Hagbay ra ko nabag-ohan
sa imong kaldero. Nigamay, apan wala
nawala. Kaniadto, imong gihalad ang imong dughan
diha sa abuhan--
sakto kaayo pagkaluto
ang mais nga kan-on ug ang inun-onan
ug dili lata ang utan. Kaanindot
sa talan-awon diha sa akong bintana
samtang nagkahig ka sa mga abo
ug naghapnig sa mga upos nga sugnod
sama'g nagsudlay ka sa taas nga buhok
sa imong apo nga kamanghoran.
nga pagbalibad nimo sa tanyag sa akong inahan:
Hatdan na lang ka og pagkaon, Ma.
Hatdan na lang ka og pagkaon, Ma.
Karon, sa imong pagpunit sa igsusugnod,
ang imong dagway dayag ang gibug-aton
sa kamingaw ug sa imong lapoy
nga pagsuway og labyog sa garod
nga sundang tigbas sa kahoy.
Kon aduna pa la'y giandam si Lolo
nga mga binugha ilawom sa abuhan sama sa una,
dili unta hilaw ang nasukad
sa imong karaang lamesa.
Bantayan, Cebu, Philippines
No comments:
Post a Comment