nahigmata ang mikagiw nga apo sa dagat

J'ai vu des archipels sidéraux ! et des îles
Dont les cieux délirants sont ouverts au vogueur.
--Le Bateau Ivre, Arthur Rimbaud

Unsay pulos sa panaw luwan sa panganod
Kon lawod lang gihapon ang atong padulngan.
Linaw man o gibugha sa bawod, naghambin
Kinig mga tinagoan nga wa koy planong ibilin
Aron lang mabaklag sulod sa iyang ginhawaan,
Kay bisan pa sa pamatuod sa mga bituon
Alang kaniya ako usa ka higpit nga kaaway.


-- VICENTE VIVENCIO BANDILLO
Dubai, United Arab Emirates

duha ka tinagup-at

(hubad sa Iningles ni Marilyn Chin gikan sa Ininsik ni Ho Xuan Huong)















Suso

Si nanay ug si tatay nakaanak og suso.
Gabii ug adlaw nikamang ko sa nanimahong kasagbotan.
Mahal nga prinsipe, kon nahigugma ka nako, ablihi ang ganghaan.
Hunong, ayaw ikulitog imong tudlo sa akong ikog!

Nangka

Ang akong lawas sama sa nangka nga gatabyog sa kahoy.
Sapnot akong panit, dasok akong unod.
Mahal nga prinsipe, kon buot mo akong tugsakon sa imong kuhit
Ayaw pangumot, magtubod unya ko ug maglama imong mga kamot.


-- MICHAEL U. OBENIETA
Topeka, Kansas, USA

kalag-kalag sa olango

Dinhi sa among isla
inig kalagkalag morag magpista--

Atoa ang managtrato
napahipi duol sa nitso.
Sa usa ka daplin dunay usa ka banay
nga nawad-an sa ilang Tatay
nga sa menteryo nagpauraray.

Sa dalan ang mamaligya og mga bulak.
Ilang mga sensilyo nangambak.
Niapil usab ang mga tindera
sa mga kandila nga nangaluya.
Sadya sila sa ilang mga katawa.

Hapit nagbangga ang mga habalhabal
nga sa pasahero nangamoral
bisan hapit na madumbol sa mga traysikol

Sa init sa adlaw sila gipanghilantan
tungod sa pag-ampo usab sa mananabtan
nga gipangbasa ang tanang pangalan
nga napatik sa mga lubong nga hapit natumban.

-- MARIA VICTORIA BELTRAN

Cebu City, Philippines

mga tinagup-at nga balak ni Rumi *

1.
Lakaw ngadto sa atabay.
Tuyok sama nga ang kalibotan ug ang bulan motuyok
libot sa ilang gihigugma.
Kadtong bisan unsa nga molibot nagagikan sa kinatung-an.

2.
Paminaw sa mga presensya sa sulod sa mga balak.
Tugoti’ng dad-on ka nila bisag asa’ng buot ka nilang dad-on.
Sunda ang pribado nilang mga pasumbingay,
Apan ayaw gyod pagbiya sa sulod sa lagwerta.

3.
Nagtanom ako’g mga rosas, apan kon wala ka sila mga tunok.
Nagpusa ako og mga itlog sa peacock. Mga halas ang ilang sulod.
Gitugtog ang alpa, aslom nga honi.
Miadto ako sa ikawalo’ng langit. Kadto mao ang kinaubsang impyerno.

4.
Mga mata. Miingon ka’ng Padayona sila nga magbuka.
Atay. Miingon ka’ng Padayona nga kini maghimo sa iyang buhat.
Mihisgot ako bahin sa tunga-sa-kasingkasing. Nangutana ka Unsa may tua didto?
Dako’ng gugma alang kanimo. Hupti kana alang sa imong kaugalingon.

5.
Ang akong buhat mao ang pagdala sa gugma
nga paghumpay alang niadtong mga gihidlaw kanimo,
pag-adto sa bisa’g asa nga imong gilakwan
ug pagtan-aw sa yuta nga natumpi sa imong mga tunob.

