ang kabit sa gamahay nga pulis ug nganong angay siyang manghagis

Ambot asa kutob ang bulhot

ug syaok sa ambulansya lapas sa pangpang

sa iyang urom. Ingon ini baya— 

lupyak ilawom sa tun-as 

nga taknaan— ang lawak 

sa mga nahabilin intawon. Gikan naligid 

ug nahulog sa awaaw nga higdaanan, 

gahayang ra siya sa sementadong sawog. Gabakilid 

ang buy-od sa kagabhion. Sa bungbong, 
daw giutgan ang gatikig nga tiki 
sa gilamina nga hulagway: ang kakusgan 
ni Ferdinand ug kaanyag ni Imelda. Kanus-a kaha

mohunong pagdahili sa iyang aping 

ang alisngaw sa dili-

matugkad nga kahaw-ang 

sukad nabuldosir 

ang iyang dughan? Dili sab kini matubag

sa mga nabyuda, 

sa mga nailo, 

sa mga ginikanan 

nga pabiling nangapkap kon asa gilabay 

ang ilang mga anak. Duhiraw ang bilar 

diha sa mga suok-suok subay sa walog lahos 

sa kabukogan. Gabok, gilinog

sa katugnaw. Gakalapok  

ang mga bakho kay mabaw na

ang lilo sa mga tiyabaw sukad 

sa panahon sa pagdagit. Ug karon,

ang pulis nga milamoy sa iyang pito ug 

mihigot sa iyang liog (aron dili na 

mokabkab sa iyang dunggan 

ang kahait sa nguyngoy nga pakiluoy,
gipahilom ra sa iyang pistola) igo ra

gaduko. Gabitay ang kalag, gamatyag 

ug gahuwat kanus-a mobangon

ang iyang hinigugma aron molamba 

sa purtahan ug mokatkat sa bintana hangtod sa atop,

magbundak-bundak sa ibabaw aron 

panimaslan ang pagluom. Dili papugong sa iyang 
layat nga panghasi aron mapugwat tanang 
padayong ganganga, gapiyong.  

-- MICHAEL U. OBENIETA 

Topeka, Kansas, USA