11.17.2015

ang pagbiya


Tutoki ang bungbong.
Ang mga gidibuho nimo niadtong 
bata pa ka hagbay rang napanas,
nakadlit na kini sa delubyo
nga wala nato damha.

Ang atong mga sapatos ug tsinelas,
mga vinyl ug cassette,
mga kaldero ug kalan,
naanod na sa kawanangan.

Kinahanglan na natong
putoson og mantalaan ang mga baso
ug piloon ang mga nabiling sinina
aron isulod sa mga karton.

Buhii ang mga mga handurawan
nga gababag sa gilaraw nga paghawa. 
Karon lang ni. Laomi lang
nga bisan asa man ta mahimutang,
aduna ka'y puloy-anan nako.


-- MAI SANTILLAN
Cagayan de Oro City, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.