kon ang ikog dili mobalikos sa liog

Aw-aw, uwang… Ambot kaha kon asa ug kanus-a 

mohunong kining atong pagpamati sa gaduhiraw 

nga kahaw-ang. Nangapkap ang hangin, nangutkot 

og dukot sa ting-init. Ang mga ilaga ra-- 

gikan gadumog pagtukob sa pangag 

nga iring-- ang nakadungog sa nabuak nga utnga 

sa mga umahan. Diin nikamang ang katugnaw 

gikan sa gibuldosir nga mga lubnganan. Diin ang mga lamok 

gaambit sa kauhaw sa palahubog nga naumod, 

nanghilam-os sa iyang dugo nga gabanlaw 

sa iyang sinuka dihang gibuno siya aron dili na magbalik- 

balik sa iyang pinakurog nga My Way. Diin wa'y kutas 

ang mga wali. Diin kanunay gisabawan 

ang atong atuli sa makalumos nga lilo sa mga taghoy 

ug tuktogaok sa buwangan hangtod sa matag 

piniliay. Diin ang mga abogon nga bangaw 

sa mga karatola ug kasilaw sa langit- 

langit nga semento, puthaw, ug bildo gapataas 

sa ilang anino tadlas sa gabawod ug gaalisngaw 

nga mga barongbarong. Sa usa ka atop, 

gipabug-atan og ligid nga kinawat, nanglungkab 

ang huyoyoy. Basin buot rang mohunghong 

og pahimatngon batok sa bakak nga giyamyam 

sa yamog, wala'y umoy bantang sa kasuwaw 

sa sidlakan. Pagbantay! Ayaw kahadlok 

kon sublion na pod sa atong gihangaran 

ang panglimugmog og mga kilat ug dugdog 

nga lupig pa ang mga kabayo nga gilatigo sa dila 

sa tig-asoy og mga lunop ug linog nga gasubli- 

subli sa mga bakho nga makabuktot. Ug kon 

puol na gyod ang pagdanguyngoy, tam-is ang tingsi 

sa bungi. Ayaw'g lingiw. Ayaw pod panghiwi 

lakip sa imong pangulihad batok sa mga mitalikod, 

mibiya sa gakumbitay nga lumbaanay sa mga kasag, 

ug misunod sa panon sa mga hulmigas. Tan-awa! 

Ilang gipas-an ang napaksit nga kubal 

sa manginginhas ug ang gilangaw nga paon sa mangingisda 

nga miunay paghikot sa iyang pukot sumpay 

sa iyang liog. Ayaw intawon pabawni og tunglo-- 

paghilom diha!-- kami nga gianod sa singot, sip-on, 

ug sunggo samtang gakawot sa bisan asang tuboran 

sa gatas ug dugos. Ug puslan man nga mapiskan ra 

gihapon ka, nia'y sanglitanan among ipalanog: 

Ang irong suroyan dali rang makatangag og bukog.


-- MICHAEL U. OBENIETA 

Topeka, Kansas, USA