12.15.2008

samtang nag-atubang ako sa laray sa mga magasin sa plastik nilang mga sudlanan sa bungbong sa lawak basahanan, decembre 1994
















Nahibiling mga adlaw
Sa tumatapos nga tuig.
Sa mga laray ug sihag nga mga laray
Sa plastik nilang mga sudlanan,
Ang mga magasin nanagsandig. Luyloy, gum-os,
Nangapiko human sa daghang pag-abli ug pagpakli.
Sama sa nagdali’ng mga adlaw, di na madugay
Ilisdan na sila sa sunod nilang mga gula.
Ug ang mga hulagway sa ilang mga hapin,
Bag-o ug lain na.
Akong gipalandong kon unsa
Ang didto sa sulod sa kaisipan
Niadtong iguana nga nagtungtong sa ngilit
Sa usa ka bolkan sa isla sa Galapagos,
Nga gihulagway sa hapin sa magasing Natural History.
Ang tinutokan sa itom niyang mga mata
Daw milagbas sa dulom nga wanang
Nga nagkaylap ngadto sa sidsid sa napilo’ng papel.
Wa matukbil ang akong kaikag
Pagsiksik sa tubag niadtong pangutanang
Nahimutang sa hapin sa magasing Sports Afield:
Nganong kitang mga tawo buot mang mangayam.
Tunga-tunga sa plastik nga laray
Ang magasing New Choices nagtanyag og mga paagi
Unsaon ta pagluwas ang atong mga panit
Sa pagpangunot, sa pagkauga, sa cancer.
Unya didto sa iyang kilid kadtong lisod sabtong pangutana:
Nganong ang mga minyo’ng babayeng
Kapin na sa singkwenta ang panuigon
Nanglimbong pa man sa ilang kaminyoon
Ug nakighimayaay uban sa ilang mga kabit.
Miirog ako ngadto sa tumoy,
Diin ang hulagway sa Santo Papa
Uban sa daw Mona Lisa niyang pahiyom
Maoy hapin sa Time magazine sibling Man of the Year.
Ug didto sa pikas tumoy, sa hapin sa magasing Audobon,
Nagpadayon pagdilaab kadtong dakong sunog
Nga miugdaw sa mga kalasangan didto sa Kasadpan.
Matod pa sa iyang caption: Daang kaaway,
Bag-ong paghagit.
Milingi ako ngadto sa bildo’ng bintana,
Ngadto sa kalibotan sa taliwala sa tingtugnaw,
Sa mga kahoy’ng way mga dahon
Nga iniglabay sa pipila lang ka mga bulan
Motigib na pag-usab
Sa ilang mga udlot, sa ilang mga biyoos.
O panahong atong giatubang!
Ang mga adlaw, semana, bulan,
Tuig ug mga katuigan. Ingon usab niini
Ang sihag nilang mga sudlanan. Diin atong gisud-ong
Ang nanaglaray’ng mga hulagway sa mga hapin,
Apan wa nato mabasa ang tanang nahisulat
Sa sulod sa nagum-os ug napilong mga panid.


-- URIAS A. ALMAGRO
New Berlin, Wisconsin, USA

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.