_______________________________________________
* Tinagup-at: quatrain

Gihubad ni:
-- URIAS A. ALMAGRO
New Berlin, Wisconsin, USA

ahedres

Niining natad sa makanunayong bugno
Ayaw ako lisanga sa imong kahuyang.
Kay sa madugay kon sa madali
malukso ra sa akong mga kabayo
ang kahabog sa imong mga tore.
Ug tamaktamakan ko unya
ang haligi sa matumpag mong mga garbo...
(Di ba gihagit mo man ang lugway
ug hunat sa akong pangandoy
ug pakigbisog?)

Ug sa mga bungtod ug patag ning masiot
nga lasang sa waykasiguroan
managpingki ang mga espada
ug bangkaw sa atong mga sundalong pon.
Ug linukoban sa malinis ug matarong
nga taming sa kaigmat, kasinatian
kaalam kun kinaadman,
purilon ko ang pagano mong panalipod...
Kinahanglang mobarog ang takos!
(Sa imong pagsibog, atong mga Obispo
nangiliyupo sa atong pagka-Kristiyanos:
Mahalon ang kaaway!)

Kita mao lamay mga Magdudulang Kabalyero.
Katungod kon katungdanan tang manalipod
sa Hari sa kaugalingon tang Kaugalingon

sa Rayna sa magpakabuhi tang kinabuhi
Apan, unsaon nga naunhan ko man ikaw
og pipila ka mga lakang?
Namati ko mang nalipat mong Pangagpas...
(Ug ikaw magpahilayo kay magtukod
og bag-ong gingharian sa imong
Rayna ug Hari...)

Niining natad sa Kinabuhi ako maghilak:
Kay sa akong pagdaog
Adunay nabuntog.

-- MELQUIADITO M. ALLEGO
Palm Harbor, Florida, USA

ang manggiulawon nga sagbot sa daplin sa dalan

Bisan sa iyang pagkamanggiulawon--
Tungod kay siya usa man ka tunokon
Nga sagbot nga kanunay matumban
Sa mga kabaw, kanding ug baboy--

Siya baya usab nakahimo og tulo
Ka mga bulak diha sa iyang gagmay
nga mga sanga sa daplin sa dalan nga
nanugon nako: Alang kuno ni nimo.

-- RIC S. BASTASA
Katipunan, Zamboanga del Norte, Philippines

ang kamatuoran kuyaw, dili damhon

Ang kamatuoran kuyaw, dili damhon.
Mokalit lag labang sa karsada
Samtang nagmaneho ka sa dyep,
Makapakitbi sa atay, panington kag bugnaw
Inigsagunto sa ligid, inigkapigsat
Sa unod, inigkagupok sa mga bukog,
Inigsidlit sa dugo, makalilisang,
Makapanglimbawot sa balhibo,
Mokalit lang pagbungkag sa paghinanok.
Inigsantop sa hunahuna,
Bisag imo pang ibaktas
Sa udtong tutok
Gikan sa Pier Tres hangtod sa Kamputhaw,
Kay buot mong isipong abog
Tipon sa mga sagbot sa aseras, mokumpayot
Sa sinilas, bisag ihunong
Ug ilantaw sa unahan, bisag ihatod
Sa atubangan sa sinaw nga alampoanan
Sa Santo Rosario, mopatigbabaw
Mosud-ok sa suroksurok,
Mokutkot sa kutokuto, makapahipugwat,
Makapalingkod sa ngilit sa paghitagpilaw,
Bisan sa panahon sa ting-ulan,
Bisan pa sa ting-ab sa kakabos,
Bisan pa sa kahunolhunol sa kaadunahan,
Hangtod manuktuga-ok ang mga hiniktan
Ug mangagilkil ang kusina
Sa imong silingan.

-- RENE ESTELLA AMPER
Boljoon, Cebu, Philippines
__________________________________________________________

Kining balaka usa sa mga balak sa koleksyon ni anhing Dr. Rene Estella Amper nga ang ulohan Payag Ibabaw Sa Hangin. Gihatagan ni Rene og kopya sa orihinal ang iyang suod nga higala nga si Urias A. Almagro. Uban sa dakung pagbulig sa tigdumala niining balayan sa Kabisdak, ikasabwag na gyod kini ngadto sa mga magbabasa sa mga balak sa pinulongang Binisaya.

ang nawala nga adlawng natawhan

Sa iyang pagmata iyang namatikdan nga nawala ang iyang adlawng natawhan. Gipangita niya sa iyang drawer. Wala.

