6.04.2015

kutay sa han-ay


ang kinamaayohan nga moburda
mao ang labing hilomon

pagkaanindot sa iyang mga buwak
nga gimugna sa iyang tanod
diha sa puting panapton

ang kinanindotan nga buwak 
sa panapton mao ang gabuswak
nga gaduhaduha pa 
sa kamatinud-anon sa adlaw

ang kinanindotan nga panapton 
mao ang nabordahan og buwak 
nga wala pa kaayo mobuswak 
ug nahawiran sa kamot nga kanunay
matuslokan sa dagom

ang labing maayo nga kahilom 
mao ang hapit na maburda diha 
sa puting panapton nga wala pa 
giluwa sa tilaok sa tanod 
nga gihuktan pa sa dagom


-- RIC S. BASTASA
Katipunan, Zamboanga del Norte, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.