5.04.2012

archaeologist


Florence syndrome: mao ni ang akong nabati sa dihang nakakita ko nimo. Nangutana ka: alang nimo unsa ang sinugdanan? Buot kong molitok og kataposan. Apan galisod ko og tulltol sa akong buot ipasabot. Bisan lisod, gitubag kita. Nahilom ka. Gikuptan lang nimo ang akong kamot. Naay mga adlaw nga sama niini: kalit lang tipigan nimo ang imong kaugalingon sa akoa. Hangtod, dili nako kahibalo unsaon pagbisita sa imong kahilom. Mahuman ang adlaw nga wala ko kahibalo sa ngalan sa imong mga iro, sa pila na ka bungtod nga imong nakatkat, sa kon unsa ang  imong nabati sa unang higayon nakapalupad ka og tabanog , o sa kataposan nimong paghilak tungod sa gugma. Sa dihang magsugod nako og estorya, ug mangutana kanimo. Maihap lang gyod nako ang imong isulti: kuan, dili, mao, basin. Hangtod wala nako kasabot kung unsa ang kahilom alang kanimo. Di ka ganahan makig-estorya. Tungod ba kay naguol ka? Gikapoy ka? Naglagot ka? Imo kong gipabisita sa usa ka kalikopan, diin ang imong mga sugilanon nangalubong. Sama ko sa usa ka archaeologist, nagkawot sa mga pulong nga dili nimo masulti. Karon lang nako namatikdan, dugay-dugay naman diay kong nahigugma sa mga pala. Kung kanunay kong naa sa imong kiliran, pila ka mga pulong kaha ang imong makalimtan. Unsa kalawom sila? Unsaon kaha ni nako sila?  Tun-an? Dayon, ibalik ni nako nimo aron dili na nimo makalimtan. Lagi, dugay naman diay kong nahigugma sa mga pala, ug dili kanimo. Basin apil nako diri sa mga nangalubong, basin ba. Ug sa dihang magkita ta og balik, ug kuptan nimo ang akong kamot, dili ko mokupot, dili ko magtingog. Unsaon nato pagbalik sa sinugdanan? Unsaon nako paglitok sa kataposan? Basin ang tinuod nga gugma kinahanglan mamatay aron matinud-anon nga mabuhi. Ganahan ko mahibaw-an.


-- CINDY VELASQUEZ
Cebu City, Philippines

1 comment:

M said...

personality traits
of an archeologist
with beloved
with added
deeper meanings
well-crafted
cindy

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.