Gikampad niya ang sulod sa iyang pitaka, basig nasulat sa likod sa usa sa mga resibo nga wala niya ilabay kay plano niyang iapil sa BIR raffle. Wala.

Gitagsatagsa niyag hinumdom ang kasamtangan ug ang wa na gamitang mga PIN sa iyang ATM card, ang kasamtangan ug ang wa na gamitang mga passwords sa iyang e-mail address, ug ang mga sangon uban sa kasamtangan ug nanglabayng kauyaban. Wala.

Gibasa niyag usab ang Centuries ni Nostradamus, gitun-an ang mga simbolo, pamasin nga nahilakip ang iyang adlawng natawhan sa kaliboan niining mga tanghaga. Wala.

Ning-adto to siya sa National Library ug gipang-utingkay ang karaang mga libro, magasin, mapa, katalog. Wala.

Nangaliya siya kang San Antonio de Padua nga unta iuli ang iyang adlawng natawhan sa nakapunit ini. Wala.

Gi-Google niya. Wala.

Gipa-feng shui niya. Wala gihapon.

Mao nga gisuroy niya ang tanang siyudad sa tibuok kalibotan.

Usa ka adlaw niana, sa iyang kakapoy, ninghunong siyag lakaw, ningpungko sa daplin, unya dihadiha nahinanok. Sa iyang pagmata nakita niya ang dugay na niyang gipangita, nga gikulit sa giunlan niyang lapida.

-- VICENTE VIVENCIO BANDILLO
Dubai, United Arab Emirates

nahisakop ko didto

(gikan sa Iningles nga hubad ni Carolyn Forché
sa balak ni Mahmoud Darwish)
















Nahisakop ko didto. Duna ko’y daghang panumdoman.
Natawo ko sama sa uban.
Duna ko’y inahan, balay nga daghang bintana, mga laking igsoon, mga higala,
ug selda sa prisohan nga duna’y tugnaw nga bintana! Duna ko’y bawod
nga gisakmit sa mga kanaway, usa ka talan-awon nga akoa ra.
Duna ko’y natuhop nga balilihan. Sa ilawom nga kanawkanaw sa akong pulong,
duna ko’y buwan, kabaskog sa langgam, ug wa’y kamatayong kahoy nga uliba.
Dugay kong nagpuyo sa yuta sa wala pa ang mga tawo gihimong
tukbonon sa mga espada.
Nahisakop ko didto. Dihang ang langit nagbangotan sa iyang inahan,
akong giuli ang langit sa iyang inahan.
Ug nihilak ko aron ang gapauli nga panganod modala sa akong mga luha.
Aron lapason ang mga lagda, nakat-onan nako ang tanang pulong
nga kinahanglanon sa pagsuway nga dugoon.
Nakat-onan ug nabungkag nako ang tanang mga pulong aron kuhaon
gikan niini ang usa ka pulong: Pinuy-anan.


-- MICHAEL U. OBENIETA
Topeka, Kansas, USA

sa tugkaran sa eskuylahan

See me and Julio down by the schoolyard...
-- gikan sa awit Paul Simon
















Nagpadayon si Paul Simon sa iyang pagkanta:
Pakigkitai kami ni Julio
Didto sa tugkaran sa eskuylahan.
Ug ingon man ako motugon ngadto kanimo,
Tana, magkita kita pag-usab
Niadtong wanang sa ninggraduwar tang kabatan-on.
Di na kita mangibot pa og mga amorsiko
O mobungso sa atong mga kasing.
Di na kita mosiatik sa atong mga dyolin
O mouyog sa mga sanga sa manga
Aron pagpamulot og mga bakukang.
Wa na didto ang mga papel nga atong gikumot,
Wa nay tinahal sa atong mga lapis,
Wa nay mga panit sa mani,
Wa nay mga putos sa karmilitos.
Apan magkita lang gihapon kita didto
Kay buot kong ato pang duawon
Kadtong kalibutang dugay na natong gitalikdan.
Buot kong usbon ta pagsunod
Kadtong yano ug binata niyang mga balaod,
Nga bisan sa pagpanglabay sa mga katuigan
Nagpabiling way pag-ilis, way pagkabalhin;
Kay didto-- kaniadto, karon ug sa kahangtoran--
Sa kanunay magpabiling:
Ang papel moputos sa bato.
Ang gunting motabas sa papel
Ug ang bato mogibang sa gunting.


