sa tungatunga sa ilong ug baba

Gibirigan sa engkanto,

mao kuno ang sagad nga hinungdan. 

Gida'a sa mga di ingon nato 

nga matod pa wa’y kanal 

tungatunga sa ilong ug baba. 

Gitanggong sa Biringan diin 

palasyo ang mga balay;

ang mga bungbong bulawan

ang mga pinggan dyamantehan. 

Mga huni sa langgam, 

mga nanagduwang alindanaw 

ug mga kuneho ubos sa kakahoyan, 

mga prutas nga makab-ot 

sa kadaghan, mga pagkaon 

nga di ikapangagda tan-awon--

tanan ihatag sa kinabig nga bisita. 

Samtang sa baryo'ng gibiyaan, 

tungatunga sa nataran, 

ang haya gipistahan og adobo 

ug litson gikan sa kwartan'g inutang, 

iyawat mogaan ang mga bato 

sa dughan. Ang lawas sa lungon 

bani sa saging nga binaylo 

sa tinuod nga lawas sa binihag. 

Makauli ra kini kon sa katab-ang 

magdumili sa pagkao'ng gidalit. 

Apan hangtod karon 

nagpabilin ang pangutana 

diha sa kamatuoran nga wala 

gayod kanila nga nawagtang 

ang nakabalik sa mga buhi 

gikan sa mga nilalang nga 

diha da nagpuyo sa dapit tunga-

tunga sa ilong ug sa baba. 

-- JOHN BITON 

Rome, Italy