mga linyang napukaw ug nilikis sa daman ni Mahmoud Darwish

Sakdap-tayhop sa tagpilaw ang gapanilap nga kainit 

sa sugyot mong hinagawhaw (say: if only I were 

a candle in the dark.) Ingon ini ang lanog nga katugnaw sa hagit 

gikan sa naabo nga atabay didto sa Gaza hangtod sa uban pang 

mga dapit sa pagkagun-ob. Lakip, pananglit, sa namat-an nako’g 

madag-om diin ang sungasong sa huwaw dili sarang mobangbang 

sa mga lunop ug mga linog. Diin ang kaagi namo lapas sa kalaay, 

wa’y paghubas tugbang sa kahiladman sa Marianas. Kining bung-aw 

sa mga urom ilawom sa gahuy-ab nga lilo sa among pagminatay 

ubos sa mga malupigon. Unta ikaw, sa balaknon mong balibad 

sa pagluom, mosaksi usab sa sagunson nakong kiskis-duslit 

sa katalaw. Huptan unta nimo hangtod kining duha ko ka palad— 

manghagdaw sa kasagbotan. Mangahas og pagsilaob. 

Mopakatap og alimyon sa palina hangtod mahigmata lakip 

ang hunasan. Hangtod ang mga bukog iduyan-laylay sa pagtaob. 

-- MICHAEL U. OBENIETA 

Topeka, Kansas, USA