kon gusto kang dili magmahay

“For the happiest life, days should be rigorously planned,
nights left open to chance.” –Mignon McLaughlin

Imong adlaw planoha, imong gabii pasagdi.
Paghumol didto sa humok ug basa nga kangitngit—
Tagamtama ang wa pa nimo sukad kahinayki.
Imong adlaw planoha, imong gabii pasagdi,
Bahalag asa ka mahiadto o mahianhi,
Mabalian mag bukog o mapaksitan og panit.
Imong adlaw planoha, imong gabii pasagdi.
Paghumol didto—sa humok ug basa nga kangitngit!

-- VICENTE VIVENCIO BANDILLO

Dubai, United Arab Emirates

tinghulaw nga pagtultol sa tubod gikan galibod-suroy sa mga dapit nga langyaw

Mahimo nga mangaw-it
imong kaugalingong dila
diha sa ibabaw nga ngabil—mapaksit
ug maughan sa laway sa pagtungas
balik sa nataran sa mga sip-onon
nga talidhay. Layo na ka’g naabtan,
apan ang imong mga tikang mahimong
duol ra sa dulhogon nga pagkaligid
sa kimpang. Lagmit diha sa imong tiilan
siya mahidangat. Kon ikaw mangutana
kon hain na ang mga umahan, kalit
kang uhawon sa iyang tubag sumpay
sa kahilom subay sa mga mugbo
nga bungtod sa mga patay, gitultol
sa iyang pinabudlot nga simod. Tua
didto. Igo ra tingali kang motingsi,
ug makahibalo na gyod ngano uroy
mangliki ang samin, ug ikaw
mabungi sa imong pag-asoy.


-- MICHAEL U. OBENIETA
Topeka, Kansas, USA

hulagway sa usa ka pagbiya

dako nga punoan sa kahoy
tul-id og taas kaayo nga agianan

usa ka anino nga imong maingon

nga nagpaingon didto sa padulngan

sa paspas kaayo nga mga tikang
wala na mananghid

gapas nga mga panganod
gahidhid sa samad sa kahaponon
kasub-anan nagpunay og dugo

walay tambal nga mag-igo

-- RIC S. BASTASA

Katipunan, Zamboanga del Norte, Philippines

nobyembre

Ang mga adlaw sa Noyembre,
matod pa ni Herman Melville,
moabot sa hinay nganhi
sa atong mga kalag.
Ug maoy atong mabati
ang umog nga kangitngit
nga modulot
lagbas sa panit
sa atong kasingkasing.
Ang mga dahon
sa mga sanga sa atong balatian
uyogon sa hangin
sa kahadlok,
ug ang atong mga kamot
mohakgom,
mogunit og kusog,
apan mao ray hikuptan
ang sama’ng mga kamot
sa kawad-on.

-- URIAS A. ALMAGRO
New Berlin, Wisconsin, USA

ako

(hubad sa balak ni Chairil Anwar)

Kon moabot na ang akong panahon
Gusto kong way mawili kanako
Bisan ikaw

Dili na kinahanglan ang mga bakho'g luha

Ako usa lang ka ihas nga mananap
Nga nahabuwag sa panon

Bisan modu't ang bala sa akong panit
Ako magpadayong maglakawng mapagarbuhon

Ang mga samad ug hilo mopaak
Mopaak ang kasakit apan kini mahanaw

Ug kini di ko igsapayan
Tungod kay buot kong mabuhi
Sa laing liboan pang katuigan.


