Abi nako kaniadto
Si Lola Edel ang tag-iya sa dagat didto
Sa Can-adieng sa Ormoc City.
Lapad kini ug dali ang pakli sa hunas ug taob;
Hamis ang baybayon diri sa duol
Apan batoon didto sa unahan.
Usa kini ka parke sa kinhason ug sa manginhas.
Dagat usab kini nga salawayon.
Kon motaob moabot sa alad sa baboy ug
Sa paglimpyo manglutaw ang ilang mga hugaw.
Maabtan usab sa dagat ang mga biya sa tawo.
Wala nako damha nga mapadpad ko didto
Sa lugar nga ang baybayon ug dagat among silingan;
Abi lagi nako lakip sa yuta ni Lola Edel.
Sa pagsugod maglisod ko’g katulog kay
Kanunay ang hapyod sa hagawhaw sa bawod
Apan sa pag-uli nako sa syudad
Dili na sab ko mahinanok
Kay wala nay bawod nga muhimog sonata
Samtang siya naglutaw.
Mabati lang nako ang labihang kamingaw.
Sa pagbalik nako didto akong gisuta
Kon may sama pa ba niini karon.
Tinuod, aduna pa’y dagat ug baybayon ug
Akong gipangita si Lola Edel.
Wala na man siya didto apan
Ania siya dinhi sa akong panumdoman--
Ang milahutay sa kanunay’ng pagbugsay.
Ang mga kamot ni Lola Edel ako pang magunitan
Samtang siya mag-ipis og usa ka bol nga tuba
Didto sa gamay niyang tindahan
O kaha, mogunting og pila ka pirasong kandila
Alang sa managkot didto sa menteryo.
Wala pa malumsi sa kalimot
Ang pamayhon ni Lola Edel.
Ang iyang tingog mupukaw kanako:
Iday, Iday! Bangon!
Manihapon na kita;
Ania’y sabaw sa mais akong giluto!
Lami kini, Iday! Dali!
Kadtong dagat sa Can-adieng didto sa Ormoc
Wala nako masuta ang paghampas sa bakat ug banakod.
Tungod ba kaha kay wala man ko’y naabtan nga bagyo.
Sa akong pagsawom sa kinabuhi, usa sa akong salbabida
Ang tag-iya sa dagat didto. Si Man Edel, akong lola!
-- MALOU ALORRO
Cebu City, Philippines
No comments:
Post a Comment