kagay

mikagay ang baso 

apan gitigom mo 

ang gakatag nga bildo 

bisan pa og gakadugo 

ang imong mga tudlo 

naghinaot matakdo 

pagbalik ang nawagtang 

sa dughang nahaw-ang 

 -- JOVANIE B. GARAY

San Isidro, Davao Oriental, Philippines

kataposang tango

Nagkadaiya ang nangumbira. Adunay buntis nga gagunit sa iyang kinamagwangang anak nga singko anyos. Aduna po’y bungi nga hambugero, palahubog nga dalo og mikropono sa bidyokehan ug ang gipasanginlang lider-lider sa gang didto sa baryo Luso. Duol sa atabay ang panimalay sa adunahan. Gihulip sa tagbalay ang esena sa itom nga komedya nga tangkil sa salidang ginganlag paghuwat ni Godot kay medyo korni na kuno si Samuel Beckett suma sa tiguwang nga nangumbira, sumala sa sugilanon ni Munro nga higal nga mangumbirahay nga silingan niya, adunay gitangkil nga lana aron kuno makalimot ang mga taw kon adunay kumbira. Sa dumalayong kahinam nga milimin sa mga tawong naghuwat sa unang pagsukad sa init nga letson, miaringkil ang dakong kaldero ug unya adunay milabang nga dakong iring nga itom ang kolor. Ang ermitanyong nagkawankawan ang bungot hayan dayon nga gibunlot gikan sa iyang sakuban nga gibaatan og lapnis ang sungkod ug gitira sa iring nga daw pana sa isda, ug ang sungkod mikalit og kahimong espada. Daw mga dyolin nga gasinaw, misiga ang mga mata sa mga tawo dihang miuliot ang kahibulong . Ug migitib ang kataposang tango sa iring nga nahiwa ug naduha ang lawas. 

 -- LEONEL QUILLO 

Malalag, Davao del Sur, Philippines

usa ka gabii uban si chet baker

may gihunghong 

nga huni ang pagbinugtong-- 

ang magul-anong trumpeta 

nakigduyog sa sinkopadong 

hinagubtob sa kagabhion 

 -- GRATIAN PAUL R. TIDOR 

Dipolog City, Zambonga del Norte, Philippines

dabaw (dalagang kabaw)

Ako usa ka dalagang kabaw 

Nagsige’g barog bisa'g dili adlaw 

Sa Tionko nangitag ilimnon tin-aw 

Aron mahaw-as sa gibating kauhaw. 

Ako usa ka dalagang kabaw 

Sa nagpundong lapok gasawsaw 

Bisa’g daghang langas nga langaw 

Nga labad kaayo’g storyang latagaw.

Ay, ako usa lagi ka dalagang kabaw! 

Dali ra intawon ibaligya sa langyaw. 

 -- MARIANNE HAZZALE J. BULLOS

General Santos City, Philippines

pagdakop sa bulalakaw

Pasagdi ko. 

Kab-uton nako ang ikog 

sa bulalakaw bisan pa’g 

duslakon ko sa iyang kainit hangtod 

mobanaw ang akong pagbasol 

diha sa dakbayan 

sa imong dughan. Pasagdi 

nga magkatag-katag sa kalsada 

kining handomanan. Kinsa pa kaha 

ang mopunit sa mga bildo 

sa akong kasaypanan, ug hinay– 

hinay mobusdik sa gahubag 

nga haw–ang daw kawanangan 

sa pikas kong kasingkasing? 

 Tabangi ko.

 -- IVAN RIDGE ARBIZO
Davao City, Philippines

sulod sa city hall

Gawas sa mga hulmigas 

Nga naglinya’g punsisok 

Padung sa katam-is, dayag pod ang mga dagkong 

Ilaga nga mohimugso na pod unya sa lain pang 

Mga kaliwat, hanas sa pagbuslot sa kisame

Ug bungbong. Dinhing dapita lahos- 

Lahos ang pakiglambigit… 

Nag-abot ang kulatado ug ang nangulata. 

Ang minyo ug ang lain pang minyo. 

Ang managpares nga dili lahi

Sa pan de sal sa kape o di ba kaha 

Puto sa sikwate pakapinan og manga: 

Ang bayot nga magkinusiay sa laing bayot. 

Ang gwapong macho nga karon nahimong bayot.

Ang tumboy uban sa gwapa ug bus-ok. 

Ang tumboy nga nahigugma sa laing tumboy. 

Ang byuda nga hilom ang pakig-uban sa usa ka minyo. 

Ang batan-on nga mas gusto ang may asawa. 

Ang mga konsehal nga nakigbulag sa ilaha. 