-- LEO BOB FLORES
Bukit Batok, Singapore

kaniya nga naghimaraot kanako

pasayloa ko
apan bisag unsaon
wa koy mahinumdoman kabahin nimo
wa ko kaila nimo apan sigi
ingnon ta lang
nga ako ang nagkulang
kay matod mo nahinumdom ka man
unya naa pa gyod kay mga saksi
nga ikapaatubang
tinuod mas tin-aw ang panumdoman
sa labawng nasakitan
apan kon sa kaunay mong paghinumdom
nagdahom ka nga mahiusa
ang kagahapon ug karon
basig nasayop ka
kon kalimtan mo lang
kaha ang imong kasilo
bisan sa makadiyot lang
basig makaamgo ka
nga ang gihambin mong kaligutgot
gipakabuhi lamang sa imong gugma
sa kaugalingon
ug dili sa kayugot kaniya
nga hagbay rang mibiya
ug midawat sa kamatuoran
nga ang iyang kahimtang way kalainan
sa gidangatan sa uban

-- VICENTE VIVENCIO BANDILLO

Dubai, United Arab Emirates

gamay nga babaye

(hubad sa balak ni Hassan Najmi)

Sa uwanon nga gabii gabarog siya nga gahilak.

Sama sa wa'y panalipod nga uwan siya gadanguyngoy.

Wala nako giaswat akong mata gikan sa libro.

Ug wala nako pahiri ang iyang mga luha.

Sa wala pa ko mahinanok

Nagpakita siya sa katapusang anib sa nobela.

Aron dili makahilak

Gitak-op nako ang libro, ug akong ulo sa unlan.

-- MICHAEL U. OBENIETA
Topeka, Kansas, USA

kunilinguist

"The Great Medicine of the Three Mountain Peaks is to be found in the body of the woman and is composed of three juices, or essences: one from the woman's mouth, another from her breasts, and the third, the most powerful, from the Grotto of the White Tiger, which is at the Peak of the Purple Mushroom (the mons veneris)." -- Octavio Paz, Conjunctions and Disjunctions.

Kanang G-spot
mao ang Groto sa Puti nga Tigre
nga mao usab ang Tumoy sa Dinorado nga Ligbos.

Buot niya nga adtoon ang tulo ka langob
sa imong kalipay, diha
sa imong baba, diha
sa imong tutoy, diha
sa balayan sa imong kinhason.

Andig andig sa Andes Andes
nga sa dihang nabyudo na si Papa
ug naghandom kang Mama

miingon siya nga kadtong kinhasona
maingon ingon gayod.


-- RIC S. BASTASA
Katipunan, Zamboanga del Norte, Philippines

ruba'iyat ni Fernando Pessoa

Ang kasakit mosunod sa kalipay, nga mosunod usab sa kasakit.
Karong adlawa moinom kita sa bino sa pagsaulog,
Ugma moinom kita sa bino kay kita naguol.
Apan wala niining duha ka bino ang mahibilin kanato.

Ang kinatibuk-an sa uniberso usa ka laing butang,
Ug ang pagwadwad, sama sa mga patay’ng lusay o nahulog nga mga dahon,
Molutaw sa ibabaw sa kawad-on. Usa ka gamay’ng hangin
Moukyab sa tubig og dyutay, ug kini mao ang kinabuhi.

Kon ikaw, sama sa tanang makita’ng mga butang, mamatay man,
Ang pagkabuhi og trayenta anyos o usa ka gatos
Pareho ra. Inom ug paghikalimot. Iluwa ang paglaom,
Isuka ang kaluoy, ug iihi ang pagtuo.

Ang kinabuhi mao ang kalibotan, ug ang pagkabuhi niini usa ka lapok.
Ang tanan urog, kalainan o paagi.
Sa tanan nga imong buhaton pagpabilin nga ikaw ra gyod.
Sa tanan nga imong buhaton pagpabilin nga ikaw tibuok kanimo.

Paghubad ni:
-- URIAS A. ALMAGRO
New Berlin, Wisconsin, USA

politika

Talena Talena ang kabaw balhina
Torotot torotot ang tiyan niburot.
Bisan ang kabaw pagabistihag piskay
Ang tunaan lang gihapon ang kalipay.