-- URIAS A. ALMAGRO
New Berlin, Wisconsin, USA

ang katabang sa alas syete sa buntag

Lingkod sa hagdan. Sa ika-pito nga ang-ang.
Tan-awa ang karsada nga gaabog. Palayo na
Silang tanan. Su’d sa kotse sa ilang amahan.
Imong amo. Ikaw na lang usa karong orasaha.

Basa pa ang imong kamot sa paghugas
Sa ilang plato. Gipaningot ang imong agtang.
Giigang ang trapo sa kamot. Imong gipahid
Sa imong mga kahago. Karong mopahulay ka

Sa makadiyot, dili ka motan-aw sa TV
Ug maghinambid. Dili ka kasabot sa dagan
Sa panahon. Sa politika. Naglibog ka kon
Nganong sige silang nag-away. Nag-Tinagalog.
Nag-Iningles. Ang imong kamot luya samtang
Wala pay gibuhat. Pahulay sa makadiyot.
Paghinuktok. Paghunahuna sa kabaw sa bukid.
Nahurot na ang sagbot sa hulaw. Nauga na
Ang tubig sa suba. Nagratatat ang tingog
Sa mga nalaya nga dahon. Gubot usab didto.
Nag-away ang mga rebelde ug sundalo.

Napusilan ang imong bana. Namatay
Ang imong tatay. Ang imong anak nga lalaki
Nasakit. Ang imong anak nga babaye
Sulugoon usab sa pikas nga lungsod.

Hangtod kanus-a ba mahuman ang tanan?
Humana ang pahulay. Motindog dayon ka.
Maglampaso sa hagdan. Maghumol sa bulingon
Magtigom og tubig. Maglata ug tiil sa baka.

Walay kahumanan ang tanan. Gikusi mo
Ang ilong sa radyo. Karon ikaw ra usa
Mamati sa drama. Moduyog sa kinahon
Nga kamingaw ug kasakit. Moiyak ka’g apil.
Ug sila nga makadungog sa imong bakho
Sa pikas nga balay, moingon nga ikaw
Nga bag-ong katabang, medyo may pagkabuang.
Mitulo ang imong mga luha sagol sa nilabhan.
Walay sapayan. Makakaon ka na ug katulo
Sa matag adlaw. Walay pasayan.


-- RIC S. BASTASA
Katipunan, Zamboanga del Norte, Philippines

isaad ni obama ang tanan

Kon mahimo pa gani
ang mga bitoon ug bulan ni Michelle
Pamub-an kuno niya ang buhis
sa mga ordinaryong tawo
Bahinon ang kayamanan
ug kinaiyanhong hinguhaan (sosyalismo)

Upod usbawan ang buhis
sa mga kugihang nadato (patriyotismo ni Biden)
Padad-an og tseke ang mga taspokang
nagsalig lang sa gobyerno (welfare)

Isaad ni Obama ang tanan
lakip ang sagradong bandera nga gitumban
ni William Ayers
lakip ang manok nga mipugad sa pulpito
ni Jeremy Wright

Kita ang mahibalo sa Nobyembre kwatro.