Lig-on ba kaha ang katarokan niining lugara? 

Taliwala sa kagubot ug kabanha, paminawa 

Ang mga tinagoan nga mibukot 

Dinhi sulod sa city hall diin

Nagpadayon ang kagawasan.

 -- MALOU ALORRO 

 Cebu City, Philippines

tigmo: “duha ka baroto usa ra’y pasahero”

Sapatos ni Malinowski atong handurawon pagsul-ob

            sanglit pabiling dalin-as ang kalibotan, makalipong. 

Saguyod nga katahap, pastilan! Padayong gataob— 

            sarasay ang hunahunang nahulga— ang kaburong. 

Sabaa baya paminawon: mga hungihong mahitungod
            sa mga bungoton, lagom og panit, pikot, 

bakikaw og lihok, labi na’g lahi ang paagi sa pagluhod! 

            Sayop ka, manang, kon gakson nimo kanang pisot! 

Sagoy ka, ondong, kon kuyogan nimo kanang byuda! 

            Sagiwsiw ang kulihad, lapawan ang mga samad 

sa panggubatan, kon ang kasingkasing mabanlas ra, 

            sanapan og lapok, lakip sa mga nangasangad. 

Sawmon ta ang lawod sa iyang wa’y sukod nga gilay-on. 

        Saw-an ta ang kapupud-an nga atoa pang kaplagon. 

 -- MICHAEL U. OBENIETA 

Topeka, Kansas, USA

mga engkanto sa giwanon

Anaa kuno’y mga tudlo 

nga kalit lang mogimaw 

sa lungag sa mga langkara 

nga nagtusla-tusla sa mga lapok. Puno kuno ni

sa alahas, ug kinsa man gani manimpa pagkuha 

kinabuhi niya dili kaabta’g ugma. 

Anaa kuno’y babaye 

nga puti og sapot sa dagkong bakhaw manglili, 

ang iyang tiil kinadinahan; buhok niya 

daw kurtina, kutis daw porsilana. Tutoki, ug 

kalit dad-on ka sa ila. 

Anaa kuno’y dagkong isda 

sama sa pugapo ug mga pansat; dili motukob 

sa pasol nga may paon apan kon pakapinan 

og yamyam mokapyot, makapuno pa 

sa dagkong bukag sa mga mitugbong 

nga maninikop nga gikan pa 

sa bukid sa Kanagahan. 

Anaa kuno’y nagbantay 

ining Giwanon; ang katin-aw 

sa tubig mora’g naa’y klorox; 

ang kadagko sa isda mora’g gipakao'g tahop. 

Ang kamingaw sa dapit mora’g kaadto ka’g 

langit, apan kon ugaling kining paraiso 

pasipad-an, makaihaw gyod unya ka’g hayop 

ihalad kon dili buot ika'y maunay,

mao na'y itak-ang. 

 -- JONALYN ALMACIN - GOURDON
Nantes, France

paghinumdom kang sylvia plath

Wala man nahuman 

pagtungtung nimo og 30 (kadtong 

adunay mga naggwantis 

nga naghipos nimo: Paig-

sunog gikan sa kabugnaw 

sa imong balay 

sa London). Hangtod karon 

ang imong mga pulong padayon 

gihapon nangablit-kuhit 

sa mga nagpahiping 

balak sa akong kilid. 

Sa pagpaig nimo 

sa imong kaugalingon, nakabuhi 

hinuon ang imong anino, naglukso-

lukso. 

 -- DELORA SALES - SIMBAJON 

Butuan City, Agusan del Norte, Philippines

mahitungod sa nagpakatinuod sa bakak

(pasidaan sa propeta og dili malanti ang panas nga bag-ong tuig) 

bansaya iyang laslas ug tigbas sa banagbanag tang nagdilaab 

aron matagod-tagod niya ang tutok sa atong udtong nagmata. 

gisugdan na niya og luba ang matukawon natong paglagiting. 

og habolan atong isugnod, duol rang mapiyong atong ka(l)ayo. 

nagsugod na ro’g kangitngit ang gilaw sa baraw sa sayo tang hapon. 

gipatuo na tang amol na ang mga duslit sa atong kaisog. 

tuhoi kunong ang balit-ad nga tangkaraw ang banwag ug kaigmat. 

ugma, og ipakatabanaw ang kampilan sa talahorong datu, 

iwag na nga kalantip ang silab sa tayaon niya nga pinuti. 

gipakasuga na ang wa’y larab, gitagod-tagod na ang kahayag. 

 -- DESIREE L. BALOTA

Talisay City, Cebu, Philippines