6.23.2008

Tabangi ako

















Pagpangita og usa ka balak
Nga mobangon ug manglugod
Sa iyang mga mata matag buntag.
Moatubang sa salamin sa mga adlaw
Ug makaila sa kaugalingon niyang nawong.
Usa ka balak nga gikubalan ang mga kamot
Nga manglulho sa iyang mga bukton
Ug way pupanaganang motidlom
Ngadto sa giladmon sa inadlawng gimbuhaton.
Tabangi ako pagpangita
Og usa ka balak nga dunay dugokan, dunay lapad
Nga mga abaga ug kusganong mga tiil
Nga di maluka sa bisan unsang mga sulog.
Usa ka balak nga may lubasang tingog, nga makig-
Kabildo kanato sa way pagpamilok.
Tabangi ako pagpangita
Og usa ka balak nga dunay pultahan
Nga magtultol ngadto sa mga lawak
Nga hangtod karon nagpabilin pang gisirhan.
Usa ka balak nga mopalupad og mga aligato
Nga daw mga gagmayng gapasan nga makigbugno
Sa nanaglikos nga mga gaway sa kangitngit.
Tabangi ako pagpangita
Og usa ka balak nga hugot ang layag sa paglawig
Sa lalom ug bughaw’ng dagat ning atong mga galamhan.
Usa ka balak nga mohangad ngadto sa kabituonan
Sa pagdayeg, sa pagdamgo, sa pagpalandong.
Tabangi ako pagpangita
Og usa ka balak nga dunay kasingkasing.
Nga moduyog sa huni nga nagagikan
Sa gikablit nga mga kwerdas sa tawhanong kagul-anan.
Usa ka balak nga mopauli inig ka-kilomkilom
Manghinaw ug mosalo kanato
Ning tagana nga gisukad ug gidulot
Sa gamayng talad ning atong mga kinabuhi…
Tabangi ako.



(Alang sa mga magbabalak sa pinulongang Binisaya).


-- URIAS A. ALMAGRO, M.D.
New Berlin, Wisconsin, USA

1 comment:

candice salazar said...

mitulo ang akong luha pagbasa ko niining imong matahom nga balak. bag-o pa ako sa pag lala ug mga pulong,usa ka sa akong mga inspirasyon. salamat


Daghang salamat sa mga maniniyot nga gapaambit sa ilang mga hulagway sa Google ug Flickr.