sa ting-uwan

Sa tanang mga linalang

moyukbo ko sa iro

nga hapsay kaayo

ang katulog bisan pa

sa gabanos-banos

nga paminti

sa uwan, kilat, ug liti.

-- JONDY M. ARPILLEDA
Tandag City, Surigao del Sur, Philippines

sigon sa gugmang matinud-anon

Wa’y maskara ang katahom ni Nang Corazon.

Dili siya molingiw sa gabilangkad nga kagabhion

sukad mibiya siya sa iyang bana nga kanunay

magabhian uban sa suking masahista. Ay,

bisan pa’g ang alimyon sa iyang luha igong

makalumos sa buyog, wala siya manampong

pagtug-an sa gidak-on sa iyang pagmahay

samtang ang kamingaw iyang gipabuhagay  

uban sa kalit nga pagburot sa iyang sip-on.
Wa’y maskara ang katahom ni Nang Corazon.

-- MICHAEL U. OBENIETA 
Topeka, Kansas, USA

sa makausa pa

Wala ta nanginahanglan

og mga pulong aron kita mopadayon

sa uban pang mahitabo.

Dihang gitapli nako ang pultahan

imong nasayran ang gibug-aton

sa imong nabuhat

nga di angay ipaambit sa uban.

Nasayod pod ko nga ang akong

pagbiya naa’y utlanan diin ikaw

ug ikaw lang ang magpaabot.

Ingon ini ta sa taas nga panahon, ug

kon diin ka man ning taknaa

nagpaabot, nagkat-on sa paghigugma,

masayran mo unta nga dili ko layo,

andam rang mopasaylo. Karon,

labing kahibulongan nako kon

unsa’y mabag-o kon hagbay ra ikaw

gilambahan sa pultahan.

-- ADONIS R. ENRICUSO
Dumingag, Zamboanga del Sur, Philippines

apas-sumpay sa "ang managhigugmaay ug ang kakahoyan" ni ester tapia

Dili na ulay ang lasang

Ang mga lama ukabhang

Namilitpilit sa mga gamot ug ugat

Nanuyhakaw sa kahinam kinawatkawat

Dinhi sa imong paglakaw inigkabuntag

-- MELQUIADITO M. ALLEGO
Ocala, Florida, USA

unsaon pag-amuma sa iring laaw?

Mag-ukoy-ukoy na siya nimo 

diha sa kusina. Magpahipi ibabaw 

sa imong banggera. Mangilkil sa tanang 

salin, lakip na sa imong pagtagad. 

Bahogi og pahiyom.

Ug kon mabati na niya nga suod namo,

magsunod-sunod na dayon na siya

maski asa pa ka moadto. Pasagdi.

Kon mamatikdan na niyang gitugnaw ka

sa imong higdaanan, mokamang na siya

ug modulog nimo lahos

sa tungang gabii.

Kon mapasalamaton ka, kawota

ang iyang apapangig. Di magdugay

maandan na nimo ang iyang pagtungha.

Apan kon moabot na unya

ang panahon sa iyang

pagbiya ug pagkahanaw, hinumdomi

nga aduna’y hinungdan nganong

gitawag siya nga laaw.

-- MAI SANTILLAN
Cagayan de Oro City, Philippines

tulay

Mibalik na usab ako dinhi

Gikan sa pila ka buwang’

Trahedya sa MV South Korea

Tungod kay ang kamingaw

Samad nga dugayng’

Mialim sa kasingkasing.

Ug sama sa gihapon,

Madungog ko ang hungihong

Sa naghunas ng baybayon

Nga daw gibalik-balik

Paglitok ang imong ngalan

Diha sa mga mabanlas

Nga balod sa lapyahan.

Sa pikas tampi ning baybayon

Nagsugod na pagtukaw

Ang mga suga sa Tagbilaran

Mora’g mga mata

Nga dili mamilok sama

Sa akong paghuwat kanimo

Kay lagi misaad kang

Dinhi ko ikaw paaboton.

Apan wala ko masayod

Kon pila ka kahunason pa

Ang momaymay ning kahaw-ang,

Pila ka kahaponon ko pang’

Lantawon ang mga sugang’

Wala’y puas nga nagtukaw.

Niining kilumkilom:

Ang Tulay sa Dauis,

Mga balod ug baybayon,

Midaghong sa paghandom ko

Sa imong ngalan.

-- NOEL P. TUAZON

Dauis, Bohol, Philippines

ang sikreto nga gipadayag sa binuwakang diary ni lilia

Nagtanom og bughaw nga yawi akong silingan

sa kaang sa bintana tungod sa akong lawak

ug nitubo ang abuhon nga bulak.

