paggikan sa iyang hinigugma paingon sa giyera

Sa imong
pagkaway
giduslak mo
ang akong
kasingkasing
sa bayoneta
sa kamingaw.


-- VICENTE VIVENCIO BANDILLO
Koror, Palau

trabaho

Tukma gyod sa atong talamdan,
Tagsa-tagsa kitang nangabot,
Daw nanagsumpot
Nga mga sakyanan Sa usa ka tren
Nga nagdahunog sa langob-agianan
Sa alas syete.

Misumpay kita
Sa taas nga pila
Niadtong mga nagpaabot
Aron mopantso
Sa mga time cards,
Ingon nga ang una tang buhaton
Ning pagsukod ta sa atong trabaho
Mao ang pagbutang og mga lungag
Ning atong mga kinabuhi.

Gitulod sa adlaw
Ang iyang kauglingong pagtuyok
Ug ingon man atong gitulod
Ang mga lapilapi sa mga papel
Ning pagtulod ta
Sa atong mga kinabuhi.

Unya sa pagkahuman,
Dihang atong isad-ong
Kadtong pahibalo’ng nag-ingon
Nga kita ninggawas una,
Diin mang gawasa kita mopunta,
Asa mang gawasa kita hikaplagi?

Sama ang langob-agianan
Inigka-alas singko.
Apan ang mga sakyanan
Nagtagsa-tagsa
Sa ilang mga gipadulngan,
Human buhii niadtong dako’ng kamot
Nga nagkupot kanila
Sa tibuok adlaw.

Gipakli na usab nato
Ang usa pa ka panid
Sa atong pagtrabaho,
Nga way pagkahibalo
Kon unsa man gyod
Ang ato’ng mga nahimo,
Kon unsa ang mga sulod
Sa mga briefcase
Nga atong gibiking
Ning hilom tang pagpamauli.


-- URIAS A. ALMAGRO
New Berlin, Wisconsin, USA

mantra

Dios nga gamhanan
Dios nga manggiloy-on
Dios nga matuod
Dios nga akong agalon
Dios nga dalaygon
Dios nga dili limtanon
Dios nga manggihatagon
Dios nga Amahan
Dios nga Anak
Dios nga Ispiritu Santo
Dios nga timaan
Dios nga balaan
Dios nga nagmugna nako

Ikaw na ang bahala
kon asa ako isangko.


-- RIC S. BASTASA
Katipunan, Zamboanga del Norte

ang panyo ni veronica

Ganahan unta ko mangutana
sa kahimtang sa imong panyo.
Nabantayan man gyod nako'ng
hanas ka sa pagpanarapo.
Dali kaayo ka madani
sa mga lalaki'ng nag-antos,
unya hinay-hinayon nimo'g trapo
ang ilang kasubo hangtod kini
mahanaw sa hingpit ug motapot,
mopilit sa imong panyo.
Ganahan unta ko mangutana
kay bisan ba, Veronica, sa imong
kanunay panglimpyo sa ilang
ga kasakit, basin nakalimot na ka
nga kana diay imohang' panyo
angay pod bayang' labhan, paughan.


-- JONA B. BERING
Tuburan, Cebu, Philippines

pagkahisalaag

Usa ka alibangbang sa taliwala ning syudad.
Naglupad paglibot-libot, sama kanako nahisalaag
ning kalibotan sa marmol nga mga edipisyo,
sa nangliki’ng mga aseras, sa kagahob--
kalibotan nga way mga bulak.

-- URIAS A. ALMAGRO
New Berlin, Wisconsin, USA

alang kang emily

Sus, Emily, manghinaot ko nga matinuod
ang imong panagna nga mamatay
ang makakao'g Kabantogan. Kay diri
sa amoa, Emily, nag-ilog ang tanan
aning pagkaona. Magdinaganay,
magtinukmoray, magpinatyanay
aron lang gyod makakaon niini.
Nagkalain-lain ang ilang dagway,
Emily. Naa'y nag-amerikana, naa'y
nag-uniporme, naa'y nag-Gucci,
naa'y nagbusyad ang tiyan—tingali
sa sige'g kaon og Kabantogan.
Magpalabwanay pa gyod ni sila
sa ilang mga hambog sa TV, Emily.

