ang daan nga payag
sa hardin sang akon
nagaisahanon
nga kasingkasing.
Ang pawod nga atop
may kalendaryo
halin sa Saggitarius
Mines Incorporated.
Ang apat ka poste
sang kawayan,
may mga nakasulat
nga petsa kon san-o
gin-ihaw ang amon ido,
ginbaligya ang munga
nga manok, kag kon
san-o ako gintuli.
Sa gilid sang bangko
sang payag, nagakulob
ang talagayan sang tuba
nga wala masimbugan
sang matam-is nga balok.
Si Tatay naga-de cuatro
kag ginapanilagan
ang mga bulak
samtang si Nanay
nagapangadi
nga mabuksan niya
ang ulihi nga balunggay
sa baraha sang hampang
nga solitaryo.
Kag ako, nagatan-aw
sa balkon, nagahipos,
nagaisahanon
nga ginalantaw
ang landong sang kahapunanon
nga nagaamat-amat tunod
samtang ginalumos
ako sang ingos
sang mga kikik
nga nagasubang sa kadulom
kag nagapangandam
sang ila hamili
nga mga ugayong.
-- ADRIAN PETE MEDINA PREGONIR
Banga, South Cotabato, Philippines

No comments:
Post a Comment