"Ceci n'est pas une pipe"

(Kinutlo gikan sa painting, La Trahison de Images, ni Rene Magritte)

Bitaw, Rene, limbongan kaayo ang hunahuna.
Kung molibod siyag istorya, iyang burit
Sangko sa kinatumyang iskina; iyang bakak
Sipa pa sa kinakusgang pakpak sa higante.
Ug wa ka masayop, siya usa ka pilosopong daku:
Ang tul-id, bawgon – nganlan niyag paglaom.
Ang bawg, tul-iron – nganlan niyag pagtuo.
Ang kamatuoran iyang bistihan sama sa manika.
Itapad sa kilid, pakatulgon, mosketiruan sa gugma.
Pagahandumong unta mobaws niya og pangga.


-- ADONIS G. DURADO
Bangkok, Thailand