saksi ko dihang giluba ang balak

Ngalan?
Adonis Durado.

Edad?
32.

Asa ka dihang nahitabo ang krimen?
Naa ko sa kwarto. Sa akong apartment.

Oras sa panghitabo?
Pasado alas tres sa kahapunon.

Mahimo bang isaysay og detalye ang imong nasaksihan?
Anang orasa namintal ko sa akong kwarto, samtang lanog nga gapatukar og Beethoven… 9th Symphony in D minor, op. 125 choral. Apan kalit lang naungot ang CD pag-abot sa 4th movement… gabalik-balik og ambak ang linyang "O Freunde, nicht diese Töne!" Niadto ko sa sala diin nahimutang ang component ug gi-eject ang CD. Sa akong gibarugan, nasiplatan nako si Mahler, ang Siamese nako nga iring, nga gakitkit og ilaga kilid sa may bintana. Giduol ko si Mahler, ug ako siyang gihapuhap: "Good boy, Mahler, i-genocide tanang Mickey Mouse nga mikibkib sa akong Finnegans Wake ug Remembrance of Things Past." Ug kalit lang, nakadungog ko nga may nilagubo… Mitambo ko sa gawas, milantaw sa atubangang bintana kasikbit sa among building. Ug didto, akong nasaksihan nga gilayog ug giataki sa usa ka tawo ang balak nga nag-inusarang gapuyo atbang sa akong pinuy-anan. Naningkamot ang balak og ilog sa kutsilyo nga gisuway og taup sa iyang may ubol-ubol. Mihupo ko nga nahikurat… mitago sa kaugalingon nga nangurog. Ako na lang nadunggan nga may miping-ik, morag may miiwigik….

Nganong wa man dayon ka motawag og pulis?
Gumikan wa ko kahibalo kung unsay angay kong buhaton anang higayuna.

Nasayod ka bang miabot og usa ka semana una nakaplagan ang patayng lawas?
Nasayod. Gumikan ang baho niini gasigeg suong sa akong bintana, sugod sa tulo ka adlaw human ang panghitabo.

Tinuod bang dugay na mong kaila ang biktima?
Tinuod.

Sukad kanus-a?
Sukad nga misugod kog kumpisal niya.

Kanus-a?
Basta, dugay na. Din-a ko kahinumdom. Sukad nga gipa-ila-ila ko niya sa gahum sa pulong. Ug sukad nga nakapamabdos kog metapora. Siya ang mimaymay kanako kung unsay angay kong buhaton, dihang nakasala ko sa kalibutan. Dihang mikuyog sa panon sa ubang makasasala – nilang Whitman ug Dickinson, nilang Eliot ug Pound, nilang Rilke ug Neruda, nilang Szymborska ug Oliver, nilang Dobyns ug Bandillo…

Sa ato pa, matawag nga suod mong higala?
Siguro. Pero, siya man mismo ang miingon nga di nako siya angay isipon nga higala.

Tungod kay?
Tungod kay... sama kuno sa kamatuoran... siya maluibon. Kung isipon nako siyang higala, basig sa utlanan masakitan lang unya kuno ko.

Unsay buot mong ipasabot?
Sama ani karon.

-- ADONIS G. DURADO
Bangkok, Thailand