sa tinubdan

Natulog ako aron sa kahilom
Tin-aw ang akong pagsabot
Sa akong kaugalingon. Sa kangitngit
Nangapkap ko sa tinubdan
Sa akong kahigwaos ug hipalgan ko—
Sa dako kong kahimangod—
Ang nagpitik kong kasingkasing.

(hubad sa Iningles nga balak ni David Ignatow)


-- VICENTE VIVENCIO BANDILLO
Koror, Palau

napulo ka sugo sa magbabalak nga nabutahan sa kasinaw sa iyang pahak

1. Hangad hangtod tupong ka sa imong tuhod.
2. Dili ka moluhod diha ubos sa samin nga gihagkan sa anuos.
3. Dili ka motilap sa hangin duyog sa abog.
4. Kalimti ang mga kalendaryo ug ang taknaan.
5. Pasidunggi ang uha sa imong pag-inusara.
6. Pakig-unong sa mga mamumuno.
7. Ayaw pakigdulog sa dugdog sa imong pakighilawas sa kilat.
8. Ayaw kawhata ang kangitngit.
9. Ayaw isabwag ang mga bildo sa agianan sa mga buta.
10. Ayaw angkona ang mga anino alirong nimo.


-- MICHAEL U. OBENIETA
Topeka, Kansas, USA

ang katungdanan sa usa ka magbabalak

(hubad sa balak ni Pablo Neruda)

Ngadto ni bisan kinsa nga wa maminaw sa dagat
ning Byernes sa buntag, ngadto ni bisan kinsa nga gitangkal
sa balay o sa opisina, sa paktorya o sa babaye
o sa kalsada o mina o sa uga’ng prisohan,
ngadto kaniya moadto ako, ug sa way pagtan-aw o pagsulti
moabot ako ug mobukas sa pultahan sa iyang prisohan,
ug ang usa ka pag-uyog moandar, lubog ug mapugsanon,
usa ka taas nga dahunog sa dalugdog nga modugang
sa gibug-aton sa planeta ug sa bula,
ang nag-agulo nga kasapaan sa kalawran mousbaw,
ang bituon kalit nga mokurog sa iyang korona
ug ang dagat mopitik, mamatay ug magpadayon sa pagpitik.
Mao, nga gibitad sa akong kapalaran,
maminaw ako sa way hunong ug huptan ko
ang kaguol sa dagat nganhi ning akong tanlag,
bation ko and pagdam-ag sa gahi’ng tubig
ug sag-obon ko sa usa ka timgas nga tasa
aron, bisag asa mahimutang kadtong mga prisohan,
bisag kanus-a sila mahiagom sa silot sa tingpangatagak,
mahimong akong ikagasa and usa ka tulibagbag nga balod,
mahimong mosulod-guwa ako sa mga bintana,
ug sa ilang pagpakadungog, ang mga mata mokayaw,
nga mangutana, “Unsaon ko man pag-abot sa dagat?”
Ug akong ipadala kanila, sa way sultisulti,
ang mabituonong alingawngaw sa mga balod,
ang pagpangabuak sa mga bula ug sa binog,
ang kanaas sa asin nga misibog sa ilang kaugalingon,
ang abohong hilak sa mga dagatnong langgam sa kabaybayonan.
Mao, nga pinaagi kanako, ang kagawasan ug ang dagat
motawag agig tubag ngadto sa gibukotang kasingkasing.

Gihubad ni:
-- URIAS A. ALMAGRO
New Berlin, Wisconsin, USA

dinhi sa among lungsod

kalaming pakongon sa ulo
sa mayor nga nagtukod og bulangan
atbang sa simbahan
ug sa kura paroko
nga nagpakahilom lang


-- RIC S. BASTASA
Katipunan, Zamboanga del Norte, Philippines

latagaw nga handomanan: laroy-laroy sa fifth avenue, manhattan

Wala’y kisaw didto
ang makililimos nga buta, mga batang gahingos og rugby,
ang borikat duol sa tunghaan, ang mga mangunguot,
ang kimpang nga wala maapsi gikan nisutoy
palayo sa singgit sa iyang gilabnihan
daplin sa dalan Colon.

Wala ko’y nasaghiran--
ang tindera’g mani, mga prutas, sigarilyo, ug karmelitos,
ang mga barbekyuhan ug mga bukag sa balot,
ang alirong sa pungko-pungko
paduol sa mga suok sa akong kagutom
tidlom sa akong dughan.

Wala’y nakamatikod
sa akong kalimutaw nga hapit malagpot pagtagbaw
sa akong pagkahulmigas didto diin gilandongan ko
sa mga higante nga tupong sa anino
gikan sa iro nga padayong’ gaaw-aw
pidpid bisa’g asa ko padulong.


