Bisa'g kinsa pang hulagway ipuli anang kinyentos
mosangko lang gihapon ta'g hinumdom kang Lapu-Lapu
nga luoy kaayo kay usa ka dako lang ang bili bisa'g
siya ang nakaingon nga napildi ang Imperyong Iberyo
sa una ug kataposang gubat sa Kabisay-an
nga gipatik sa kayutaan sa Maktan ang kadaogan
sa mga Bisaya sa wala pa ang kasaysayan sa Pilipinas.
Unsa kaha no kon ang iyang dagway maoy ipuli sa kinyentos?
Dili mahimutang ang iyang diwa nga magtan-aw nga gamiton
ang iyang ngalan sa atong panahon karon sa pagpalit
og mga baroganan nga di gyod mabarogan sa mga uyamot
nga wala pa gyod makasabot hangtod karon unsa
kadungganon ug kabalaanon ang pagpili og matinud-anong
mga datu nga molingkod sa mga trono sa balangay, sa lungsod,
sa dakbayan, sa lalawigan, ug sa mahal tang nasod.
-- JON R. SAGUBAN
Iligan City, Philippines
No comments:
Post a Comment