9.07.2012

ingon usab niini ang kamingaw

(kang Nanay Ulding)

Dinhi niining kalasangan,
sigon sa balaod niining akong giduwa,
ikaw si Uldarri, ang babayeng manggugubat
nga nahimugso sa garay sa liboan ka uwan
ug hangin. Ang imong kinabuhi
naglatay sa imong katakos
nga molayat sa nagdulong
nga mga kamatayon. Gitabas nimo
ang mga mangtas. Gilubong-buhi nimo
ang mga malinglahon nga gasalipod
sa tanang dalan
sa imong panaw.

Apan, dinhi niining kalasangan
gatakoban usab ang mga pangpang.
Sama sa ubang manggugubat
dili nimo mahisayran kon
ang usa pa ka paglakang
mohatod kanimo ngadto
sa halayo mong gugma
o mosapnay kanimo
dinha sa kinailadman
diin ikaw motidlom sa hangtod.

Basin na lang unta
niining tungora
dinhi niining kalasangan,
bisan kon ikaw gisamdan,
adunay usa pa kahigayon
nga itugyan kanimo
nga mopauli ngadto
sa imong mga anak
ug mga apo.

Bisan ingon niini
na lang unta,
bisan dinhi na lang
niining dapita
matuis
ang imong
pagbiya.



-- CORAZON M. ALMERINO
Los Angeles, California, USA

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.