balay

sa lapok, kinsang bukton ang unahon nimo'g 

gunit aron dili dagiton sa liti ug kilat?

Kinsang palad ang ibukhad aron kumkomon

ang atong pagkahilukapa ug luha?

Ang nagdupa bang arkanghel sa kapilya?

Ang rebulto ba ni Rizal taliwa sa plasa?

Bungol ang kahilom sa imong danguyngoy

inig lagapak unya sa gitakdang pag-abot.

Buta ang kahayag sa imong pagkausdak.

Unsa kaha'g ingon niini ang pagsugat sa bagyo

ug sa mga di malikayang katalagman?

Kanunay natong bantingan ang mga haligi,

lansangan ang ukab sa upat ka bungbong,

ayoho'g bangan ang sagunting sa nipa,

dasagan ang gibukbok natong kaisog,

daigan ang pug-aw nga kandila sa altar,

trapohag pangaliyupo ang giagup-opang

sidsid sa Sagrada Pamilya lakip na 

ang way paglubad nga pahiyom sa Santo Niño, 

kagisan ang takuling sa kaha'g kaldero

ug halingan ang sug-ang sa dughan.

Kon sundon nimo ang akong gisulti, 

dali rang masuta ang hasmag sa alindasay.

Bisan pa'g dinha sa atong tugkaran ibulikat

ang mata sa bagyo, sama sa miaging Emong

nga mibali sa gikaintapang punoan sa dapdap

sa lapyahan ug panumdoman, 

lisod gyo'ng putlon ang banting sa pangandam.

Kini na ang kataposan kong sibya

ug gisugdan na'g uyog sa hangin ang tinipigan

tang kakulba. Pasensiya na, kinahanglan

pod nahong hugtan ang tanang luag

nga bangan sa banting, timbangan, pag-ampo.  

-- NOEL P. TUAZON
Dauis, Bohol, Philippines

sa tugkaran sa mansanitas

(Pagsubak sa mga lamingpotaheng balak nilang Vicente Vivencio Bandillo, 
Ric. S. Bastasa ug Gratian Paul R. Tidor)

didto sa tugkaran sa mansanitas
gayagaw mga langgam sa buntag
ambahang naniba waykakutas
mga pulahong atngal gitangag

sunoy ug himungaan namatog
gakos sa sanga sa kilumkilom
gahaguros ang mga kuyabog
sa takdol sa bulanong kahilom

haska gyod bayang tam-isa diay
kon tilawan ug tilapan ikaw
parat kun dugosnong kiay-kiay
gasugnib sa gasanting kandilaw

karon mangiti ko nimo gugma
bahalag mansanitas matumba!

-- MELQUIADITO M. ALLEGO

 Palm Harbor, Florida, USA   

pakigsalo sa panihapon

bisan pa'g milapas

na kita sa eskinita

bisan pag nawala ta 

og di na makatultol

kon asa ang paulian.

apan ayaw ka diha

duna pa gihapo'y

gamayng kahayag

sa unahan-- naa gihapon

ang nanagkot og kandila

naa pa gihapo'y abri

nga mga pultahan

naa pa gihapoy

makaila kanato

mopahiyom mangaghat

kon mahimo ba

nga ikasalo kita nila sa

ilang yanong panihapon

-- RIC S. BASTASA

Katipunan, Zamboanga del Norte, Philippines