didto kuno ta sa usa ka siyudad
udtong tutok apan bugnaw ang hangin
nanglabang ta sa kalsada
diin nagkaguliyang ang nagpanon ang mga tawo
apan wala tay gibating kabalaka
nagbaguod ta sa mga libro
nga atong napalit sa daplindaplin
hawoy ang bukton giluthan sa taman ang lapalapa
singot nagtubod sa agtang ug ilong
apan tugob ta sa kahimuot
nagsigi tag pangatawa
hangtod naabot na ta sa atong gisak-an
nagpabugnaw ta sa lobby
akoa beer imoha apple juice
nagtupad ta atubang sa gawas
gisaka nimo ang imong tiil sa lamesa ug mipahiyom
kahibawo ko unsay imong gihunahuna
gisudlay ko ang imong buhok sa akong mga tudlo
misandig ka nako ug nagdungan tag hangad sa kisame
diin dihay kahayag nga misakdap
uban sa langgam nga mikidlap
nga sa walay kukaluoy
mitiklop sa telon sa akong handuraw
-- VICENTE VIVENCIO BANDILLO
Koror, Palau
4 comments:
maayong adlaw 'bay inting.
daghan kog makat-onan sa imong balak
nga kabahin sa zahir.
isunod ang Aleph, palihog.
Mas bug-at (read: ambisyoso)
ang tema sa aleph, Bay Ric, morag wa koy correlative ani to my personal experience. Gawas pa, tinapolan ning akong sinulatan, wa ni aleph-aleph. :)
Maayong hapon sab diha.
bay inting,
kon tinapulan nang imong pagsulat
nga haskang nindota na gani
unsa na lang kaha ang
dili-tinapulan noh?
ha ha. bitaw lingaw lingaw lang sab ning ako.
mosulay kog relate sa Aleph.Puhon.
bahala na.
mayong buntag ig,
sulayi daw og himog balak si
tem adlawan
kay akong basahon.
Post a Comment