karon nga sawumsom na

Ikadlit ko sa aping sa langit

Ang palito sa akong kasakit.

-- VICENTE VIVENCIO BANDILLO

Manila, Philippines 

tabliya

Bisa'g way batirol ug way buluniyo

ning bugnaw’ng kabuntagon 

sa tingtungnaw, nagluto ako

og tsokolati gikan sa tabliya 

nga hinimo sa lunlon nga cacao.

Tabliya nga wa dad-a nganhi kanako

sakay sa bulawanong barko 

ni Maria Cacao, kun dili pinalit 

didto sa Banhigan, Dalaguet

ug gidala ko nganhi sa Wisconsin.

Tsokolati kini nga lahi sa mapalit ko

sa Starbucks sa Highway 100.

Tsokolati nga gikan sa tabliya 

nga daw bahin sa pagpamalak 

among gipanagsultihan ni Mel, 

ang akong higaladagang, niadtong 

among panagkita sa Hollywood, 

Florida.  Unta human sa unom 

ka oras niyang pag-drive niadtong 

adlaw’ng tugnaw ug labing ulanon, 

sa iyang pag-abot, diha’y init 

nga tsokolati nga gikadalit ko 

kaniya.  Tsokolati nga sama niini - 

hinimo sa naandang tabliya nga 

gikan sa cacao nga didto magtubo 

sa yuta nga among gigikanan.

(kang Mel Allego)

-- URIAS A. ALMAGRO

New Berlin, Wisconsin, USA

karon ug sa takna sa paghimugso

Bangon bisa’g nadum-ok ka sa bilahan sa kagabhion. Bahala na

bisa’g talawan ang buwan nga gikalawat sa dag-om. Tultola

didto tadlas sa bungtod ang payag sa mananabang nga gituohang’  

giango-ango na, nahungihong nga hagbay rang nabungol. Ayaw

og lingi kon manitsit ang mga balili sumpay sa taghoy sa karaang

balete nga gabilar sa biniyaan nga sam-ang. Ayaw panumbalinga

ang pagkadugmok sa bukog sa mga kabog nga gikawhat sa linog

gikan ilawom sa imong dughan ug labaw pa sa dugdog nga mokabkab

sa dag-om. Basin baya intawon malumos ka sa kaugalingong laway

kon sa imong paminaw, duyog sa imong hangos, lupig pa’y gabunok

og mga baki nga molagubo sa mga atop ug bungbong. Intawon pod

ang mga uk-ok ug mga tiki nga wala maapil sa arka ni Noah. Lig-ona

ang imong tuhod tugbang sa layat sa galuhod latas sa kangitngit.

Isuksok sa imong dunggan, lupig pa’y habak, ang gaping-it nga

pamalikas lakip pakiluoy sa imong kapikas samtang nagpanikad

ilawom sa iyang pusod ang inyong unang liwat. Mahidangat ka ra  

unya sa imong tuyo: Wala damha. Hagbay ra nimong gahuwat.


-- MICHAEL U. OBENIETA

Topeka, Kansas, USA

mga haiku alang kang cuaresma tiempo

I

Pagpamalandong

o pagbalik sud-ong sa

lantay nga landong.

II

Semana Santa

hulaw sa duha ka 'ba':

binignit, Brocka.

III

Kinsa’y gilansang -

Simon? o Hesu Kristo?

Ay, balo lamang!

IV

Kalit ka’g sutoy--

nailad ka sa asoy.

Hudas, asa ka?

V

Ang pangutana:

Nganong 'byaan mo ako?

Ambot sa imo.

VI

Tuas’ Bantayan

nihabhab og inasal,

'tayas animal!

VII

Mantikas’ baba,

kagaw sa hunahuna--

dugsak sa kilid.

VIII

Tigi sa paa

gidid-an sa Simbahan--

itsahi’g bukog.

IX

Kinsa’y mas gwapo -

Hudas Barabas Hestas

Ponsyo Pilato?

X

Tsik ni Yo Pedro

gikamang ni bay Tomas,

lat-an og lamas.

XI

"APOSOL HASOL"

istaring: Pedro, Pablo

ug kinsa pa to?

XII

Ki, way barbekyu?

Wa! Kalayos impyerno,

sugbang bombero.

XIII

Ayaw pasamad.

Kon mo gawas ang pari,

di na mahunad.

XIV

Itlog nahanaw--

pasko sa pagkapabanhaw

Domingo Santo.

-- ERIK E. TUBAN

Mandaue City, Cebu, Philippines

el marso de abril: hulaw sa kuwaresma

Palihog kuyogi kining diwa ug alampat pagpaniktik-hagdaw
sa mga salag ug brothel sa kahilayan. Ang mga tubod ug busay
sa kaulag ug pagpatuyang nangauga.  Nagsingabot ang mga balak
nga mangiswid manggitib ug manuyhakaw sa mga dugoong lama
sa balabag nga giugbok sa bungtod sa pagbasol hatod-kawat
sa ermitanyong pagpanudya ug pag-inusara. Ang mga lilang sagbot
sa lakad tentasyon ug lunlon pagpasulabi nahimong mga bungot

sa nagatuaw, “Consummatum est!” Nan karon dungkala sa mga

bangkaw ang kilid sa paghinulsol lakip ang mga kaubang kawatan

makasasala. Matag Biyernes, unsaon tika pagpuasa

pagpangandam sa bunyag sa kabulakan inig Mayo?

