mga sanga sa atong sinegwelas

Sukmatan mo ba diay ako
kung manguhit na sab nimo
kanang mga sanga sa sinegwelas
diin kita gayampungad
kaniadto?


-- GINA MANTUA-PANES

Cebu City, Philippines

handomanan sa umaabot

Ang adlaw matun-as ug dayon
Mangatagak ang mga lusok sa kangitngit

Pugngan ko ang akong ginhawa aron
Mabati ko ang imong mga tunob

Inig-abot sa kabuntagon
Sa hataas nga gabii sa kinaunhang ulan

Babayeng nagdanguyngoy
Duyog sa nga gangis sa kilumkilom

Ikahibalag ko kaha ikaw pag-usab
Ubos sa nag-arkong mga hardin

Sa gahob nga siyudad human molabay
Ang di-maihap nga kaliwatan


-- VICENTE VIVENCIO BANDILLO
Dubai, United Arab Emirates

sa akong damgo

Didto sa paraiso
walay makililimos ug tiyan

sama kakutoy sa dughan--

ang tanan nagsul-ob og sinina

nga bag-o gikan sa mananahi
nga misteryoso.

Didto sa paraiso
walay mga tikasan
sama anang mga politiko.

Didto sa paraiso
ang mga katawhan
gahigugmaay pag-ayo,

ug ang pangabubho

wa'y luna paghigmata nako

gikan sa akong damgo.


-- MARIA VICTORIA BELTRAN
Cebu City, Philippines

happy new year!

Suma pa sa mga Intsik:
kinahanglan daghan lingin alon daghan

glasya sud bag-ong tuig.

Payts na tingali ni ako:
lingin ang mga kalimutaw
sa akong walo ka mga anak,
nagsiga kay wap-ay panihapon
karong usa na lang ka oras
ang nagbitay una maputol
ang gininhawa niining tuiga.
Lingin ang bola nga napunitan
ni Dado didto sa basurahan
kilid sa banko nga daghag tawo
nga isig widro. Lingin akong
handuraw nga nagsigeg tuyok
sa palibot bisag naay putos
nga Jollibee o McDo. Lingin sad
ang mga tiyan sa akong
mga anak nga klarong gibitok.
Lingin sad ang tayls diri
sa skaywok sa Robinsons.
Ako sad, lingin ang tiyan,
nagpaabot sa akong ikasiyam.

-- JONA BRANZUELA BERING

Tuburan, Cebu, Philippines

butod sa deboto

Gi-asinan niya ug gisabwan
sa singot sa iyang kagutom
ang gadukot niyang kangitngit.
Gikumkom ang tinulo gikan
sa gihalad nga kainit hangtod
nahurot niya’g higop ang aso
sa mga kandila lakip ang laway
sa mga utitod. Ulipon niya
bisan ang mga higante sukad
hingpit ang katam-is nakaplag
dihang nakaluhod pagpupho
og mga mumho sa kahayag.


-- MICHAEL U. OBENIETA
Topeka, Kansas, USA

salumsom

What does the bobwhite mean? I don’t know
Yet, but I have
A pretty good twilight.
-- James Wright

Ang mga gutlo nangiyugpos
Sama sa gitukbil nga mga dahon
Sa mimosa. Dali, panahon na
Nga kita mamauli.
Didto sa taliwala
Niadtong way timik nga wanang
Sa kabalilihan,
Ang usa ka squirrel nagbarog,
Nagkupot sa napulot niyang bunga,
Ug nag-usap
Sa kaugalingon niyang bersyon
Sa reyalidad.

Talan-awon
Nga buot kong ipintal
Dinhi
Sa bungbong ning akong hunahuna.

Sa kilid sa daang koral,
Ang lalag nga mga bulak
Sa mga sunflower
Nanagdungo.
Daw nagpalandong
Sa ilang kapakyas
Paghawid
Sa adlaw
Nga naligid na
Didto sa kasadpang ngilit
Ning atong kalibotan.

Ang tanan
Nagkawing sa lanot
Sa kahilom.

Samtang ang salumsom
Nagpadayon
Sa hinay niyang pagbaktas.
Ug ang laya’ng mga dahon
Nga nanagpasad
Ibabaw sa uga’ng mga balili
Nangahilom--
Nagpaabot
Sa pagdapat
Sa iyang mga tunob.

-- URIAS A. ALMAGRO
New Berlin, Wisconsin, USA

ang halangdon nga kritiko

Dili ka nako mabasol kay ako ang nag-aghat nimo
pagdayon sa akong balay karong adlawa ug sa umaabot pa.
Ari, saka sa akong hagdan nga karaan
nga wala pa gyod malampasohi ang mga ang-ang.

Palihog og tan-aw sa iyang mga hawiranan.
Kinahanglan pa bang silakan o pintalan ba hinuon?

Dali saka sa akong sala, ug palihog pahimutang
sa akong mga lingkoranan nga ginama sa mga kawayan
nga gipaslotan ang batakan sa mga gabaga nga puthaw
aron ipatik ang ilhanan: ang akong ngalan.

Mangadto ta sa akong katulganan
sa katre nga tugas nga akong sinunod sa akong mga ginikanan.
Dunay mga tinagoan nakong mga gilumotan sa tumang kadaan.
Patay na ang mga isda sa gamay nakong aquarium,
ug ang mga suga sa kilid nangaponder na.
Wala ko’y plano nga alisdan kay ganahan ko sa dulom.

