o ginoo ko

(hubad sa Iningles ni Arthur Symons sa orihinal

nga Pranses ni Charles Baudelaire)

O Ginoo ko, gisamaran Mo ako sa imong gugma,
Tan-awa ang samad, nag-uylap pa kini sa kahapdos,
O Ginoo ko, gisamaran Mo ako sa imong gugma.

O Ginoo ko, nahagsa diri kanako ang Imong kahadlok,
Tan-awa ang paso, ngutngot, daw singgit nga dili mabati,
O Ginoo ko, nahagsa diri kanako ang Imong kahadlok.

O Ginoo ko, nasayod ako nga ang tanan salawayon,
Ug nga nagpuyo ka sulod sa akong kasingkasing,
O Ginoo ko, nasayod ako nga ang tanan salawayon.

Lumsi ang akong kalag sa baha, baha sa imong bino,
Sakti ang akong kinabuhi sa lawas sa Imong tinapay,
Lumsi ang akong kalag sa baha, baha sa imong bino.

Ipabanaw ang akong dugo, nga wala ko pa mapaagas,
Bawia ang akong unod, nga dili takos sa pag-antos,
Ipabanaw ang akong dugo, nga wala ko pa mapaagas.

Bawia ang akong agtang, nga nakat-on lag pasiatab,
Aron himoong sangitanan sa balaan Mong mga tiil,
Bawia ang akong agtang, nga nakat-on lag pasiatab.

Bawia ang akong mga kamot, nga wala mabudlay,
Alang sa nagbagang uling ug pangitaonong insenso,
Bawia ang akong mga kamot, nga wala mabudlay.

Bawia ang akong kasingkasing, nga tugob sa pagawal,
Aron mopitik kini ubos sa mga tunok sa Kalbaryo,
Bawia ang akong kasingkasing, nga tugob sa pagawal.

Bawia ang akong mga tiil, laagan ug walay gidulaw,
Aron sila managan nga nagsuliyaw sa Imong grasya,
Bawia ang akong mga tiil, laagan ug walay gidulaw.

Bawia ang akong tingog, karas ug bakakon nga siyaok,
Nga nagdumili pagtuo sa Imong paghinulsol,
Bawia ang akong tingog, karas ug bakakon nga siyaok.

Bawia ang akong mga mata, nga iwag sa panlimbong,
Nga mapalong diha sa mga luha sa pag-ampo,
Bawia ang akong mga mata, nga iwag sa panlimbong.

Unsay kahiladman sa akong pagkawalay-igabalos,
Intawon, Ikaw, Ginoo sa pasaylo ug panaad,
Unsay kahiladman sa akong pagkawalay-igabalos.

Ginoo sa kalisang ug Ginoo sa kabalaan,
Intawon, ang pagkamalapason ko bung-awng lugitom,
Ginoo sa kalisang ug Ginoo sa kabalaan.

Ikaw, Ginoo sa kalinaw, sa kalipay ug sa kasadya,
Ang tanan kong luha, ang tanan kong kaburong,
Ikaw, Ginoo sa kalinaw, sa kalipay ug sa kasadya.

Ikaw, O Ginoo, nasayod niining tanan, niining tanan,
Unsa ako katimawa, ako nga labing alaot sa tanan,
Ikaw, O Ginoo, nasayod niining tanan, niining tanan.

Ug tanan kong gipanag-iya, Ginoo, ihatag ko Kanimo.


-- VICENTE VIVENCIO BANDILLO
Dubai, United Arab Emirates

pangandoy

Dunay napulo ka libo ka mga balod
nga nag-ulang kanimo ug kanako.
Inigkabuntag sa tibuok pa ang adlaw
mangandoy ako nga makatabok
ug moipon kanimo sa tibuok bayente kwatro ka horas.
Unya inigkaudto, sa tunga na lang ang adlaw,
mangandoy ako nga makaduaw kanimo
bisan og usa lang unta ka horas.
Ug unya sa nagkatapos na nga kahaponon,
mangandoy ako nga makakita sa imong nawong
bisa’g sa usa lang ka gutlo
unya sa katapusang kahayag
sa di pa matunod sa hingpit
ang nagsalop nga adlaw.

