kagawasan

“Man is the synthesis of the infinite and the finite, the temporal and the eternal, of freedom and necessity...” ― SØREN KIERKEGAARD, Fear and Trembling 

Dihang hapit na molaya 

gikan sa baynte ka tuig nga pagkabilanggo, 

wa siya'y gisultihan—

bisan ang iyang Mayor de selda. 

Gitipigan lamang niya 

ang iyang mga butang: karaang relo, 

karsones, 

sigarilyo, 

bag-ong tsinelas, 

ug bibliya. 

Pagkagabii sa kataposang adlaw, 

misidlak ang iyang panagway. 

Nasayran sa iyang mga kakosa 

ang talagsaong pahiyom— 

karon pa nila nakita. 

Apan napawong kini 

sa kalit nga kasikas sa gawas. 

Mga tiil nga nagdinaganay. 

Tingog sa kagubot. 

Gisulong sa pikas pundok 

ang ilang brigada. 

Migawas si Fredo, 

bitbit ang hinagiban 

nga gilalik gikan sa lata. 

Pito ang gibalitang namatay 

niadtong gabhiona. 

Ug si Fredo— 

nagbuy-od, 

ang mga patik gihiwa- 

hiwa sa puwang tinta— 

tapad sa iyang Mayor de selda, 

sul-ob ang iyang relo, 

ang sigarilyo ug bibliya 

gisuksok sa isig ka bulsa, 

ug wala na’y tsinelas. 

-- KENNETH MICHAEL M. BABA
 

Katherine, Northern Territory, Australia