-- LEO BOB FLORES
Bukit Batok, Singapore

sa akong tagpilaw daplin sa sapa nagdamgo ko nga nahiuli human molabay ang di-maihap nga katuigan

biya karon karon dayon
kadugo nga nagtakoban
sinati pa gihapon namo ang pitik
sa imong kasingkasing
nasayod ang tanan nga ikaw kini
bisan tuod dili katuhoan
nga makaako ka pagpauli
atol sa adlaw mong natawhan
apan kon nakabaton ka nag kaisog
pagpakita bisan isip dumuduong
nan ikaw dili na ikaw
ug wa kay katagbaw nga ikadalit kanamo
sa imong bationg kasakit
sa among pagsalikway kanimo

-- VICENTE VIVENCIO BANDILLO

Dubai, United Arab, Emirates

mga panganod

(hubad sa balak ni Sladan Lipovec)

paghubit sa mga panganod

ikaw kinahanglang magdali

kay paspas kaayo ang ilang pagkausab

sama sa gisulti ni zymborska

ug ang banay

mahimong mahanaw

sa usa ka gutling

sama sa banay sa mga panganod

mao nga kinahanglang suwaton nimo

nga paspas ug sa tanang higayon

inig suwat nimo kabahin sa mga panganod ug mga tawo

aron ang idlas nga tabas sa mga pulong

dili magsunod og usa ka

tabas nga mabalhinon

apan maghubit

sa labing gamay

nga arko sa gakabuang nga lingin

diin ang tanan

nagtuyoktuyok

sa kalami sa yano

nga pagpakabuhi palami

ug wala'y kaharuhay

-- MICHAEL U. OBENIETA

Topeka, Kansas, USA

sularawan ug uban pang dakbayanong kahidlaw

(kang mananambalak Mel ug Urias sa ilang daklitpanaw destinasyon sugbo)

ilimod ba sa naglabyog-labyog nga kurtina
sa silong ang gibuhat nga buot pasaksihan
sa mga matang mahidlawon sa kaadlawon?
pastilan, kaayo rang klikan sa kamera
iladlad sa aseras sa colon,
ang inyong paghubo, ang inyong pagpanghikap
sa kurbada ug bugan sa babayeng kuragan ginganlan natong
tanan og balak.

nyor, daghan baya gihapong kanahan magbalak-balak
sa leon kilat (kuydawog sa junquera, ha):
tingalig naa pa ang karaang
katawa ni fidel mag-usara
sama adtong pagpunay niyag kulitog
sa gubaong relo; ug si erning
sab adtong panahona wa pa magkinahanglag pustiso
ug kinsay manumbaling sa habuhabo kon nakiglips-to-lips
ang magbabalak sa iyang anino?
samtang ang mga eheres nga tigpatanto—sus, wa lang—
naghayon-hayon lang. mora lag way
nahitabo. wa lang sila masayod kon unsa kapino sa
inyong mga kiyod. unsa katam-is sa inyong laway. unsa gyoy
kapuslanan sa tanduay.

kon magtukod mog simbahan,
hinaot ako ang unang disipulo
morag malangit na tingali ko kay
nahinol ko na man ang dinunggaban sa
kilid sa akong kristo niadtong usa ka adlaw—
usa ka adlaw nga ako miinom sa
gitagay ninyong apdo.


-- OMAR KHALID
Medellin, Cebu, Philippines

ang pula’ng karetilya

(hubad sa balak ni William Carlos Williams)
















dako kaayo ang magsalig
sa

pula’ng kare-
tilya

nga gipasinaw sa tubig
sa ulan

tupad sa puti’ng
mga manok.


Gihubad ni:
-- URIAS A. ALMAGRO
New Berlin, Wisconsin, USA

salamin

puti nga lotus
ibabaw sa tubig

naglutaw mibuswak sa usa

ka sayo nga buntag sa Pebrero

mitapad ka ug mihawid sa tubig

ang imong wala nga kamot

mihikap ang imong mga tudlo

sa usa ka tin-aw nga panglantaw

nagpakaaron-ingnon ka

sa atubangan sa usa ka salamin

gibahin nimo ang imong anino
usa sa ilalom usa sa ibabaw

katunga lang ang imong ikahatag
diha sa mga kamot sa kamatuoran

-- RIC S.BASTASA

Katipunan, Zamboanga del Norte, Philippines

gikan sa tanjong pagar, exit na sad si joy ngadto sa jb

Gikan sa Sg* nagtuyoktuyok
Nagsinaw ang kahait sa kasakit
Hait ang bulok sa kahadlok
Sg, JB* ug Batam* nagbalikbalik