Apan pila na kadekada ang nanglabay
wap-a man ni sila nangahilo, nangamatay.
Ayaw ko ingna namakak ra ka, Emily?

-- JONA B. BERING
Tuburan, Cebu, Philippines

bahad

Ang kagang nga nagdako sa gisakmit mong uma
Adto mosuksok sa nadugta mong lapalapa.

-- VICENTE VIVENCIO BANDILLO

Koror, Palau

sa gakang-a mong pultahan

(alang kang Urias A. Almagro, isip tubag sa iyang balak "Unya")

Kanang imohang gakang-a
Nga pultahan

Ang ganghaan
Nga nagbutod--
Gaawas

Og bahandi:
Mga titik
Sa mga utnga,
Mga tiyabaw,
Mga talidhay,
Mga agik-ik,
Mga naluom
Nga sinagolsagol
Nga bulok
Sa kasingkasing,
Sa kalag—langit.
Apan kana kinulit

Sa imo unyang

Pagadad-on didto

Sa sunod nga lawak,

Ug amo na lang unyang

Lantawon sa halayo.

- GINA MANTUA-PANES

Cebu City, Philippines

ngadto sa disyerto

Nakaabot ko nimo usa ka gabii sa Agusto nga wa’y ulan.
Gitudloan ko nimo unsaon pagpakabuhi nga wa’y ulan.
Ikaw ang kauhaw ug ang kauhaw ang tanan nakong nahibal-an.
Ikaw ang balas, hangin, adlaw, ug nagdilaab nga langit,
Ang kinainitan nga pughaw. Nitayhop ka’g huyuhoy ug namarka
Ang imong ginhawa sulod sa akong baba. Nikab-ot ka-- ug giyuko
Imong kusog, aron ko mabuak, mahuyop, masunog, ug mabag-o.
Giputos nimo’g hugot imong ngalan liyok sa akong mga gusok
Ug imo kong gipainitan. Gihimugso ko alang kanimo.
Sa ibabaw, sa ubos, sa imong kilid, gialirongan nimo.
Nahigmata ko kanimo sa kaadlawon. Ayaw bugtoa
Ang imong higot. Pangab-ot, pasaka, pabulhot. Sálvame, mi dios,
Trágame, mi tierra. Salva, traga, buk-a ko.
Ako ang pan. Ako ang tubig sa kauhaw mo.

(hubad sa balak ni Benjamin Alire Sáenz)

-- MICHAEL U. OBENIETA
Topeka, Kansas, USA

bulak sa bulan

Bulak sa bulan--
nawala ang akong kurona,
wala ko masuhito sa hangin
nga mitangag ini.
Wala ko na madunggi
ang huni sa paglaom
sa kagabhiong gapalibot
namong duha.
Mabugnaw niyang halok
mao’y tima-an sa iyang pag-abot
samtang akong gitagoan
ang luha kong amang
diha sa tungang buka
sa itom nga rosa.


-- HANSKI GARCIA
Mandaue City, Cebu, Philippines

argumentum ad lapidem

Nagnganga ang gunting ibabaw sa lamesa,
naghulat nga molabay ang ilaga
nga nagpas-an og keso.
Apan ang buwan malinawong naglawig
luyo sa panganod.

-- VICENTE VIVENCIO BANDILLO

Koror, Palau

sa disyerto

Sa disyerto

Nakakita ko og binuhat, hubo, mananap,

Nga, gatuk-ong sa yuta,

Naghupot sa iyang kasingkasing sa iyang kamot,

Ug nihabhab ini.

Niingon ko: "Lami ba kana, higala,"

"Pait ni--pait," nitubag siya;

"Apan ganahan ko ini.

Kay pait ni,
Ug kay kini ang akong kasingkasing.”