Gibalhin niya ang kaang dapit sa pultahan

aron makit-an sa mga mobisita ug molabay,

giibot ang abuhon nga bulak,

ug gilabay sa akong daob.

Nagtanom dayon siya og tapol nga yawi,

ug nitubo ang itom nga bulak.

Gilambos niya ang kaang

sa nagpatunga namong karsadam,

ug nikamang ang itom nga bulak

sa akong hardin.

Gipunit ko ang itom nga bulak

ug gihumol sa akong gitigom nga ulan

sa banga nga gihipos ko sa akong lawak.

Gikan ko nigawas ug nangguna,

gibalik ko ang banga.

Nawala ang itom nga bulak

apan nilutaw ang rosa nga yawi.

Gitanom ko ang yawi

ug nitubo ang mga bulak

nga rosa, puti, ug pula.

Wala na’y natanom nga yawi

ang akong silingan

kay nilayat padulong sa akong bintana

ang bag-o niyang kaang

ug hingpit nga namungingi sa bulak

ang akong hardin.

-- DESIREE L. BALOTA

Talisay City, Cebu, Philippines

dinhi sa akong paglakaw inigkabuntag

Dinhi sa akong paglakaw inigkabuntag

nagkatag ang mga yellow nga plema sa mga karsada, 

morag mga bagang pinisik sa pintal gikan sa pinsel sa nagdaling pintor

nga misubang na ibabaw sa mga bukid.

Kon makataak ko niini, motapot kini sa tikod sa akong sapatos

Ug ang iyang abog akong madala sa balay ug ang ang iyang kolor

motamla nga wala tuyoa sa among lagwerta ug sementong hagdan.

Basig masakit ko sa ilang mga sakit,

ug mamatay ko sa ilang mga kamatyan,

simbako lang,

ug unya ang akong lawas habolan sa mga dalag nga bulak,

digoon sa lana sa mustasa,

ug dauban kini ug ang mahibilin nga abo,

tiniman-ang abohon, 

ug ang wa masunog nga mga bukog,

mga  bato nga dili mapukaw sa kalawom sa katulogon ,

itambog sa  suba diin misawom ang mga bata nga nangita'g

mga sunog nga mga metal nga adorno,

ka-way hinungdan nga bulohaton,

kay ang labing mahalon mao kadtong mga damgong gibalon,

dili mapanunod, dili mahikap.

Simbako lang,

gamhanan ang mga pulong,

buot kong matulog sa katapusang katulogon sa akong higdaanan,

bisan asa man, magkumkom ug mga biyuos sa katuyoan,

ug ang akong ginhawa motipon sa yamog sa hardin,

sa dihang ang adlaw mopintal og inanay, og daghang bulok sa daghang kalibotan,

bisan asa pa man, ang hugot nga halog sa kamatayon,

bisan asa man, bisan dinhi apan,

simbako lang!

-- ESTER TAPIA
Kathmandu, Nepal

virus

a

ha

aha

letra

usa ka

letra nga

nanganak

og laing letra 

nga nanganak 

og lain pa ug kini

nahulma ngadto sa

usa ka pulong ug unya

nanakod og lain pang mga

pulong ug unya nanakod pa

ug milamay pa gayod ngadto

sa pagkahugpulong nga sama

sa gidahom kini nanakod og lain

na upod ug lain pa gayod hangtod

nga milamay na kini ngadto sa usa ka

paragrapo ug nanakod ug nanakod pa

gayod ug karon hingpit na kining usa ka

sugilagming ug inanay kini nga mohupong

ngadto sa pagkasugilanon ug manungha ang 

daghang anib sa mga sintomas ngadto sa dako 

uyamot nga nobela nga di na gayod katambalan

manakod ug manakod ug manakod pa gayod kini 
ug ang iyang mga kagaw wala na gayo'y kataposan...

--DESIDERIO R. LIBRE
Samboan, Cebu, Philippines

niyebe sa disyembre

tumong sa pagtakdol sa adlaw

nidaligdig ang niyebe

nga nagpas-an og aso

nunot sa sapa tadlas ngadto

sa dakong wanang

dili igsapayan sa nagkurog

nga mga dahon ang masusihon

nga hungihong sa hangin

namasin nga masayod

mahitungod sa imong pagduaw

sama sa punoan nga hinabulan

ug bug-at nga puting kabugnaw

uyuga unya ang kasingkasing

nga dugay nang ningkaging

sukad giunos sa kahapdos

-- TEA SOLON
Cebu City, Philippines