11.15.2026

saksi ang dagat


Saksi ang dagat 
Sa daghang pagkapukan: 
            May nalumos ug may nalumsan 
            May mga ihong nangatuk-an 
            Ug may mga pawikang naughan. 

Apan saksi usab ang dagat 
Sa mga pag-abot ug pagkabanhaw: 
            Ang pag-asdang sa isda 
            Nga taudtaod maluto o makilaw 
            Ug ang pagpamauli sa mga nagbaguod 
            Gikan nakigbisog sa balod. 

Anaa usab ang pagkabanhaw 
            Sa buntag magdalag paglaom 
            Nga unta ang anak kamao nang mosalom 
            Nga naluwa ra sa iho ang plastic nga gium-om 
            Nga ang pawikan nakauli gikan milumlom. 

Ug labaw sa tanan, 
            Didto sa kinalayoang dagat 
            Nga ikaw ug ako 
            Magpabiling usa ka buhi 
            Nga mahanduraw 
            Bisan sa imong pagpanaw. 


-- ERLINDA KINTANAR-ALBURO
 
Cebu City, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.