Kadtong bakilid nga bukid
pulos kabatoan
labi na sa ting-init
way mais ni lagutmon nga motubo didto
pipila lang ka mga mugbong kahoy
ug madre de cacao.
May babaye nga walay dala
nga mikatkat
sa kilid sa dalan-dalan
nga morag usa ka nipis ug hanap nga lambo
ang iyang pula ug asul nga sayal papel de hapon
nga gikayab matag karon ug unya
inig huros sa hangin.
Sa iyang luyo
nagsunod ang bukogong bata
kansang mga gusok nag-ugdo
morag tusok nga kawayan.
Ang inahan ug anak misubay
sa gamayng agianan
sungsong sa bugwak sa hangin,
usa ka paresang tabanog sa tumoy sa nylon
nga gipalupad diha sa ngilit sa bungtod.
Ang dalan-dalan milipot sa luyo
diin gilamoy kini sa gutom nga mga panganod.
Apan hain man ang tigtabanog?
-- ESTER TAPIA
Kathmandu, Nepal
8 comments:
natandog ko.
Mao gyod ka, judge. Ganahan kaayo tandogon. Si Ms. Emma moagree ana. :-)
Para nako positive ang comment nga "natandog" para ning balak gikan sa usa ka karaang journal nga bag-o nakong nakit-an. Pero dili ko siguro kon husto ba ang "magtabanog" or ang "magtatabanog"...
Acceptable ra man nang "magtabanog" Ms. Est. Anyway, wala ma'y generic name anang magduwa'g tabanog. Pero kon akoa ning balak, ang gamiton nako kay "tigtabanog."
ha ha ha
samay maayog "tigtugpo sa tabanog"
o "manabugay"
tabanogero
bitaw , nindot ang balak.
migulok akong tiil, kadaganon paingon sa bukid sa malindang.
Salamat kaayo... husto ka tigtabanog tuod... ako ning gamiton ha? "Hain man ang Tigtabanog?" Mas fluid sa Sinebuano...Lisod ning wala tay kaestorya sa atong pinulongan ug dugay, (mga one and a half years na)...Nalimtan pa gyod nako ug dala ang akong dictionary...Salamat ug usab..
tabanogero... hi hi... morag balakero or balakera...
Okidoki, Ms. Est. With your permission, ilisan nako ang "magtabanog" ug himoong' "tigtabanog."
Ayo-ayo, hangtod sa sunod balak na pod.
Post a Comment