-- URIAS A. ALMAGRO
New Berlin, Wisconsin, USA

ang kinabuhi sama sa laud

1.

Tungod kay ang kaliyokan basa
Iumol ko sa sakayan king katakata.*

Tungod kay ang wanang sa taas uga
Ilubong ko ang mga bukog sa hangin ug yuta.

2.

Dinhi
Ang tanang pulong naglutaw
Ang tanang kahulugan nahulog sa ibabaw.

_____________________________________________
* Katakata: sa mga Sama Dilaut o Bajau usa ka porma sa istorya.


-- LEO BOB FLORES
Bukit Batok, Singapore

hisgot sa kalinaw

gihisgotan sulod sa bugnaw nga mga hotel
aron kuno mahusay tanang panagbingkil.

"kinahanglan gayod kita managhiusa."
pulong sa ekspertong mingisi sa kamera.

apan sa dihang gituki kon asa maghiusa,
migawas gyod ang tinuod nga kolor niya.

ang panaghiusa diay nga iyang gidamgo
taman ra man diay sa istoryang pinulitiko.

kay adunay pondo kining mga panagtigom,
ug aduna diay siya kanunay nga maugom.

"kinahanglan gayod nga kita managhiusa!"
tubag usab sa opisyal nga nagpiyong ang mata.

kay alang kaniya, maghiusa sa pagpakabuta
sa kahimtang sa tanan nga naglurat ang mata.

"kalipay, kalinaw ug paglambo alang sa tanan!"
matod pas bontit nga gikan tabok sa kadagatan.

"ayohon ko ang mga dalan, motaod kog eskuylahan."
apan ang tuyo diay mao kadtong mga minahan.

ug kon mobabag gani ang uyamot nga mga lumad,
gamitan dayon sa kuyaw ug ngilngig nga abilidad.

ang lider nga lumad modayon na lamang og kirig,
bisan tingali mambabarang sa abilidad di kalupig.

"nalumos tos sabaw o kaha nakalimot og ginhawa."
maoy labing daling hinungdan ipaguwa sa midya.

dayong balik sa eksena ang grupong mga armado.
pinusilayg balabala ang sibilyan haskang igoas ulo.

kalinaw, kalinaw, ang mga utok namo gikutawkutaw.
human ilogig yuta gipasaligan dayon sa way mga ulaw,

"kamo nay mahibalo kon unsay ihatag ninyo kanamo."
ginagmay apan kanunay hangtod ang bayad modako.

unya kon masuko ug magwaras ang mga hingtungdan,
ingnon dayong hinayhinay kay igsoon tang tanan.

agion lang kuno sa istorya aron walay dakong gubot,
ug kon kami mangatarongan ingnong way mga buot.

giuban na lang ang bungot sa akong silingan,
wa pa mahuman ang istoryang way padulngan.

kay unsaon man og kahuman ang hisgotanan,
nga di man nila ilhon ang tinuod nga gisugdan?

basin tingali kay kadaghanan nilang apil sa hisgot,
aduna may kalambigitan sa among pagkaalaot.


-- ANIJUN MUDAN-UDAN
Malaybalay, Bukidnon, Philippines

siete palabras

(hubad sa Iningles ni Mark Strand)

Ang sugilanon sa kataposan, sa kataposang pulong sa kataposan,
kon isugid, mahimong sugilanon nga way kataposan. Gibalikbalik
nato ni pagsugilon—usa ka pulong, unya lain na usab hangtod nga
morag way pulong nga posibleng maoy himoong kataposan, nga
way pulong nga sarang maantos. Mao nga, sa dihang ang bida

sa sugilanon
moingon sa iyang kaugalingon, nga daw sa usa ka tawo nga atua
sa halayo, “Pasayloa sila, kay wa sila masayod sa ilang gibuhat,”
sa atong paminaw morag nagpakiluoy siya alang kanato, nga kita
maoy tinagong kinabuhi sa sugilanon ug, samtang magpabilin nga

wa matubag ang iyang gipangayo, maluwas kita. Mao nga

ang sugilanon

nagpadayon. Mao nga kita nagpadayon. Ug ang kataposan,

sa makausa pa, maoy mahimong sunod, ug ang sunod nga

mosunod niini.

