sa hampang nga dama

Sa diri ang tansan ukon bato 

nagasugod bilang piyon 

ukon ordinaryo nga tawo, kag ang korona 

ukon ang posisyon nga dama ginahatag lang 

sa sin-o man nga una makadab-ot 

sa pinakasulod nga teritoryo sang kaaway. 

Indi ini pareho sa chess nga sa pagpalagyo 

ang nanalaw nga hari pwede nga makibon 

sang kabayo, rayna, ukon obispo. 

Sa hampang nga dama ang tanan alalangay, 

atubangay ang handusanay sang buno, kag 

ang kadalag-an makuha lang 

kung ang mga kaaway napapas gid tanan. 

Siyempre may ara man mga sitwasyon 

nga nagakasiod sa isa ka higad ang pobre nga piyon, 

pero talagsa lang gid ini. Kalabanan, depende na sa kamot 

nga natagna nga magtulod sa piyon. 

Kag sa tion nga matabo ini, sa kainit kag kaisog 

sang nagatulod, siya kag ang nabilin nga hangaway 

nagaisa, dungan sila nga nagahikog, 

samtang ginakadlawan ang lulubngan. 

-- JONATHAN DAVILA 

Bacolod City, Negros Occidental, Philippines