-- MELQUIADITO M. ALLEGO

Palm Harbor, Florida, USA

fernweh

Ingon ko nimo: Naa ko’y sakit, ug unta

Makaadto ko bisan asa, basta halayo dinhi

diin natanggong ko. Buot kong makakita

og gilay-on. Nitan-aw lang ka nako. Ug dayon

adunay tiil ug kamot ang imong pagtutok. 

Gigunitan ko anang imong mga pilok. 

Gihawiran ko sa imong kalimutaw. Ug kalit  

ania nahiabot ko sa liboan ka mga dapit. 

-- CINDY VELASQUEZ

Cebu City, Philippines

kasadya sa kagabhion

hagip-ot nga dalan

daw dili maagian sa kangiob

danlog sa siyam na ka adlaw

nga pagbunok sa ulan

dili malilong ang pagsadya

sa uhaw nga buwan

--HAZELEN C. COBOL

Argao, Cebu, Philippines

yukbo: confirmation retreat sa sparks, maryland

Sama sa uhipan ang pagsubay nato diha

sa dalan nga nalumsan sa bunok.

Taliwa sa kamingaw sukad ta nahiabot

sa cabin, ug samtang gahuwat ta

sa tibuok-adlaw natong pagyukbo,

hinaot dili nimo sublion imong hunghong

kay basin madakin-as ko sa katugnaw diin

lunlon puti ra’y mosilaob sa akong mata.

Wala ko gihidlaw sa imong dagaang

kay adunay hayag nga gabuntaog likod

sa kakahoyan samtang gahuwat ko

motuang ang uwan: bunyag sa anino.

Kon motabok ko sa kangitngit, basin dugay

ang kanaas sa kalawoson nga mga dahon.

-- DENNIS S. SARMIENTO

Maryland, USA

taliwala sa kaguliyang

Nagbaha sa Pakistan,

Naglinog sa New Zealand,

Gihapak sa tsunami ang Japan,

Nagkagubot sa tunga-tungang Silangan,

Apan taliwala sa kaguliyang sa kanasoran,

Sa gamay nga eskina sa kasaysayan

Nga napatik sa basahon sa kamatuoran,

Gipahunong Niya ang unos sa kadagatan.

-- JON R. SAGUBAN

Iligan City, Philippines

dagom

Pagamay-gamay ka lang

apan lisora gunitan.

Lungag mo pagkalisod sudlan.

Panipis-nipis ka lang 

apan nituasik akong tudlo  

sa usa nimo ka tusdik.

-- JIN GARCIANO

Camotes, Cebu, Philippines

hagawhaw sa hangin

Gipakgang sa sakit ang akong biyahe

apan ang akong damgo mipaturatoy

paingon sa napagbang kasagbotan.

(gikan sa haiku ni Basho)

-- VICENTE VIVENCIO BANDILLO

Manila, Philippines 

nasaag ang kagang

Nakahil ang langit 
sa dihang gisugat 
ang adlaw sa gabii. 
Taliwala sa huni 
sa lapyahan ug hangin, 
milabay ang duha ka 
langgam, gatuwit-tuwit 
og sumo nga awit 
samtang gaduko lang ko, 
gabadlis bisan unsa sa ba’s. 
Milabay ang borikat 
ug ang iyang kaparis 
nga kagiron, nagkiatkiat 
sa akong atubangan. 


 -- TON DAPOSALA 
Cagayan de Oro City, Philippines

sugod sa semana santa

abo sa agtang

sayaw sa aso

gikan sa pabilo

nikamang ang adlaw gikan

sa lapokon nga kahinanok

diin gauwan og mga lansang

walay laing halad 

nga dawaton bugti 

sa kangitngit gawas sa piyong 

nga hagit sa paghangad

 -- MICHAEL U. OBENIETA

Topeka, Kansas, USA

ang hinog nga mga pulong

pagkadaghan sa akong mga pulong
nga nangumbitay sa akong dila
morag mga hinog nga bayabas
sa gamayng sanga niini

pagkatig-a sa akong baba
nga dili moabli busa wala koy masugid
wala koy mahalad alang kanimo

sa kaadlawon sa dihang ang mga lamok
nahupong na sa dugo sa akong mga bukton
sa oras nga masulub-on kon matagak ang
usa ka hinog nga bayabas
imoha na kana

wala'y mobadlong

-- RIC S. BASTASA

Katipunan, Zamboanga del Norte, Philippines

nganong magdugay ko sa glassware section

usa ka tanghaga 
ang kahilom sa naglaray nga 
mga baso kay kon matandog 
kini mokagay 


