pahinumdom sa kumpari nakong gikupsan og paglaom

“… but it’s your solemn duty/ to live one more day/ to spite the enemy…” 

-- Nâzim Hikmet, Some Advice to Those Who Will Serve Time in Prison 

Ugma damlag, bisa’g natanggong ug gakagot intawon

ang lagos samtang nalup-og ka karon—pwera buyag!— 

ilawom sa sayal sa urom, tuhoi nga tuhikon ra unya 

ang imong tabon-tabon. Ginhawa’g taman sa panuhot. 

Bisa’g maabta’g pista ang tingbitay sa iro, hinaot unta

makat-on ra unya ka unsaon pagtagbaw og paghot. 

Bahala’g mobarag samtang tagaliog ang kulihad 

sa kilat ug sinuka sa dugdog. Pastilan, paanod lang 

hangtod hangopon ka sa gawara-warang sangpit-

pagdapit sa silingang gasarasay, gasapnay og 

bihag gikan sa buwangan. Kalami itaghoy kon 

molutaw unya sa sabaw ang dila, molapwa sa tanang 

kahiubos. Na hala, bahala’g maghalhal ka pagtultol 

sa naanod nga mga baso, panaksan, plato, ug kaldero  

sukad gapadagit sa langyaw si kumari. Sagdi lang pod 

kon igo ra kang gituwaran sa imong gipangbotaran 

nga kasaligan ra’g surambaw. Kaayong itunglo

o ipa-Tulfo sa tanang gatamay ug gatratar nimong 

pisot, pesteng yawa! Tunla lang ang imong pagbakho 

hangtod manug-ab ka’g pamalikas nga sarang untang 

mowataswatas sa makabikog nga katugnaw balikos 

sa imong liog. Madawat ra nga dili ka palaran kon 

kutob na lang intawon ka sa pagtikungkong— dili na 

mopatalinghog sa mga tuktogaok tugbang anang 

gautog nga kasuwaw, gabansiwag lahos sa buslotong 

bungbong ug atop. Panghilam-os. Ang alaot kana rang 

dili na barogan ang pagtutok sa gawasnon nga lapok— 

gadahili kay gihagit sa gaasong panimalos sa imong ihi. 

-- MICHAEL U. OBENIETA 

Topeka, Kansas, USA