(hubad sa Iningles ni Stephen Crane)

-- MICHAEL U. OBENIETA

Topeka, Kansas, USA

pagpahungaw sa usa ka asawa alang sa kabit sa iyang bana

ang kataposang hikay
Manang Carmen
alang na gayod kanimo

ug si Manang Sabet
nga asawa ni Mando
nga imong gipanghambog
nga imong atimanon didto
sa ilang uma sa Potungan
hangtod sa kahangtoran

nakaingon baya
(sa walay kukalooy
sa walay pagpanapo
ug pagdipodipo)

nga maayo ra
nga namatay ka og sayo


-- RIC S. BASTASA
Katipunan, Zamboanga del Norte, Philippines

kon aduna lang unta koy gamayng kahangtoran

Kon aduna pa lang unta koy gamayng kahangtoran
Suroyon nako ang Pilipinas
Hapnigon nako ang akong mga panyo ug medyas
Tagsa-tagsaon nakog hinumdom ang tanan kong mga sala
Aron ako silang mahinulsolan pag-ayo
Magtuon kog Griyego Antigo
Aron makabasa ko ni Homer sa orihinal ug usab ni Pindar
Daghan kong gustong buhaton
Gani magtuon kog touch method sa pag-type
Unya sulayan nakog kanta ang My Way bahalag mapusilan
Apan tungod kay milingay na ang akong adlaw
Ang ako na lang nga aduna koy igong panahon ug kalinaw
Paghinumdom sa atong gugma
Nga wala itugot sa kapalaran


-- VICENTE VIVENCIO BANDILLO
Koror, Palau

fuji apple

pagkahamis sa panit
pagkahumot sa alimyon

kalaming paakon
kalaming tam-osan

sa usa ka bulok
sa sayong kabuntagon

pagkanindot angkonon
dayag nga makatagbaw

apan pagkamahal
dali lang madugta

ug dili molungtad
sa akong mga adlaw


-- RIC S. BASTASA
Katipunan, Zamboanga del Norte, Philippines

masokista

Minilyon ka letra, liboan ka pulong, 

Gatosan ka linya. 

Ubay-ubay na ka mga balak 

Ang napatik apan 

Usa lang ang tinubdan sa gisugilon-- 

Gugma. Apan labing paspas, limpyo 

Ug nindot tilawan 

Ang unod sa mga balak nga namugna 

Sa dihang imong gipikas, gipa-undang 

Ang pagpitik sa akong dughan.

-- CARINE ERA M. ASUTILLA

Cebu City, Philippines

insula dulcamara

Bisan wala nako nasayri kon napalgan ba

ni Paul Klee ang lapyahan palayo sa lilo

sa iyang pag-antos, natultolan ko niya

nga galutaw diha sa galabyog nga sayaw

sa iyang mga linya duyog sa bangaw, gaawas

gikan sa iyang kamot. Kon wala'y kinutoban

ang mapa sa kasakit, dili matugdonan

sa huyohoy didto sa Olango, sarang na

nga nanurok ang balhibo sa kahiamgo

lapaw sa panganod sa akong pagtutok.

-- MICHAEL U. OBENIETA

Topeka, Kansas, USA

tigmo sa urom nga way ugma

Nagngisi ang buang nga nagpas-an
sa bag ni Jinky Pacquiao nga

giludhan sa mga irong kagiron.

Lima ka galansiyang naghagwa,
nagduwag chinese garter ug takyan.
Ang kometa gitukob sa kibol

nga bakunawang nibutho sa lungag
nga panganod kay nanobra ang tama
sa tambaloslos nga blond og bulbol.

Ang tigmo sa imong pagkasaag:
Wala ka ba nahadlok makasala?

-- ERIK TUBAN

Cebu City, Philippines

usa lang unta ka hinanok

unsa ba ang angay ipangayo
sa akong pag-ampo
karong gabhiona

gusto nako nga wala nay

pangayoon gawas lang unta

sa usa ka hinanok

kanang dili na nako madungog
ang haguros sa pagtuyok

sa akong kalibotan

kanang dili na nako mabati
ang pagkahanaw

sa mga bitoon sa langit

kanang dili nako pugwaton

sa bagulbol kabahin
sa hinanaling kamatayon

-- RIC S. BASTASA

Katipunan, Zamboanga del Norte, Philippines

kon ako mamati

ang akong mga mata
magmugna og bantawan
diin ang imong tinutokan
magkintong mopaso
tadlas sa akong dughan
hangtod kining hunahuna
moduyog sa pagpakpak
kon dili gani moyam-id
sa imong pasundayag


-- GLENN T. MUÑEZ
Dumanjug, Cebu, Philippines