 -- JONA BRANZUELA BERING
Tuburan, Cebu, Philippines

romancing the rain

Adunay 
mga adlaw nga 
buot kong hinganlan 
ang pagduaw sa ulan. 
Ubos niining balisbisan 
mihabol ang kalibotan 
sa tanang kaanyag 
nga iyang matanyag.                                                                                                                                  
Usahay 
sa kapulihay 
buot ko lang 
unta siyang 
gakson ug tutokan 
sa hungawng ginhawa 
saysayan sa mga                                                                                                                                     
matinud-anong pulong 
nga sa hinanok dili na malitok.                                                                                                                
Sama sa: 
"Ang kasingkasing ko daw biyuos 
nga nagsud-ong sa imong tagaktak 
sama sa nibukhad nga mga bulak 
nagtinguha sa gugma sa Diyos."                                                                                                                  
o                                                                                                                                                          
"Ang suga niining atong gugma, 
nagpabiling buhing kahayag 
awhag nga dili tanang tubag 
gitangag sa hubag nga pangutana."

  
--ERIK E. TUBAN
Mandaue City, Cebu, Philippines

jet lag

nunot sa 22 ka oras nga pagkiyugpos

pagtikungkong pagminanok sandigtulog
tanggong sa aserong halwa
hala mag-iring-iring na kita sa haruhayng kama
apan pastilan unsaon ang buntag giminong hapon
ang adlaw nagtakobang gabii
nagkabaylo ang siklo ug ritmo
sa sawumsom ug banagbanag
nabali ang telon ug tabil sa kangitngit ug kahayag
poreso samtang ikaw nagtuwad gatutalimbang
mobalintong magpiyong na lang ako kanimo

-- MELQUIADITO M. ALLEGO
 Palm Harbor, Florida, US

linog ug ang kurog nga tingog pagtawag kuno ni Chona Mae

Matamboan ang kinatibuk-an sa dakbayan sama 

sa mga sulom nga tandogon, magkatibulaag.

Sigon sa hisgotanan ilaw’m sa buwan—nanghuy-ab

ang higante sulod sa bulkan,  ug gadaguok ang kahiladman.

Buot mokunsad sa iyang kapuol, naghulat nunot sa pagtakdol. 

Buwan sa Pebrero.  Sa iyang pakig-abyan sa planeta

gawelga ang kalibotan: Gikapoy nako’g tuyok balik-balik

wala ba mo malipong, buntag, udto hapon?

Mikidhat, mikatol ang uwat sa akong matag-tiki,

may talan-awon nga dili na mistil sutaon...

Walay misugyot pipila ka minuto gikan niadto  

kon dili ang pagsayaw sa akong lamesa,

ang paglumoy sa akong batiis ug tiil, 

ang pagtinikling sa akong bolpen.

Nagbilin ug lama ang kalipong, 

liki sa bag-ong tintal nga bungbong

ang anino sa kahadlok gahata-hata 

sa panganod nga gadag-om.

Gikan niadto ang batang si Chona Mae

nga gipangita kuno sa iyang amahan unta nakaplagan na.

Unta makahukom siya nga ilisan nalang iyang pangalan.

-- GENALYN G. OMAPAS

Cebu City, Philippines

sa pagtungtong nakog sayenta y says

Kon mangutana ka nako unsay gugma
Wala koy tinong ikatubag niana
Mas maayong itandi na lang nato
Pananglitan, sa kahoy sa acacia
Nga molungtad apan mamatay ra
Kon ibton ang gamot o kon linogon
Sama sab kayha sa langgam alimukon
Nga gawasnong makapaturatoy og lupad
Sa mga agianang masukod sa anad
Ug sama sab tingali sa iro kon gamay
Mangitag pagtagad sulod sa balay
Kon dako na bangis nga mopaghot
Ug mopaak sa banyagang kamot.

Apan wala ra kining tanang pagtandi
Kon ikaw nay akong atubangon gani
Ikaw, gugma, ang naghatag og hinungdan
Nganong molayat pag pitik kining dughan
Bisag hanap-hanap na ang panan-aw
Ug hinay-hinay na ang paminaw
Wa pay linog nga motumba sa acacia
O dakong banog nga moali sa alimukon
Ang iro molahutay gihapon og bantay
Samtang ikaw ikaw ug ako ako gihapon.

--ERLINDA K. ALBURO

Cebu City, Philippines

way kahayag sa langit

Unsay tua luyo sa kapunawpunawan

tadlas sa tanang planeta ug bituon,

sa igot-igot sa langit,

sa lugar nga di na makawhat

sa kuyamoy sa kahayag?

Tubaga ko...

Ayaw kog pasagdi dinhi

sa katugnaw, kahilom, kahaw-ang,

ug kangitngit sa akong balatian.

-- RODELIO BARELLANO

Caloocan City, Philippines