i
Tinuod baya. Bisan ang kabatoan humok rang papason
sa tingtaob. Dali ra gani tukbon sa kahinanok— dili
matidlom— ang sidlakan nga wala damha hagbay rang
nangapkap sa mga suok sa atong kapupod-an kon asa na
kadtong mga gitawag nga
"desaparecidos"…
Nalumos lagi sa sabaw. Matod pa sa gakagot nga tubag
Sa igo rang gipaangkan. Bulahan ra gihapon siya kay
lapad ang panaksan sa pasiaw nga usahay
sarang moyabo sa pangutana nga balik-
balikan sa iyang anak.
ii
Bakak, bakak, bakak…
Gabawod, galilo, gabugwak ang lanog sa mga baki
samtang ang dugdog, mga singgit, ug aso sa Plaza Miranda sayon
hulipan og mga yawit, hungihong, kulihad sa mga bungi samtang
lutaw ang kidhat sa mga bulhog, gabanlas sa ata nga
sip-on, dugo, ug luha…
iii
Tinuod baya. Gigaid sa daman, ang paghuyatid
lapas sa lawak samtang naminhod ang wanang nga
nagkalapok og muta. Busa, sublion nako pagbansay-
bansay unsaon pagsumpay sa laway gikan
sa mga tuktogaok. Ingon ini baya ang pag-angkon sa hait
nga silab sa pagdumdom. Sayon ra baya tang balik-
balikan sa kagabhion. Dili ra ba maabo, pwera buyag,
ang mga anino! Pastilan, dali ra bitaw tang lup-ogon
diha sa langob luyo sa atong tabon-tabon. Dali rang
suyopon sa huyonghuyong
ang atong mga tiil hangtod ang atong buhok mopalugway
sa mga kuyamoy sa lumot. Modayon ra baya ni’g lapaw
bisan sa mga sementadong lubnganan, dali rang mokamang,
mopadalin-as sa kabatoan ug pangpang
ilawom sa atong bagul-bagol. Humok baya intawon
ang pamaagi sa pagkabungol, ug sayon ra pod ipalanog
ang sitsit sa pagkabuta. Na hala, manghilam-os ta’g
lawod! Tuktokon dayon nato ang isig usa ka agtang. Panguros
kay kapyotan ug pasutoyon nato ang nalit-ag
sa lubog: ang kugita sa atong kahigmata.
-- MICHAEL U. OBENIETA
Topeka, Kansas, USA
No comments:
Post a Comment