Lawit kaayo ang tulin sa imong laway,
mora'g tugot sa kiat nga tabanog
nga mopalupad niini nga maghagong
latas sa kabungtoran, sa kadagatan,
hangtod sa kapunawpunawan sa Antartika.
Nunot sa makusog nga hangin
ibabaw sa gubaong bantawan
sa gamayng gambalay sa kabos nga balangay,
midahunog ang imong mga saad,
hangtod sa kapunawpunawan sa Antartika.
‘Nuon ingon niini man ang kinabuhi dinhi sa mga isla
sukad kaniadto, sa pagtunob dinhi ni Pigafetta
hangtod karon nga naghari na si Biden
ug sa umaabot nga mga pangalan,
hangtod sa kapunawpunawan sa Antartika.
Magpabiling lawit ang tulin sa imong laway
ug nunot sa makusog nga hangin
dad-on mo ang liboang tabanog
latas sa kabungtoran, sa kadagatan, sa kasapaan,
hangtod sa kapunawpunawan sa Antartika.
-- JON R. SAGUBAN
Iligan City, Philippines
No comments:
Post a Comment