-- MICHAEL U. OBENIETA
Topeka, Kansas, USA

pamarayeg

Mandoan man ugaling
Sa mamala ang kadagatan
Sa paghunong,
Sa paghumod sa yuta,
Magpakarong-ingnon lamang
Nga bungol kini
Mahimong sa makadiyot
Mopahuway
Sa iyang pagkiay-kiay.
Apan kini magpabiling
Mohapyod
Sa mamala.

Kay ang tubig
Magsalimuang,
Magpangita
Sa mga balas,
Yuta ug bato nga
Iyang kapaulian,
Iyang kaparaygan.


-- GINA MANTUA-PANES
Cebu City, Philippines

pakyas nga taban

Didto ko hipalgi ang libro sa karaang balay nga walay buslot ang atop apan walay tuang ang tulo sa ulan bisag hayag ug init sa gawas. Usa kadto ka tigom sa konseho unya isip pagpatin-aw sa iyang punto gihulbot kini ni Ilustre, ang labing maas nga konsehal, gikan sa ilawom sa ngamig nga lamesa. Gipakli niya kini ug gipangita ang tukmang dahon nga human molabay ang pipila ka gutlo wala pa gihapon niya hikit-i. Pagsuling nako sa iyang gikuotan didtoy nangalatang mga peryodiko. Sa akong tan-aw nagpilit na ang ilang mga letra ug mao nga nakahukom ko nga dili ko na sila maluwas pa. Pagkahuman sa lantugi nga wala ko hisabti ug sa dihang nakabiya na ang tanan gidali nakong punit ang umog nga basahon kansang hapin diha-diha mipilit sa akong mga tudlo. Sa akong pag-ipsot ubos sa kakahoyan paingon sa pantalan gigukod ko sa tubig nga diay sa akong paglabang sa tugkaran naghinay-hinay nag daguok ug buhagay lusot sa dunot nga bungbong nga maoy bugtong saksi sa makalilisang nga krimen.


-- VICENTE VIVENCIO BANDILLO
Koror, Palau

pamalandong: tingtugnaw makapakulo sa paresang itlog

ang mga bulawanong dahon nangataltag
ug nanghalok na sa yuta
nagsugod nag lugsong ang snow gikan sa wyoming
montana dakota ug canada
ngadto sa perryville missouri
nagsul-ob nag-jacket ang lake charles louisiana
nag-sweater ang palm harbor florida

(panahon nang magluon ang hiniktan ug himungaan
didto sa pugaran sa natun-as karaang kamalig
sa santa lucia asturias o putat tuburan sugbo pilipinas)


-- MELQUIADITO M. ALLEGO
Palm Harbor, Florida, USA

lumalabay

Gamay’ng langgam pasayloa
nga adto ko na tiwasa pagpamati ang imong awit
didto sa laing kalibotan
-- haiku nga ang tagsulat wa hiilhi

Kay kita’ng tanan lumalabay.
Ug kita’ng tanan nanagdali.
Ikaw nga nagbatog sa gamay mo’ng sanga
Ug ako’ng mihunong dinhi ning yuta
Sa usa ka pamilok ug usa ka pagbuka
Way kasayoran kon kinsa kanato’ng duha
Ang mahanaw, kinsa ang mahibilin.
Mao’ng ning daklit ta’ng pagpanagtagbo,
Ning taphaw ta’ng panaghimamat
Gunitan ta kining tago’ng lanot
Sa ato’ng mga tingog.
Kuptan ta hangtod sa ilang pagkabugto.


-- URIAS A. ALMAGRO
New Berlin, Wisconsin, USA

tigmo sa kasanag

Ikaw nga mahigugmaon sa kaalam
Mogukod sa basibas sa kabuntagon
Ug mosuta kon asa kutob
Ang lagsik nga tigmo sa kasanag.

Ikaw nga nakabaton og gasa sa kahibulong
Gitahasang mokuykoy sa kamatuoran
Aron tukion ang kasayoran
Nga inumol sa kanhiay’ng tigkaplag.

Ikaw nga wa tugkig balhibo sa katalaw
Moasdang sa kinahiladman
Mopagawas sa tinipigan
Ug mobuntog sa gahom sa kataphaw.

Ikaw nga buot motutok sa putling silaw
sa katunhayan nasayod na--
Di angay sud-ongon ang bidlisiw
Aron masabtan ang kinaiya sa adlaw.

Andam kaming manalinghog
Sa mga sugid sa imong kasinatian
Bisan og tipaka lamang kini
Sa pagtugkad mo sa kalamdagan.