Nagsinaw ang kahait sa kasakit
Hait ang bulok sa kahadlok
JB, Batam og Sg nagbalikbalik
Gikan sa Sg nagtuyoktuyok

_______________________________
* JB : ang tawag sa mga Pinoy sa Johor Bahru;
usa ka lugar sa Malaysia nga atbang ug doul ra kaayo sa Singapura
* Sg : tawag sa mga pinoy sa Singapura
* Batam : lugar sa Indonesia nga atbang ug doul ra kaayo sa Sg.

-- LEO BOB FLORES

Bukit Batok, Singapore

takulahaw

(yukbo kang Yannis Ritsos)

Way timik ang kagabhion. Way timik. Ug nakahukom kang
dili na pagpaabot. Morag hapit na mohugpa ang kahilom.
Unya takulahaw lang midapat sa imong nawong ang lalim
nga hapuhap kaniya nga wa dinha. Moabot ra siya. Dayon
nabati mo nga milamba ang sira sa bintana bisag wa hilabti.
Dihay huyuhoy nga misulbong. Unya sa unahan, dulhog og
diyutay, ang dagat nalumos sa kaugalingon niyang tingog.

-- VICENTE VIVENCIO BANDILLO

Dubai, United Arab Emirates

alang sa dalagang amerkana nga akong gikatupad sa eroplano

Dili nimo ni mabasa. Dili ko
mahibu’ng kon wala’y nahabilin
niadtong higayon sa atong hinanali
nga paghimamat. Wala gani ta
mag-ilhanay.Wala ta’y laing gitug-an
gawas sa dalikyat nga pagmatuod
nga dili ta mga ihalas. Patapsing
nga pahiyom. Tando-tando
sa mga pangutanang gatuhik-tuhik
sa mumho sa atong gisaw-an nga
kahilom. Wala’y pulos-- panamilit
nga lahos sa kalimot. Igo na
kining akong nahibal-an: Bisan
gatapad atong gilingkoran, gasaghid
gani ang kilid sa atong tuhod, layo
ug lahi ang atong padulngan. Apan
inig dangat nako ngadto sa tuldok
sa tumoy niining panghupaw,
mapamatud-an nako nga dili diay
tinuod nga nahisulat sa hangin
ang tanan. Kini dili kawang.


-- MICHAEL U. OBENIETA
Topeka, Kansas, USA

ang kataposang rosa

(hubad sa balak ni Anna Akhmatova)

"Mosulat ka bahin kanato nga usa ka pihig."
-- J. Brodsky

Moyukbo ako uban kang Morozova,
Mosayaw uban sa humabdos nga babaye ni Herodes,
Molupad uban sa aso gikan sa kalayo ni Dido,
Unya mobalik ngadto sa daob nga misunog kang Juana de Arco.

Ginoo! Imong nakit-an nga ako gikapoy
Sa pagkabuhi ug pagkamatay ug pagkabanhaw.
Kuhaa ang tanan, apan itugot nga akong mabati
Pag-usab ang kalab-as ning pula nga rosa.

Gihubad ni:
-- URIAS A. ALMAGRO

New Berlin, Wisconsin, USA

sultan ampay

Tin-aw ang suwab sa kapintas
Tataw ang mutya sa sultan sa kaparat
Ang panagway sa dila napapas
Niunlod ang nasod sa dagat.

Niunlod ang sud-an sa dagat
Ang panagway sa dila napapas
Tataw ang mutya sa sultan sa kaparat
Tin-aw ang bawos sa kapintas.

-- LEO BOB FLORES

Bukit Batok, Singapore