-- VICENTE VIVENCIO BANDILLO
Dubai, United Arab Emirates

ang salaod sa gugma

Ang gugma usab, sama sa salaod, magbilin
Og mga agi. Ang mga lama sa iyang mga tudlo
Magsangkad sa lawas sa iyang mga biktima.
Ang mga tipik sa sulalbaron dali rang mohaom
Ug dali rang masulbad ang iyang natibway.
Sayon nga siya itudlo ug pasakaan sa sumbong.
Apan unsa man ang motibo? Ug unya sa bista,
unsa man gyud ang probahong salaod
nga iyang nahimo?

-- URIAS A. ALMAGRO
New Berlin, Wisconsin, USA

gakagot nga katawa alang sa kawatan nga gibantog sa pagwarawara sa iyang sanggot

Iyang kilawon ang atong kasingkasing.
Bino alang niya ang lubog nga bul-og
gikan sa atong mga mata. Maglaway siya
nga magbasa sa atong mga ngalan kon
kini kuliton diha sa lapida. Pinataghoy
ang pagsupsop niya sa atong dila kon
amang, wala ta’y katakos sa pagkanta.

Ay, makigharong ko niya bahala na’g
mapangag. Buntogon nako ang kaluog
sa iyang kagutom hangtod ilhon niya
ako isip higala. Labi na kon kutasan
siya’g tila sa tumoy sa akong sungkod
lagbas sa katuigan ug madunggan niya
ang kagay sa kataposan nakong katawa.
Igo na lang siyang’ motakla pagdawat
sa akong tagay. Usa ka baso. Gisudlan
sa galutaw, ganganga nakong pustiso.

-- MICHAEL U. OBENIETA

Topeka, Kansas, USA

adunay awit ang tamsi

Sa gawas sa bintana adunay tamsi
sa sayo sa kabuntagon nga gaawit

og ako namati pag-ayo.

Pagkasubo ba sa iyang awit
nga morag nangita sa iyang mga piso
tungod ba kaha sa kakusog

sa hangin ug ulan kagabii.

Maayong pagkagusbat ang iyang salag
sa sanga sa balimbing. Nangahulog

ang mga balahibo diha sa lapok.

Ako kang giingnan mahitungod niini
apan igo ka lang kanako misulti--
"Katulgon pa ko, ayaw ako'g pukawa!"

Ug ako usab nanira og balik sa bintana
wala'y gibuhat. Wala'y hunahuna.