-- MELQUIADITO M. ALLEGO
Palm Harbor, Florida, USA

ang pasyente sa lawak-angkanan

Nagkahinabi kita bahin sa gubat sa Vietnam
diha sa talad-angkanan; ang mga sibilyan
nga nagadugo sa humayan, ang mga tiil
sa mga bata nga nangapunggot maoy diha
sa imong mga ngabil samtang mibusog
ang imong tago-angkan. Himasa ka tingali,
bisan nga nagbilangkad ka
sa akong atubangan. Ang imong bana
way kaikog. Ug sa dihang miuha
ang triplet sa imong sabakan,
dakong balita! Sa dihang gihinay
ko pagpahimugso ang imong inunlan sama
sa usa ka balak, nahinumdom ako
sa atong mga kadugo nga nangapokan
sa Bataan ug Corregidor aron itampo
ang pipila ka tudling alang
sa kasaysayan sa Ikaduhang Gubat.
Sa dihang akong gisursihan ang imong gisi,
gidayhop ang akong kasingkasing
tungod sa mga bana kang kansang kinatawo
nanubo samag kadagko sa dinosaur
ug nahimo na lamang talan-awon sa Museum;
ug sa mga asawang pansil nag tago-angkan,
siging nangandoy nga adunay mokatkat
sa tuhod ug mogakos sa liog ug mohalok
sa aping matag gabii sa dayong pangatulog;
ug sa kataposan tungod sa mga binhi
nga napasapasa sa kasilyas ug sa mga ngi-ob
nga agianan; ug kadtong nanghisaling-it sa IUD.
Sa dayon na nimong panghipos, imo na untang
isulat ang akong ngalan sa imong diary,
apan miabot ang imong bana
ug iya akong gilamano.

-- RENE ESTELLA AMPER
Boljoon, Cebu, Philippines
________________________________________________________
Kining balaka usa sa mga balak sa koleksyon ni anhing Dr. Rene Estella Amper nga ang ulohan Payag Ibabaw Sa Hangin. Gihatagan ni Rene og kopya sa orihinal ang iyang suod nga higala nga si Urias A. Almagro. Uban sa dakung pagbulig sa tigdumala niining balayan sa Kabisdak, ikasabwag na gyod kini ngadto sa mga magbabasa sa mga balak sa pinulongang Binisaya.

duha ka interpretasyon sa paghingilin sa alagad sa diyos

1

Dili niya mahimong pasagdan ang langit
bisag mosaghid kini sa iyang nawong
ug motuhop sa ngiob ug hilan
nga mga suok sa iyang panumdoman.


2

Dili siya mahimong mobalik
ngadto sa walog sa iyang kahadlok
diin ang salag sa tagak nga panganod
namiyuos sama sa usa ka manulonda.

-- VICENTE VIVENCIO BANDILLO
Dubai, United Arab Emirates

kadtong among convoy padulong sa chicago

Gisilaban among dila
pag-agi namo sa Des Moines, Iowa
diin nakurat tingali ang demonyo
sa lumpayat sa among kahingangha: “Hala, snow!”

Nanganaog mi sa among sakyanan, ug gilamoy
ang among mga tiil sa wanang nga kagubkob
ug lapaw sa among kahinam. Bisa’g gikitkit sa katugnaw
ug galinog among ngipon, gatingsi gihapon mi
sa kumbira sa among tagsa-tagsa ka camera.

Mao kadto ang unang pagtilaw namo
sa kabugnaw nga hagbay ra
naatsara sa tam-is nga handuraw
gikan sa naandang ting-init. Nilabay

ang mga adlaw, nahunit suksok
sa puti nga langob sa winter. Ug samtang kini

karon gakamang pagbalik, samtang gibuldosir
sa hangin ang mga kadahonan nga gahuwat
sa usa ka bahog-bahog sa daob, gibati ko
ang kauhaw sa mga kaingero nga gihinginlan
gikan sa tungason nga mga disyerto didto
diin gabukal kanunay ang dugo
sa mga mangingihaw sa Lorega

samtang ang katugnaw usa ka gautnga
nga kabaw, gadaro sa uyokan sa akong
kabukogan hangtod mangugat akong liog
ug mokagot akong ngipon sa kalami
sa pagsinggit og “Sunog!”


