6.03.2011

inig lurang sa huwaw


Ikaw
Nga gaantaw nako
Dinhi sa tiilan
Sa imong anino
Nagpabiling habog.

Bisan ang mga tipaka
Sa mga nangapulpog mong
Mga damgo
Nagdumili sa pagkadugta.
Nakiglayog sa pagkadunot.

Sige, pasagdan ko ikaw.

Mahimong kanang
Nagngangang kahilom
Sa tunga-tunga natong duha
Molapos pa
Ngadto sa laing kalibotan,
Mokawot,
Mokutkot
Sa kahiladman
Ug lugpitan ang galamhan
Hangtod tukbon sa kalimot.

Sa gihapon
Pasagdan ko ikaw.

Kay bisan gani ang huwaw
Moabi-abi sa tinagsa-
Tagsang taligsik.
Kay ang huwaw
Mingawon sa mga hinuyop,
Mga awit sa ulan--
Mga yanong pinisik
Sa bul-og,
Haguros,
Alimpulos--
Mga pagtapion
Sa mga ngabil
Nga gawasnong
Makig-akob sa yuta,
Muhupay sa katig-a
Sa mamala unya

Kon molurang na
Ang huwaw.


-- GINA MANTUA-PANES
Cebu City, Philippines

2 comments:

M said...

nindot, Gina
molurang ang ulan
may kinutoban
ang hulaw sa pagpasagad
tali sa matam-is kahilom
sa nag-akob mga ngabil
sa mga nag-inusara.

-mananambalak

ginamantua-panes said...

salamat nyor,
karon ra ko nakabasa.


Daghang salamat sa mga maniniyot nga gapaambit sa ilang mga hulagway sa Google ug Flickr.