-- RIC S. BASTASA

Katipunan, Zamboanga del Norte, Philippines

panan-awong pinutos sa puhaw nga panganod

eco condannato…

ang siyudad nga akong nakita
nalukop og hirig nga mga edipisyo

nga kon tan-awon gikan sa taas
morag mga lungon nga naglikop

og halapad nga plasa
diin magbuntag nga way hunong

ang hilom nga prosisyon
sa sulondong mga lungsoranon

libot sa nagbuntaog nga bantayog
sa mapahiyomong mga bathala

-- VICENTE VIVENCIO BANDILLO

Dubai, United Arab Emirates

sa tampi sa kahayag

MOM!*
Ang akong padulngan.
Nagdali akong nibiya sa Makanan*
Nga nagbuntaog sa itom nga sapa sa akong kasingkasing
Subay sa tampi sa sapa sa Singapura
Nagdali ang akong mga lakang sama sa mga lakang ni Dain*
Nga namidpid sa tampi sa sapa sa Sambir.*
Nagbaga ang sidlak sa adlaw daw mga pana nga nanusok sa akong panit
Ug akong nakita sakay sa Bus 911 ang babaye nga adunay panit
Sama kang Nina*. Si Nina! Naukay ang dagat sa akong kahiladman.
Nagdagan akong ningadto sa bus stop. Sa pagbukas sa pultahan
Sa Mercedes nga bus akong nakita ang kahayag sa iyang mga mata.
Ang kahayag sa mga mata ni Annelies!*
Ug sipa kaayo ang mga pulong nga niambak
Sa iyang mga baba: Mas Menke!*

___________________________________________
MOM: Ministry of Manpower sa Singapura
Makanan: ang Bahasa sa kan-anan.
Nina: Nina Almayer, ang dalagang anak ni Kaspar Almayer

sa nobela ni Joseph Conrad nga Almayer’s Folly
Dain: ang hinigugma ni Nina Almayer.
Annelies: Annelies Mellema ang asawa ni Menke sa epic novel

nga Buru Quartet ni Pramoedya Ananta Toer
Mas: Sir, brother (used to address or refer to contemporary

males, including wife to husband, us. only for Java).

Menke: monkey

-- LEO BOB FLORES

Bukit Batok, Singapore

ikaunom nga pinatuybo* nga pagpamalak

(hubad sa balak ni Roberto Juarroz)

Ang kampana puno sa hangin
bisa’g dili kini mobagting.
Ang langgam puno sa paglupad
bisa’g kini wa maglihok.
Ang langit puno sa mga panganod
bisa’g kini nag-inusara.
Ang pulong puno sa mga tingog
bisa’g way nagsulti niini.
Ang tanan puno sa paglayas
bisa’g way mga dalan.

Ang tanan nanglayas
padulong sa ilang presensya.

_____________________________

* pinatuybo: vertical

Gihubad ni:
-- URIAS A. ALMAGRO
New Berlin, Wisconsin, USA

kaniadto sa ignorante pa ko

karon.

samtang naminaw ko
sa akong kaugalingon,
kangilo handomon
sa kagahapon.
kadtong panahonang
tanan masulbad
sa halok, gitik ug pahiyom.

kalu-od.


-- MARVI A. GIL
Reykjavík, Iceland

ang apostol sa katalagman

1

Nahinanok o nahisum-ok sa buhilaman
Maaninaw ko ang umaabot nga kasakit,
Ako nga gipatawag aron panalanginan
Ang pagbukhad ug kalit nga pagtiklop sa langit.

2

Wa koy laing giangkon gawas sa kalibotan
Ug way kamatayon nga dili sa akong ngalan.

-- VICENTE VIVENCIO BANDILLO

Dubai, United Arab Emirates

lakbit-saysay sa lumalabay

Galutaw sa abog, usa ka panid sa mantalaan. Napalid
dihang dungan og panghuy-ab ang mga sementado
nga manulonda diha ibabaw sa mga nitso. Napalid
palayo sa mga pungpong diha sa basurahan, nalarag
gikan gihalad lakip sa dinagkotang kandila. Napalid
duol sa duha ka iro nga gahabal daplin sa da’n, wala
mag-ibot bisan gahaguros ang ambulansya. Napalid
ang mga letra. Nanugdon sa atong agianan, naglakra
sa atong tagsa-tagsa ka nga’n diha sa hangin. Napalid.


-- MICHAEL U. OBENIETA
Topeka, Kansas, USA

ang wa damha’ng panagtagbo

(hubad sa balak ni Wislawa Szymborska)

Kita labing matinahuron sa usag usa,
moinsister nga kini nindot nga panagtagbo human sa daghang katuigan.

