11.21.2015

pag-alim


Agoy, dong! Bisa'g unsaon pa nimo paghapuhap
pinaagi sa humot ug humok mong mga pulong
pakapinan pa og pahiyom ug mga gasa, 

dili na siya maghinangol pa. Kining samara
hagbay rang gihunaran sa akong mga luha, 
gibunbonan pa og dinukdok nga tambal

sa pagkalimot ug paghuwat nga makakubal
hulip sa kugan ug dakong uwat nga usahay pod
mongulngol atol sa ting-uwan nga kagabhion.

Ay, sus, dong! Makahubog gyod ra ba intawon 
ang padayong pagyarok sa mefenamic nga asido
bisan gapanilap gihapon si Dr. Kupido. 


-- LOVELY ROSS AI R. MENDOZA 
Talisay City, Cebu, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.