Mangadto nya ta sa akong talad kan-anan.
Wala’y basiyo sa beer o Tanduay, apan daghang garapa
sa mga tambal nga wala nay mga sulod.
Ang mga resita sa doktor gihapnig sa kilid sa lamesa
diin anaa ang akong antipara.

Dinhi niining lugara masilip mo ang akong gamay kaayo
nga kusina, ug sa kilid naa ang akong kasilyas. Ayaw katingala
nganong busloton ang atop. Kay kon ako malibang,
maglantaw dayon ko sa mga nanglabay nga mga bituon.

Dali dayon ta sa akong veranda.
Sultihi ko samtang manglingkod ta.
Unsa ba ang imong nakita?

Dili puti ang sanina sa akong mga damgo.
Dili pod itom, dili hapsay ang mga sidsid sa akong mga saad.
Dili sab hinoon kaayo kum-ot, wala nay kwelyo
ang akong mga paglaom.
Dili na long pants ang akong mga pangandoy.
Wala na ang singsing og kwentas sa akong ambisyon.
Mibaga ang antipara sa akong mga pangutana,
ug nawala ang mga butones sa akong mga tubag
nga unta mohulip sa nagnganga nakong mga ohales.

Kon mobiya ka na niining akong balay nga karaan,
sultihi silang tanan sa mga hagdan nga dili na sinaw,
sa mga haligi nga nangaharag,
sa mga bungbong nga nangabuslot,
sa mga bintana, pultahan ug atop
nga kanunay gilamba ug giabrihan sa bagyo.

Sultihi sila nga ako wala nay plano sa pagpaayo aning balaya
kay sama kanimo ako mobiya na usab
kuyog sa akong laing mga plano.

Ang magpabilin dinhi mao lamang ang mga maot,
ang mga buang ug ang mga walay buot.


-- RIC S. BASTASA
Katipunan, Zamboanga del Norte, Philippines

ang bato way tag-iya

(hubad sa Iningles ni Russell Edson)

Dihay tawo nga mibanhig sa usa ka bato. Iya ning gidakop. Gihimong piniriso. Gibalhog sa usa ka ngitngit nga lawak ug gibantayan sa tibuok niyang kinabuhi.

Nangutana ang iyang inahan ngano.

Ingon niya, tungod kay kini dinakpan, tungod kay kini nasikop.

Hunahunaa ra god, ang bato natulog, matod pa sa inahan, wa kini masayod kon anaa ba siya sa usa ka hardin o wala. Ang kahangtoran ug ang bato morag inahan ug anak, ug ikaw ang natigulang. Ang bato natulog lang.

Apan nadakpan nako ni, Nay, ako ni siyang nabuntog, niya pa.

Way makapanag-iyag bato, bisan gani ang bato mismo. Ikaw mao ang nabuntog; nagbantay ka sa piniriso, nga mao ang imong kaugalingon, tungod kay mahadlok kang mogawas.

Oo, nahadlok ko, tungod kay sukad masukad wa man ko nimo higugmaa, niya pa.

Sakto ka, tungod kay ang pag-ila ko kanimo susama sa pag-ila mo sa bato, matod pa sa inahan.

-- VICENTE VIVENCIO BANDILLO

Dubai, United Arab Emirates

alang sa usa ka manunulat

Tinuod
mosulat ko
kabahin kanako.
Kay si kinsa man diay
ang lain nakong nailhan
sa tunhay?

Asa pa man ko
moani og humay
mopunit sa mumho?
Unsay lain

nga makit-an sa lumoy

kong kasingkasing
ug niining gitay-an
kong atay?
Kinsa may nagpuyo
dinhi ning kahiladman
sulod niining kapin

sa kwarenta ka tuig?
Ug kon ugaling
makasulat ko kabahin

sa uban--sa politiko,

pananglitan-- ug makahibalo

sa uban pang mga matang
sa kinaiyahan

tungod kana

sa tanan nakong nabasahan
ug sa akong pagpasiyo sulod

sa inyong mga museo.


-- MARIA VICTORIA BELTRAN
Cebu City, Philippines

pagsubay

Samtang di pa kasubang ang kabugason, pukawon nato
Ang tanang walhong mananabtan sa Sento Otso.
Uban nila, panangtangan nato sa gapos ang
mga irong buang sa ilang pag-uwang unyang alas dose.
Ug pasagdi ang mga Insek nga manghimalad
unsang mananapa ang mipatakdol sa ilang taghoy.
Pabiyai una ang mga sugilanon ug yamyam
sa komedyanteng kosinero samtang wala pa
masunog ang kilay ni Shaay nga nagtayhop
sa anino sa gabii abay sa buak, kuaw niyang lantaka.
Samtang wa pa makapanug-ab
ang karbonatong tungol sa sunod
ting-ihaw og kuwaknit, ipalilong sa punerarya
ang tanang ngiyaw sa ambulansiya
Samtang wa pa mahipos ang tanang ilhanan sa kagios,
sininaan nato ang tanang manikin sa Kamagayan
kay gipanghayblad na ang tanang lamok sa katunggan.
Samtang wa pay uha ang nahimugso nga dramaturgo,
ipa-FedEx sa tanang tubaan sa Lorega
ang kinadak-ang buaya sa Manila.
aron kalingawag sawsaw sa halang nga suka
ang tambok nilang impilya ug baga.
Sa di pa nato tungabon ang sanglitanan
sa sunod nga banagbanag,
panahon karong subayon nato kon diing lawra
manago ang tubig sa miaging tingpanggapnod sa hunasan.

Oo, samtang wala pa—


-- OMAR KHALID
Medellin, Cebu, Philippines