-- RAUL M. FIGUES
Oslob, Cebu, Philippines

laylay sa batan-ong manlulukot

Sa akong paghagpat sa lukot hikat-onan ko ang kahangtoran.
Sa ubos nga bahin sa imong pus-on adunay gubot nga dapit.
Tungod nimo nakat-onan ko ang pagmahal sa lukot sa dagat,
Ug sa lusay nga mosaghid unya mobalikos sa akong mga tiil.

(hubad sa Iningles ni Robert Bly)

– VICENTE VIVENCIO BANDILLO
Koror, Palau

kadtong danlog nga nagtighaya nag-inusarang gondola sa mga kanal sa venice

hagbay rang midunggo ning panumdoman

panghigayong nahilambigit sa tiaw o komedya sa kapalaran
usa ka gabiing pamasinbasing pautaw-utaw sa mga inagwahang kanal dinan-agan
sa daklit ug lumalabayng dagitabnong mga bitoon
nanuhiltuhil namukad og gilok gasanting sa kinapusoran sa matilapong tubig
samtang gigabling sa nag-alimpuyo nag-alintabo nag-utngang pagbati
hangtod ang matag nagtikubong hayon sa bugsay nahimong nagsuylang
metapor sa libokalibong tentasyon
ikaw ug ako usa lang ka nawong sa hut-ong sa mga dinapit sa restorante dolce vita
kita mga langyaw sa matag usa
mga destiyerong naanod sa lilo sa sulagmang panagkita
mga dumuduong sa kinasang-an sa bilahan sa salingkapawng panamilit

hagbay rang milawig ning panumdoman


-- MELQUIADITO M. ALLEGO
Palm Harbor, Florida, USA

taghoy alang ni Job bawos sa iyang danguyngoy

Ania ang amang gikan galaklak sa tubaan
sa eskina. Subay diha sa giagup-op nimong hagdan
ang sarasay sa iyang mga lakang. Ikaw ra
iyang matultolan. Bisan gatabisay iyang sinuka,
pasudla siya sa imong panimalay nga gianinohan
sa langit lahos sa atop nga giduslitan sa mga buslot.

Pamalikas. Apan ayaw talikdi iyang pagdangop
diha nimo bisan kon gabulhot sa imong dagway
ang huyohoy sumpay sa iyang ginhawaan, gilok
sa napulpog nga mga balhibo ug bukog sa balot
nga iyang gisumsom. Paminawa ang huni
sa iyang hutoy. Pasandiga siya bisan gayunyon
ang bungbong nga gatigom og mga mapa
nga galakra sa salin sa tanang milabay nga unos
ug anino sa tanang kalendaryo. Abo sa kaagi.
Aso sa panumdoman. Ang iyang ikatug-an, mao ra
kini: Wala ka mag-inusara sa imong pagbangotan.

Paghilom diha. Kon abyan nimo ang hangos
sa iyang hagok hangtod tugbang sa sidlakan
ang unang tuktogaok, basin madunggan pod nimo
ang tunob sa byuda didto sa Sanciangko, gasungkod
padulong sa Katedral samtang duyog sa kampana
ang panghuy-ab sa borikat. Sa imong pag-atubang
sa samin unya sa imong paghilam-os, ayaw pamilok.
Bisan magupok imong tingog sa kahingangha,
panguros bugti sa imong maaninaw: Sarang ra nimo
ang gatingsi nga maskara sa Manunubos.


-- MICHAEL U. OBENIETA
Topeka, Kansas, USA

kini ang wala nimo makita

kini ang wala na nimo makita
gusto nimong g ilubong
ang imong hulagway
diha sa likod sa balay nga nipa
sa kilid sa punoan sa nangka
nga wala na mamunga
sa layo dili na nimo
kaayo maklaro ang usa ka iro
nga puti nga dunay puntik
nga itom sa iyang wala nga mata
gutom nangarol bahong
patay nga baki

wala na'y tawo kining balaya
hagbay ra namong gibiyaan

ang nagpabilin lamang
mao angmga handurawan
nga nagpunay og hinuktok
sa kilid sa bintana
nga hagbay rang nadugta

gibitik ang iro
gihimong sumsuman
sa mga palaigit

ang lubi nga tigulang
wala gyoy mga pulak

ang kabaw gikitlan
ug ilang gipaambitan

ang dalan nangliki na
gumikan sa dakong hulaw

kini ang dili mo
gusto nga mabati apan
sayod ko sa pag-abot
sa saktong panahon ato lang
gihapong balikan

-- RIC S. BASTASA
Katipunan, Zamboanga del Norte, Philippines

akong ablihan ang mga kurtina

Sa di pa ko moadto sa akong higdaanan ablihan ko ang mga kurtina.
Unya sa akong pagmata gusto kong hikit-an ang buhi’ng kangitngit,
ang mga pines ug ang langit. Ningbaw-an ko ang usa ka lubnganan,
apan kadto wa’y mga gagmay’ng bintana ngadto sa kabitoonan.