Ang atong mga tigre moinom og gatas.
Ang atong mga banog molakaw sa yuta.
Ang atong mga iho nangalumos sa tubig.
Ang atong mga lobo nanghuyab sa atubangan sa giablihang tangkal.
Ang atong mga serpente miyabyab og mga kilat,
mga unggoy--inspirasyon, ang mga peacock-- mga balhibo.
Ang mga kulaknit-- dugay na karon-- nga nanglupad gikan sa atong buhok.

Nangahilom kita sa tungatunga sa atong pulongan,
nagpahiyom lagbas sa kaluwasan.
Ang atong mga katawhan
walay ikasulti.

Gihubad ni:
-- URIAS A. ALMAGRO
New Berlin, Wisconsin, USA

pahilayo nga pagdapit

Pikatan unta ka sa buta. Ikaw nga galikay aron di matunolan
sa iyang sungkod, dawata kining akong pahasubo. Dili nimo
mahimamat ang latagaw nga mao ra’y bugtong makatultol
sa utlanan sa imong kamingaw. Ako nga dagha’g uwat
hapin sa akong tuhod, unsa’y lain nakong ikabilin isip
panamilit? Diha sa pahiran ubos sa pultahan sa imong
lawak nga trinangkahan, nagnganga ang duha ka dunot
nakong sapatos. Igo na kanang liston kon luiban mo ako
pinaagi sa paghigot sa imong liog. Ayaw ko tawga. Matugaw
unya ang mga langgam, nanugdon sa akong abaga. Hangad,
ug subaya ang akong mga tunob. Gatabanog ko’g mga mapa.

-- MICHAEL U. OBENIETA

Topeka, Kansas, USA

kahait sa katahom

dili mawagtang
dili mawakli
dili mapahimakak

sa usa ka puti nga rosa

ang iyang mga tunok

nga nagdugang gayod

sa iyang katahom bisan

wala siya masayod

-- RIC S. BASTASA

Katipunan, Zamboanga del Norte, Philippines

ang unang mga bulak

(hubad sa balak ni Hermann Hesse)

Tapad sa sapa
Paingon sa mga willows,
Atol ning mga adlawa
Daghan kaayong mga lalag nga bulak namuskad
Sa ilang mga mata ngadto sa pagkabulawan.
Dugay nang nawagtang ang akong pagkainosenti, apan ang handurawan
Motukbil sa akong kinahiladman, and bulawanong mga takna sa kabuntagon
Motutok nga masilakon kanako gikan sa mga mata sa mga bulak.
Naglaraw unta ako nga mangutlo og mga bulak;
Karon gibiyaan ko sila’ng tanan nga nanagtindog
Ug milakaw ako pagpauli, usa na ka tigulang.

Gihubad ni:
-- URIAS A. ALMAGRO
New Berlin, Wisconsin, USA

tulo ka tinagup-at

1.

Kay tinuod nga ulahi kanunay ang pagbasol,

mag-una ko'g layat, magdagan nga magtiniil

sa ulohan sa panon sa mga pungkol ug bakol

padulong sa pista sa unang adlaw sa Abril.

2.

Asa ko sa kataposan sa kalibotan?

Moadto ko sa balay sa gipaangkan

ug manghinaot nga makat-on ko

sa kauhaw sa gauha nga masuso.

3.

Kuyog ta hangtod sa tumoy sa pangpang.

Atong iitsa didto ang mga pungpong

gikan sa bundo sa bag-ong gilubong.

Sa ubos, nangandam pagsawo ang buang.

-- MICHAEL U. OBENIETA

Topeka, Kansas, USA

pagtaklob sa kangiob

ubos sa mitaklob nga kangitngit
adunay hinog nga bunga nga buot niyang pupoon
adunay mga sagbot sama sa kabugnaw sa katulogon
adunay mga gamot angay unlanan sa pagpahulay
adunay miabot nga bulan
ug busa siya milantaw lamang

namati na lang siya sa hangin
wala na siya'y hinumdoman kon unsa pa

ang buhaton sa kagabhion

karon nga siya

wala na

-- RIC S. BASTASA
Katipunan, Zamboanga del Norte, Philippines