-- MICHAEL U. OBENIETA
Topeka, Kansas, USA

ikatulong mga awit sa dagat

Nakadungog ka sa mga awit ni Salamia?
Ug nitadlas ang akong garay sa mabulokong dagat
Sa mga saysay sa mga alamat sa mga Sama
Ug sa mga tigmo kabahin sa mga pulau Sama
Ug akong nakita ang maanyag nga si Salamia,
Ang mga hait nga mga sundang sa mga manggugubat
Taliwala sa kadagatan sa Palawan ug Borneo
Ang mga tanghaga sa perlas ni Lao Tzu,
Ug gibayaw sa langit ang mga awit
Gikan sa kahiladman sa dagat.
Adunay awit ang pinitik sa kahiladman
Nga giduyan sa mga balod
Sama sa mga awit ni Salamia
Nga gilaylay sa mga kagabhion
Nga patay ang bulan ug mga bituon
Sama sa mga kagabhiong nanglayag ang mga garay
Gikan sa bilahan sa Ilana ngadto pahiubos
Ngadto sa Sulu, Borneo, pulau Sibu ug Malacca
Kuyog sa naghaguros nga habagat
Akong nakita ang mga isdang bato
Nga naglangoy sa dagat sa politika.
Akong nakita ang mga dugo sa kampilan
Akong nadungog ang mga awit sa dagat
Nga sama sa mga tingog sa mga bata
Nga sa lapyahan nanagduwa-duwa
Og nabati ko ang pinitik sa kahiladman
Sa daw walay katugkaran nga kahaw-ang
Sa mga awit ni Salamia

Taliwala sa mabulokong

Kadagatan sa Cebu ug Borneo.


-- LEO BOB FLORES
Bukit Batok, Singapore

sa ibabaw niadtong taas nga taytayan sa cuyahoga

Ang tungang gabii
mao ray misugat kanako
niadtong akong paglusad
sa Hopkins Airport sa Cleveland, Ohio.
Daw maoy unang nakighimamat
sa langyaw kong kasingkasing
ang paglamano sa katingala
sa gidak-on ug gitas-on
sa mga butang
niadtong lapad nga syudad.
Ang layog nga mga edipisyo
daw buot mosangko
ngadto sa tin-aw’ng kalangitan
ug ang ilang mga suga
daw way paghikatulog
ug nagpadayon sa ilang pagpakig-indig
sa pagkiblatkiblat
sa mga bituon.
Unya sa akong pagpadulong
sa sayo’ng kaadlawon
ngadto sa dapit nga bag-o kong puy-an
didto sa Lorain,
akong ning-agian sa unang higayon
kadtong taas nga taytayan sa Cuyahoga.
Sa una kong paghikita niadtong taytayana
misantop sa akong hunahuna
nga kon adto ako magsukad
didto sa iyang ubos
ug adto ko didto tan-awa
gikan sa ibabaw sa ngitngit nga tubig
kadtong taytayana daw moabot na
ngadto sa mga panganod.
Apan dihang didto na ako
sa tungatunga sa iyang ibabaw
ug unya ako miyangod
maoy akong nakit-an
nga sama ra gihapon
ang gilay-on
gikan didto
og ngadto sa kabituonan.

-- URIAS A. ALMAGRO
New Berlin, Wisconsin, USA

katingala sa usa ka suban-on

Lahi ang ilang suba dinhi
Morag banig naglukotlukot.
Lahi ang ilang mga ginamos--
Kamaong molangoy sa suba.

Lahi ang ilang pagpanikma dinhi
Kay puston man sa puti nga panyo.
Lahi ang ilang kasilyas dinhi
Kay tagoan man pag-ayo ang tae.

Sa atoa, ang sikma alang
Sa mga hulmigas. Gutom sila.
Ang mga tae para sa atong
Mga gasuroysuroy nga baktin
Gutom usab sila. Ang suba dili
Magsaba. Hadlok sila sa mga
Tingog sa pusil. Ang atong
Mga isda dili asgad. Dili
Laog sa asin. Lahi sila dinhi

Sa ilang lungsod. Halab sila.
Gamayng sipyat nako, bunal
sa kuptanan sa silhig. Singka.
Sagpa. Sa ato, pagkahilom

Sa mga kahoy sa bukid.
Walay kamot nga managpa.
Walay mga aso sa sigarilyo
Ug ispirito sa bino
Nga mopatay diay og tawo.