Si Orion miabot na sa kasadpan, nangayam, nangayam--
wa siya makaabot og mas layo kay sa akong naabtan.
Ang punoan sa cherry sa gawas sa akong bintana gahukas og itom.
Ang langit usa ka kampana, nga makalipong sa kaasol, diin
ang mga kuko sa himatayong bulan naghimo sa ilang pagkawras.

(hubad sa balak ni Olav H. Hauge)

Gihubad ni:
-- URIAS A. ALMAGRO
New Berlin, Wisconsin, USA

kinsa ko?

ako ang sista
nangita og moduyog
sa akong pag-inusara
mobuntog


-- ROMEO NICOLAS BONSOCAN
Carcar, Cebu, Philippines

ang tukmang silot

Gimino ang masupilong manulonda
sa lasang sa dahong laya.


-- VICENTE VIVENCIO BANDILLO
Koror, Palau

pagpangataltag

Gayaka, gapiyong, gapalandong.

Gialirongan sa mga laya’ng dahon –
Gadula-dula, gasayaw-sayaw,
Gadakop-dakop, galupad-lupad
Nunot sa mga tayhop sa panahon
Ngadto sa nahabiling dan-ag ug
Kainit nga karon ga-awop
Daw gaduka nga mga mata
Ug ang kalimutaw gihidlaw
Nga habulan sa nangaluyang’
Tabon-tabon uban sa nangalawos
Nga mga pilok, daw mga kandilang’
Gi-ugbok sa tungod sa sam-ang:
Lubnganan sa kalibotanong’
Handumanan, sa udtong’ tutok
Nangahilis, nangabaliko, niyuko,
Nanghalok sa yuta
Samtang nagtulo
Daw gabakho.

Kabudlay, kahapo
Sukli sa malaumong
Pagpanlimbasog kanhi lanog
Ningsiyaok, gaagulo, gamulo
Sama sa aktibista’ng way puas
Sa pagpangugat pagbalikas sa namat-ang
Kahimtang sa katilingban
Napagtong, napagaw
Nangminghoy.

Nimata, nitindog, niyawit:
Kausik sa kusog
Mangapunggak,
Mangahulog,
Bisag dili
Uyugon,
Dughiton.

Huwan tapulan, pagkabulahan!
Sa imong paghayang-hayang
Diha nianang duyan
Ubos sa mga puno-an
Imong kaha’ng napamatud-an
Walay kalahi-an
Ikaw ug si Pedro
Kugihan?

Bayabas nga latâ
Sama kaha kalami
Sa balbanga-an?


-- JOHN K. ZABALA
Baltimore, Maryland, USA

human bun-ogapunga: sa m.r.i tipaka sa bala gasamoksamok sa utok

Matag kasikas tulimbag ratatat
Udtong-tutok tungang gabii nanghambat
Demonyong mino pislangong tarantado
Nagpiga ning inutil lulid bardado

Nabalbag sa Iraq
Gitumod sa Afghanistan
Pauli ning deliryong atob
Yabag patayng-buhi gaambangol gaaliwaros

Nagkuray nagdusingot sa kahadlok


-- MELQUIADITO M. ALLEGO
Palm Harbor, Florida, USA

tulo ka dili matago

tulo kuno
ang dili matago

ang adlaw ang bulan ug ang kamatuoran

gitagoan ko ang ikatulo
hangtod sa akong ikamatay

padayon ko kining tagoan
dinhi sa kinailawman
ug kinauyokang lawak
sa akong kasingkasing

ako ang unang nakakita niini
ug dili ko na gayod kini malimtan

ngil-ad ang iyang dagway
ug malooy ko kanimo kon
ikaw makakita unya niini

ayaw pamugos
utang buot ayaw intawon pamugos
kay basin unya kini mahimong hinungdan
sa imong hinanaling kamatayon

gusto nako nga ikaw mabuhi pa
sa sunod nga usa ka gatos ka tuig
gusto ko nga ikaw
moabot nianang imong pagkahingpit

kon gusto ka nga mahisama kanako
tan-awa ako
gapahiyom apan gadugo
ang dughan

adunay hubag
apan walay buthanan


-- RIC S. BASTASA
Katipunan, Zamboanga del Norte, Philippines