-- RIC S. BASTASA
Katipunan, Zamboanga del Norte, Philippines

alimungaw sa agusto

(alang kang Omar Khalid)

... usahay, ang mga kaadlawon sa Agosto magaul-og
sa mga kuyabog sa kabuntagon og mga damgong
nagduhiraw sa ilang lulid nga katumanan ug
katinuoran--

... niini, pangitaon sa damgo ang bayanan, ang
dugtong o sumpay, ang ilang kinatibuk-ang lalang
sa mga lusok sa yamog nga manibug-ok sa lamurok
nga kaapingan sa lunhawng kadahonan, sa pahiyom
sa humot kabulakan, sa kandiis sa masuyopong lilo
sa mga alimpulos sa udtong tutok--

... ug hipalgan nila ang ilang mga hinagawhaw sa
yinagubyob sa daligdig sa mga tubig, sa dagayday
sa busay ug mga kasapaan, sa hinaganas ug tapyatapya
sa mga balod, sa kinanaas sa mga kadahonang
gitagsa-tagsa pagpakli sa hilabtanong hutuhot--

... pagabatian nila ang ilang mga salimuang, dagaw,
panghupaw, pangagho, panghayhay ug pangindahay
sa sungo sa nagsalomang kalanggaman ug sa hinadyong
sa palabad sa mga tabanog nga buot makigtigi ug
makig-indig sa kaigmat ug kalagsik sa mga
tugahalan-ong kumpisaw--

... oo, mga kumpisaw nga daw naggunting sa
bughawng langit ug gapasong panganod nga
giwalingwaling ug giutaw-utaw sa mabulhotong
hangin nga di makita, di maagpas sa punting
sa masuhirong mata--

... sa kaulahian, sa dihang ang banagbanag sa
kabuntagon tunawon ngadto sa lagiting nga
kasanag sa kaudtohon ug ang kalayo nga mihilos
sa nagabagang udto subhan na sa bugnawng taghoy
sa huyohoy sa gitinang kahaponon--

... king mga damgo makaamgo nga diay ang ilang
mga sinugdanan ug kataposan mga hulad lamang sa
mga inalisngaw sa mga pangandoyng mabulokon ug
lalang sa mga hinanok, nga diay sila mga tipik
lang sa alimungaw sa Agusto!

-- MELQUIADITO M. ALLEGO
Palm Harbor, Florida, USA

ang kalibotan kong walking distance: diha sa pulong diin ako matinud-anon

SULAYSAY

Dalang Ramos, udtong tutok. Nagrakenrol ang akong tiyan samtang nangita og ATM. Ug tuod, sa unahan, ang BDO adunay ATM sa gawas niini, bakante. Tambag nila dakong usik sa kwarta kon adto ka mo-withdraw sa ATM sa laing bangko. Paksian og diyot nga charge, matud pa. Apan, unsaon ta man, gahi’g ulo. Tomguts na pud.

P500 lang, igo na nis paniudto ug pamiliti kon asa man ko ilabyog sa akong puol. Sa wala pa ko nahuman sa akong transaksyon, adunay gamayng kasikas sa atbang. Usa ka bulingit nga bata gialirongan og tulo ka gwardiya ug duha ka pulis. Pipila usab ang mga lumalabay nga nasangit sa maong kasikas. Sa akong luyo, naay tawong nagyawyaw, “Mao lang gyapon, di na mapriso. Minor gud na,” matud pa sa maong tawo.

Mitabok kos dalan ug miduol sa nagtapok, nag-anam og kakusog ang danguyngoy sa bata. Naghilak kini samtang nagkupot sa duha ka puthaw nga tubu nga giyatakan masigkatumoy sa duha ka gwardiya. Nagtiyabaw nga mihangyo ang bata, “Ako-a lagi ni, kuya. Wa ko ni kawata,” pakiluoy pa niya... PADAYON PAGBASA pinaagi sa pagpindot sa ngalan sa magsusulat sa ubos.


-- JANUAR E. YAP
Cebu City, Philippines